MOLIMAU: KOKO TUGAGA LEAUMOANA WINTERSTEIN

552 Hits

His Highness Tui Atua Tupua Tamasese Ta’isi Efi Head of State of Samoa  Remarks at Dinner for the Commonwealth Secretary  General Rt. Hon. Patricia Scotland QC at Tuaefu

His Highness Tui Atua Tupua Tamasese Ta’isi Efi Head of State of Samoa Remarks at Dinner for the Commonwealth Secretary General Rt. Hon. Patricia Scotland QC at Tuaefu

(Tui Atua Tupua Tamasese Ta’isi Efi, malumalu EFKS Vaiala, 23 Aukuso 2016)

O Koko o le tama’ita’i Safune.

E faapa’i mālū atu iā Tofaeono, Asi ma le Patu, i La’ua na Ta’i ma Fuata, ona o lea o le a fai tala o Safune i le malumalu o Vaiala.

O le igoa sa’o o le tama’ita’i, o Folototomeaoona, ae ou te faaigoaina o Koko, ona o lona igoa lea sa faaigoa ai e lo matou aiga.

E te iloa iseā o le tamāita’i Safune ? Ona e ta’u loa Safune po o tagata Safune, po o se umusaga poo se siva po o se sailiga tupe tau Safune, e liu foliga; e sanisani, e tau fiafia, e fia iloa ma fia talanoa.

E te iloa fo’i i ā latou lauga ma a latou upufai, e pei o lenei. A o Faipule le toeaina o Tugaga Isaaka, po o le ā lava le mataupu, po o ala-gālue po o a’oga po o falema’i po o le vai, e i’u lava ina ta’ita’i mai le faa’upuga i le malo o Tagaloa Funefe’ai, i Taua sa fai i Ătua faapea ai ma Safata. E faapea fo’i i aso la, a oo loa ina inu ‘ava ia Safune, e lē umi lava ae sula mai viiga o Funefe’ai: Fune, Fune i ala !

E oo fo’i i ē na faafailele e tagata Safune, e safea ai i le lanu faa-Safune. Sa matou ola faatasi mai ma Koko ma ōna uso ma ōna tuagane i Tuaefu. O le molimau o ia mea, o a’u faamatalaga e fai i le mafuaaga o le muagagana “ E leai se gaumata’u, na o le Gaualofa”, le mafuaaga o le igoa o le ‘Aumaga a Safune, “Tama o le Tuaefu,” le Sāvali a Safune, o “Utufaasili,” “Tologataua.” Ta’ua e toeaiina, e te iloa gofie le mea e mānu Safune, e te iloa i upu ma tāga ma foliga.

Ona ua nofotane Malienafau iā Feleti Misipita, ona alu lea o Koko ua nofo i le aiga lea. Mulimuli ane ua faaipoipo ma Feleti Winterstein, ona i’u lea ina togia e la te vaaia le faleoloa o Nelesoni i Safune. O se faaola totoga lea e lē gata i le kamupani ae faapea ai ma le aiga i Safune. Mulimuli ane na faamatai ia Feleti i le suafa Leaumoana o le aiga o Koko i Fatuvalu. Ma, talu ai le tausaafia o Koko ma Leaumoana, na i’u ina pale ai Leaumoana Feleti, i le Faipule o le Itumalo.

O se tasi lenei o molimau ola o le agaga fia fai aiga lelei o Koko. Ona ua talosaga ia Tugaga Maulalo(lona tuagane) a e ā pe a malie, ae tuu atu le tofi Faipule  na te tau’avea, e le’i faigofie.

Aua o le tausaafia lea na pale ai i le Faipule ia Leaumoana, e mai le la tausaafia i le tautua a Koko ma Leaumoana i le nuu, i le Ekalesia ma le itumalo. ‘Ae na i’u ina manumalo lona alofa i lona tuagane, le matai o le aiga, o Tugaga Maulalo.  E māfua ona o lona igoa o Folototomeaoona  auā o le mau a Keriso, e te maua le manumalo i le Satauro.

O le isi molimau ola o le tofa ma le fai aiga lelei o Koko; ina ua maliu ia Tugaga Maulalo ona alo lea o le aiga e filifili se isi o le a sui tulaga. Ae fai mai le tuualalo a Koko; “Taisi, aumai se isi o le fanau a Lote e tausia le aiga. E lē vale le faamanuiaga a le Atua i le fanau a Lote auā ua iloga le latou tautua i le aiga o Sa Tugaga, le nuu ma le Ekalesia.”

Ia, na i’u lava ina fai le mea na fai mai ai Koko. Pe a na o se isi tinā, e ‘ave le faamuamua i lana fanau. 

Ou te molimau atu, ua taunuu le upu, “Ua tau le ‘auga o ‘aute” ona o Tugaga Sani, o se tagata loto maualalo, faamaoni, fai aiga lelei. Ua sa’o ai ā Koko, e lē vale le faamanuiaga o le tautua lelei.  O la’u tala e faapitoa i le tino o Koko, ae lē lafo’esea ai le sao ma le agavaa o Tugaga Tevesi ma Tugaga Foni.

Ae o le molimau sili o le olaga o Koko ma Leaumoana Feleti Winterstein, o le Faamanuiaga o le la fanau. Manuia a’oga, manuia galuega - e oo fo’ii fanau a fanau, e taunuu ai lava le upu, “e soo le fau ma le fau.”

E oo nei lava ina ua uma le ola o Koko, o se mea faagaeetia i le mafaufau ma le agaga, o le vaai i le tausiga ma le taupata i le tinā iā Koko. Po o Niu Sila, poo Ausetalia, po o Samoa nei,e mamalu lava Tagaloa Funefe’ai i lona malo. E leai se mamalu e sili i lo le faaa’ea’e ma le lagolagosua a le fanau ua faaosofia le agaga faafetai ona o le Tinā fai fanau ma fai aiga lelei.

Atonu e sa’o lava sa’afiafiaga a si toeaina o Tugaga Isaaka. Afai o malu mātua i le tausiga a le fanau, o loo malu pea le tofi o le aiga Sa Tagaloa.

Koko, e te alu ma le malie ma le faamanuiaga a lou aiga mo oe ma ē na tutupu mai ia te oe.  Manuia lau malaga!

Soifua

© Samoa Observer 2016

Developed by Samoa Observer in Apia