‘Aua le ola fa’atusatusa aua e pologa ai

By Vatapuia Maiava 28 September 2016, 12:00AM

“Ua ala ona matitiva le to’atele o tagata o si o tatou atunu’u ua ola fa’atusatusa fua i tu ma aga mai fafo.” Su’a Sopo, 60 le matua o le soifua o Apia.

“Ia o a’u na ou ola ane i totonu o le taulaga i lo’u olaga atoa, ma o le talafatai lava la i Apia le tele o aso o le olaga e pei ona o’o mai a i i le taimi lenei ma le matua o lo’o ua i ai nei.

“Ia ou te ta’u sa’o atu lava ua matua’i tele lava le ‘ese’esega pe ā fua atu a i aso ua alu, sa tele ina faigofie le tele o fuafuaga fai.

“Sa mafai e tupulaga talavou i o matou aso ona o e fai umu o aiga, laulau taumafataga a matua ma faife’au, ia soma e le ‘au uso e, o aso nei, ia e tuli ma le oti.

“Ua le’o toe va’aia tele i le talafatai nei na tu ma aga na masani mai ai ma e leai fo’i se isi e faitio umi...aua ua televavave le alu o aso.

“O la aso ia sa fa’aaoga laulau lalaga mo le laulauina o vaega uma e pei ona masani ai , ia o nei aso ia ua fa’aaoga laulau ‘ai.

“Ia o le mea mautinoa lava ia e leai se isi e faitio ona o le tele o suiga ua i a i le taimi lenei, lea fo’i ua i ai ma le va’aiga i le taulaga ua tele lava atina’e ua i ai.

“O nisi o itu o lo’o fa’ateleina ai le tele o tupe fa’aalu o aiga o le vaega lea tau i mea’ai.

“Ia se’i fai atu lava la’u tala, o matou vaitaimi, ia a maua lava le ulu ma le miti i le aso ma le vaiaso atoa ia e alu ai lava ma le po.

“O se va’aiga i nei vaitau, e tagi pe a fai atu e fa’asoloatoa le ulu ma le miti, ia ona o tatou lava ua tatou apa’apa i suiga nei o le olaga.

“E le’o fa’atauanauina fo’i nei vaega uma, o le mea sa’o lava ia, o tatou lava, o lo’o fua ulu, fa’atonu le fanau i vaega nei e tatau ona fai.

“E pei ona i ai fe’au i totonu o aiga, ma itu lelei uma aua lo latou ola tuputupu a’e, a lelei lava ona fa’atonutonu atu i le taimi lenei ia o lena lava.

“Soia le tagi sa i mea e le o’o ai le malosi, o le galulue fa’atasi e fo’ia le tele o fa’afitauli...o le lelei fo’i o le si’itia ai o  le tamaoaiga i le taimi lenei, o le a fesoasoani tele mo le manuia o a taeao.

By Vatapuia Maiava 28 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>