Tausiga o le aiga i aso uma

Tusia Vatapuia Maiava ma Ilia L Likou ,

140 Hits

Si’ueva To’ia

Si’ueva To’ia

E afea e le Fofoga o Samoa le tamā i a Si’ueva To’ia, 42 le matua o le soifua o le afio’aga i Utuali’i o lo’o tatao lana upega i gataifale lava o le afioaga.

“Ia e pei ona outou maitau mai ai, ia o le masani lava lea i aso uma, a leai se mea’ai o le aiga ia e sau lava i tai nei , ma o i’a lava o le sami o lo’o ua fesoasoani i nei aso.

“E pei o le fa’anaunauta’iga lava o nei galuega ia manuia fanau.

“O le masani lava lea, e ala ona vevesi mai tai nei i aso ta’itasi ia o se mea’ai a tamaiti i le afiafi, ia ae molimoli i se ti koko Samoa.

“Ia e fua lava la le kili i mea’ai a tamaiti a tele ia ua ave i le maketi e fa’atau aua se tupe maua a le aiga.

Na ia fa’ailoa o le taimi lenei e leai se isi o faigaluega i le aiga.

“Ia e leai se isi o fa’atinoina lea tulaga ae pei o lea lava le vaega o lo’o malosi ai le taimi nei,  o le gataifale lava  o lo’o tele ina ola ai le aiga.

“Ia , e pei ona i ai lenei aoauli, ia o le avanoa mai fo’i o le kili , o lea la ua ou sau ai.

“E le fa’apea la ou te sau so’o i aso uma ae  pei e fua lava i a te a’u pe a mana’omia.

“Ia a tele lava ni mea e fai, ia e pei o le aiga o si o’u to’alua e tapatapa ai lava e fesoasoani mai mo sina tupe e fesoasoani mai mo i matou ma le fanau.

“Aua e laiti uma fo’i si a’u fanau ma o lo’o a’o’oga uma fo’i.

O le a sou silafia, o ai se mativa i Samoa?

“Ia o lo’u iloa i ai e leai ma se na tulaga i Samoa, e ala ona mativa le tagata o le nofonofo ae le alu e gaioi e fesoasoani mai ai fo’i le Atua.

“O le agaga fa’afetai o lo’o ua i ai nei, ia e le motu le fuata ulu, o lo’o o tatou va’ai ai lava i aso uma.

“Ia a alualu ua leai se ina’i ia fa’alifu le ulu ma le ki laumoli.

“E le’o tele ni mea fai o le ekalesia ma le nu’u, ma o la’u ia molimau o lo’o sologa lelei lava mea uma...o le fa’amamafa tele fo’i e maua ai le ma’i.

“E pei ona fa’ailoa atu, ia o lea e tau mai o lea e tau su’e atu se i’a e ave ai le popo ia ma se fa’alifu o le afiafi.

“Ae o le olaga ia e faigofie, pe afai e galulue punoa’i.

“E o’o fo’i lava i le fanau i a’oa’oga ia o lo’o fa’atau atu lava nai i’a i lea aso ia ma maua ai nai tupe o lo’o fesoasoani mo le fanau.

“O le agaga moni, ia a le aunoa ma le minoi i le olaga lenei ia e pagatia le taunu’uga.

© Samoa Observer 2016

Developed by Samoa Observer in Apia