“O so’o se mea o lo’o o tatou taumafai e fai aua le atina’eina o aiga, ekalesia ma le atunu’u, e i ai lava fa’afitauli.” Maupenei  Finau, 48 le matua o le soifua i Vaigaga.

E le’i faigofie le amataina mai o le pisinisi, lavalava su’i, elei, meataulima a Maupenei ma le aiga aepeita’i na ia fa’ailoa  i le Fofoga o Samoa – ‘o le lava a o le onosa’i’.

“O a’u sa ou i tai i le maketi lea na mu ina ua mae’a le mu ia na ou sau ai loa i uta nei...ia o le tele lava fo’i ia o le mau fa’afitauli , ia ae o le uiga lava lena o le soifu’aga  o lo’o i tatou i ai nei, o le malosi lava o le loto ma fa’amoemoe i le Atua.

“Ia e le sologa lelei le alu o fa’atau i aso uma ia o taimi ua lelei o taimi ua faaletonu.

 “O nisi vaiaso e tasi lava le aso o le vaiaso e tasi ai se tagata e sau e fa’atau ma o fa’atau e fa’alagolago i e malaga mai fafo ma asiasi ma i totonu o le atunu’u.

“A o’o ina tele mai turisi, ia o le tauga lelei fo’i na, ia o le fa’amoemoega tele lava o nei mau mea uma ia o le tausiga o aiga ma le galuega a le Atua.

O le fautuaga a Maupenei, ia ola e sogāsogā i taimi uma.

“Ia o si o’u ia lea manatu mo e o lo’o fuafua mo ni nai pisinisi tau amataamata aua aiga, ia onosai...ia aua le fiu gofie.

“E le amata atu loa tali mai, e i ai isi vaiaso e matuā leai lava ni fa’atau, ae e i ai isi aso e tasi le fa’atau  ae oka se faatau.

“E taua lava  le onosa’i, aua a leai se onosa’i ia e le mafai ona maua se mea lelei mo le lumana’i o le aiga.

“E taua e le Atua lou onosa’i, ia o nisi fo’i o taimi lea e omai tagata faatau, e i ai isi tagata na o le lote ae leai se mea e fa’atauina... ia o le lava papale lava ma aua le itaita gofie.

“Aua le leai loa se mea e fa’ataua e tagata, fa’ali’i...ae faamoemoe e le Atua ona  leai ai lava lea o se mea e faigata.

O le taimi lenei o lo’o galulue fa’atasi le aiga o le tinā, mo le gaosiaina o mea taulima ma le elei aua lava se tupe fa’asili e tausia ai le aiga.