Mafatia ona o le utiuti o le suāvai

By Vatapuia Maiava 29 October 2016, 12:00AM

Na fa’ailoa e le tamā i a Puata Fealofani  i le Fofoga o Samoa i le aso ananafi nisi o fa’afitauli o lo’o ua feagai pea ma le tele o aiga o Tufulele-Uta lea o lo’o aumau ai fo’i ma le aiga i le taimi lenei.

 “Ia e pei ona silafia e pei o le agaga maualuga o lo’o ua i ai i le taimi lenei, ia mafai lea ona kiliva lelei mai le vai i tua nei.

 “Ia e i ai taimi ua i ai le vai maua, ia ona fiafia lava lea, ae o le tele o taimi ia e leai se suavai e maua, ia a leai loa la ni vai o le tali o le la’a ma paelo e tau aoao mai le suavai i aiga i gatai.

O lona finagalo e pei o se fa’aosofiaga sili lea ma le  fa’afetai i le Atua pe afai ae maua se suavai.

 “O le tausaga e 2003 ia na omai ai iinei ma le aiga, ma o le suavai le fa’afitauli tele lava sa feagai ai.

 “Ia e pei o lea le fa’afitauli o lo’o feagai ma nai aiga i tua nei, e pei o lo’u ia iloa i ai e laititi le  ofe, ma o le taimi lenei o le ofe a le malo o lo’o o’u fa’aaogaina.

“Ia o nai isi aiga i luga atu, e le o’o ai le ofe a le malo, ma o le agaga alofa i le tele o nai aiga nei ona o le fa’afitauli lava lea e tasi.

 “Ia o lo’o i ai paelo ma kalone ae le taitai ona lava mo le suavai, a sau la le suavai e fa’aaoga nai vaega ia ae a o’o lava ina le matua’i leai lava se suavai ia ua leai a.

 “Ia o le tele o taimi e sau ai le suavai i le afiafi po o le leva fo’i o le po.

 “E mo le silafia ai o le tele lava talosaga na ave i le malo ina ia fesoasoani mai ae pei e leai lava se vaega o fa’atinoina e o’o mai lava i le taimi lenei.

 “O le itu o lo’o ua titilo atu nei e mafai ona vave fo’ia ai o nai tane vai, ou te iloa o se itu lea ua mo’omia lava e’i matou i tua nei.

 “Ia o le itu leaga lava , a o’o le taimi e matua’i leai ai lava se vai ia e feoa’i solo, aua e le faigofie le o atu i tai ma le toe omai.

“E lelei le to’atele o lo’o gatai atu aua e lelei lava le sua o le vai i taimi uma.

“Ia ua tele fo’i sui ua tutu mai ae masalo o le a fa’amoemoe atu i si a’u sui lea ua tula’i mai le taimi lenei e fesoasoani mai.

By Vatapuia Maiava 29 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>