Fa’amalosia faiganu’u a afio’aga tu taulaga

Tusia Vatapuia Maiava ma Ilia L Likou ,

130 Hits

Tofilau Pio

Tofilau Pio

“O lo’u iloa i ai ua tatau lava i le malo ona fa’amalosia le faia ai lea o faiganu’u i totonu o nu’u o lo’o tulata i le taulaga.” O le finagalo fa’aalia lea o le tamā i a Tofilau Pio, 54 le matua o le soifua i le Fofoga o Samoa i le aso ananafi.

Na ia fa’ailoa i le Fofoga o Samoa e fa’apea o lo’o tele le ese’esega o tupulaga o lo’o ola ane i Savai’i ma le tele o afio’aga o lo’o fa’atinoina ai faiganu’u a matai nai lo i latou o lo’o nonofo i le taulaga.

“Ia o lo’u iloa i ai o lo’o sologa lelei lava le tele o tupulaga i Savai’i  ma le tele o nu’u i tua o le la fo’i itu o le atunu’u, ae e pei o lo’u ia iloa i ai , ona o le mamalu o le pulega a matai.

“E pei o le vaega lea o lo’o lelei lava le tele o vaega i tua nei, aua fo’i e leai se isi e fa’apisapisao, o le la ua iloa le iuga e o’o i ai.

“Ae pei o vaega nei o lo’o fa’atinoina i totonu o faiganu’u nei, e mo le lelei lautele ai o le tele o vaega o le atunu’u.

“O la’u ia fo’i tatalo i le malo ina ia silasila ina ia vave ona faia ni faiganu’u i totonu o le tele o afioaga nei.

“Aua e pei o nu’u nei o lo’o tele ina lalafi solo ai tupulaga ma fa’atuputupu misa ai.

“O matua fo’i  ia e tatau lava ona fesoasoani i a latou fanau, ia fa’asoa i ai, ia alolofa e tau tu’utu’u mai ai latou amio o lo’o fai.

“O le olaga lenei , o le galulue fa’atasi lava e lelei ma mautu ai so’o se taumafaiga.

“Ia o le tu’ualalo masani lava i tupulaga ia to’a’aga e tatalo e manuia ai le olaga.

O lona talitonuga ua tele ina solo i tua le aganu’u.

“O lo’u autilo atu i ai ua tele ina solo i tua  le aganu’u ona ua le lava le mafutaga a tupulaga talavou ma matua.

“Ua o ese fai lava o latou loto.

“O le vaega o lo’o apoapoa’i ai lava i fanau pe a o atu i Upolu i aoga, ia tautuana le tapuaiga a’i matou. “Aua a lelei pe leaga, ia o matua lava e ta’u , ma fesili tagata a’o se tama a ai? Ae ose atali’i a ai?

“E i ai lava la fanau ma tupulaga o lo’o fa’aaogaina fautuaga ae o nisi ua matua’i misi atoa lava.

“E pei a fai atu ae ua fa’ailoa mai le poto ma le atamai, ae pei o lea o lo’o ave ai lava fautuaga.

“Ia o Savai’i lava ia, ia e faigata lava ona maua ai ni tupulaga malovale, aua o lo’o iloa le mamalu ai o pulega i lenei taimi.

“O lea le manatu maualuga e pei e manaia ae fai uma pulega a nu’u ma afio’aga e taofiofia ai nei faiga ua alia’e mai i le tele o tupulaga talavou.

© Samoa Observer 2016

Developed by Samoa Observer in Apia