O le o’o lava i ai!
O le tolu tausaga talu ai na nofoia ai e le aiga o le tamā i a Siaosi Kalepo le isi pitonu’u o le afio’aga o Siumu.
“O le fa’amoemoega tele lava, ia latalata i fanua o lo’o i ai le ma’umaga aua lava le tausiga o le aiga.
“O le itu e pito sili ona taua, ia aua le atu le mafaufau e amata se ma’umaga... o le o’o lava i ai.
“O le taimi lenei o lo’o sologa lelei le tele o vaega o lo’o i ai si o matou nei aiga, o le itu tau tupe , o mea’ai ia e leai se mea o fa’aletonu.
“O tua latou i’inei ia o le alafa’i lava e galulue i ma’umaga ia ma fai fai atu ai nai isi fe’au o le aso...o le mea pito sili lena ona taua e pei ona o tatou i a i nei vaitau.
“Ia e fou lo matou o’o mai ai ‘i’inei, ia o meamata i nei aso e moni lava ua le tutusa ma aso ua mavae.
“E avatu lava ua leva ona i ai tagata e omai e fa’atau atu, ia o lo matou aiga i lenei vaitau e le’o mamafa lava le fa’atau atu ai o talo. “E pau lava le tulaga o lo’o tele ina fa’amoemoe i ai le ma’umaga e mo mea’ai a le aiga i aso ta’itasi. “Ia a tele lava ua la’u i luma i le fale, ma e le’o i ai se fuafuaga e la’u atu i le maketi, e pau lava le fuafuaga o le ‘ai.
“ Ia o le mafua’aga lava ua mafua ai ona omai i’inei ia fa’afaigofie ai le usu i fa’ato’aga aua o le pitonu’u sa i ai muamua ia e o’o ma i tai i’inei ua la.
“Ia leai atu ai ma se malosi e fai ai se galuega pe a la’a mai ga’uta, ia lea ua faigofie i le taimi lenei ua lava le taimi o le taeao e fai ai le ma’umaga ma e fa’apena fo’i i le afiafi .
“ Sa matou faia fo’i kukama ma maukeni, ae pei e fa’ailoga fesili le palapala i fuala’au ‘aina nei... ia e leai se vaila’au i le taimi lenei o lo’o fa’aoga, o le palapala lava ia o le toto i lalo.
“Ae le fa’apea e sau se isi e fai lau ma’umaga, o le alu lava e gagau le vao ma fai le ma’umaga, ia a to’aga lava i ai, ia e fai ma mea fiafia le ala usu e matamata i ai, ae a leai ia o lona taunu’uga o le mole manavai.