LAUGA - II. “O Tulafono o le Malo”

Tusia Petaia Setu ,

427 Hits

Soo se malo lava e tatau ona iai ni ona tulafono ma faiga faavae e taitaiina ma faatonuina ai ana pulega. E faapena foi i le Malo o le lagi. Ua faailoa mai foi e Iesu e le i sau e tatala le tulafono, a ia faataunuuina (MH.5:17).

E le i faaleaogaina e Iesu le tulafono anamua a Mose ma le au perofeta, ae sa ia tausia ma faaauauina e faapei o se galuega e le i mae’a. O lona afio mai, “ia faataunuuina”. O lona uiga, o Iesu Keriso, o le taunuuga ia o le tulafono. (Roma.10:4)

O le lauga i luga o le mauga, ua fofola mai ai e Iesu le tulafono o Lona Malo (Mata.5,6,7). O le a’a o le tulafono e taitaiina ai oe ma a’u i le Malo o le lagi, o le Amio. (Mata.5:48).

Ia soifua ma tatou ola i le amio Atua. o le amio Atua o le loto paia lea ma le amio paia. O le loto paia, o le matuā liliu lea o le loto e le Agaga Paia, ma faaolaina ai nai le agasala ma ua fai ai ia alofa atu pea i le Atua. O le amio paia, o le amio e matuā tatau i le Atua atoa foi ma tagata e tusa ma le Afioga Paia a le Atua (1 Peteru 1:15,16).

O le ola faapaiaina, o tamāliiaga faaalia ia o le amio ua liua ma ua tataiina e le Agaga o le Atua. o foliga vaaia ia o le tausaafia i la le agaga. O le olaga ua tapui mo le Alii. E le toe pisia i vaivaiga ma tuinanauga leaga o lenei olaga. O tulafono o le Malo o le Lagi poo le Malo e Faavavau ‘e mo tagata uma lava. O tulafono o loo fua faatatau mo lou lelei ma ou manuia o aso fai soo o le olaga.

E faavae i le alofa. O le alofa na te limataitaiina le amio ia paia ma ia lelei. Ia pulea ma tausaafia. Ia viia ma ta’uleleia. Ia faaeaina ma faaolaina (Mata.7.24.25). Ua tatou vaai ma faalogo iai o ni taiala faigofie, ae le faigofie. Fai mai Iesu a le mafai ona ‘e faafitia e ‘oe oe lava, e le mafai foi la ona e savali i tulagā aao o le Alii (Mare.8:34).

Samoa, faitau lelei i mataupu uma nei e tolu (Mtt.5,6,7) e faafouina ai ou lagona i le matagofie o taiala ma aoaoaga a Iesu. O lenei ua silia ma le 2000 tausaga ae leai lava se iotā e tasi o mamalu, ma le silisili ese, ma le mana o lenei Lauga i luga o le Mauga o aveesea.

O aoaoga uma o lenei lauga o loo tu matietie i luga o aoaoga uma a tagata soifua o le lalolagi. Ioe, o le taiala mo tagata uma ma augātupulaga uma. Faamasani ai lou olaga, ma a’oa’o ai lau fanau. Faamaopoopo ai lou aiga, ma fai ai oe ma molimau.

Samoa, ua tumu lo tatou atunuu ma le ekalesia i mau tulafono e fau mai i faiai o tagata. E fua faatatau i le faamălieina o manaoga o ō tatou taitai ma le au matutua.

Ua le afaina poo fea e tafefea iai le atunuu ma tagata lotu a ia ola lelei le ‘au faitulafono. Silasila outou i Tulafono o le Malo o le Atua, o tulafono lava ia sa tuuina mai e Mose ma le au perofeta i le amataga. E faa-tasi ona Iloilo (Mata.22:37-40). Na ona faapuupuu lava e Iesu, Alofa i le Atua, Alofa i lou tuaoi, uma. ‘A ua faafia ona iloilo ma taufaatulaga a tatou mea ina ia lilo ai oe? Ua uma ona maliu ma toe soifua mai Iesu. Ua afio a’e i le lagi o loo tatou faatalia lona toe Afio mai, a o lea lava e fe

lotea’i solo a tatou tulafono. Fai mai le tasi polofesa, ‘ a law maker is a law breaker ’. O tulafono e fau i mafaufauga o le tagata. Se i vaai ane la ‘ia poo e iai i le li’o lea. Pe ana ua taitaiina tatou i Tulafono o loo fofola e Iesu i lana lauga, po ua suia atoa ai o tatou olaga mai le pouliuli i le malamalama; po ua faamaloloina ai o tatou manu’a masani; po ua femalamalamaa’i ai vaega faaupufai ma tagata lautele; po ua fefaaleleia’i ai malo tetele o le lalolagi; po ua ola malamalama tagata uma i le faaolataga a le Atua. 

Uso e, poo e iloa o Keriso o le Atoaga lea o le tulafono? Fai mai Paulo afai o ia Keriso se tasi, o le tagata fou ia; ua mavae mea tuai, faauta ua faafouina mea uma. (2 Kori.5:17) Poo e iloa o le Atua o le alofa lava ia, o lona malo e faavae i le alofa, o ona tulafono e fausia i le alofa? O le alofa mo oe. O le alofa i tagata uma, o lanu ma gagana eseese uma lava. Ou te toe fai atu Samoa, o le lauga lenei i luga o le mauga, o le lauga mo augātupulaga uma. E aooga ai tagata uma. O loo taoto ai le auivi o le faaolaina o oe ma lou aiga. O loo ua mamanuina ai e Iesu ata moni e fai ma taiala o le amio i faamanuiaga o le malo.

Silasila lelei Samoa i le lauga a lo tatou Alii, o lana folasaga o loo fa’ama’alo mai ai faamanuiaga o le amio ua finagalo ai le Alii (Mata.5:3-12). O tulafano ia o le Malo. Ua faailo mai i le amataga le amio e tatau ma tagata o le malo. E faaiu le lauga i le igaga to o le amio solia. Le amio ua logoleleia i luma o le Atua. Ua mălie iai le finagalo o le Atua.

Auā ua faalogo lelei ma usitaia tulafono ma faiga faavae o le malo. Fai mai Iesu, o le tagata poto (Mata.7:24) E le măluelue i faaosoosoga. E le avagagofie i manao o le lalolagi. E le limataitaiina i le poto o tagata. Fai mai Tavita, “ae mafaufau o ia i le tulafono a Ieova i le ao ma le po” (Salmo.1:2).

O loo faamatala foi e le fai Salamo faamanuiaga o le amio ua pulea ma taitaiina e le Agaga o le Atua. O le tagata ua fia mafuta i le Alii, na te iloa le alofa o le Atua ia te ia. E naunau lona loto i ala o le Alii ma ana tulafono. E vaai ona mata i le taui mai le Alii. E inu i faamanuiaga o le malo.

Samoa, o tulafono o le malo o loo aumai i le lauga a Iesu, o tulafono o le alofa tunoa. O tulafono mo lou saolotoga ma le faaolaina o tagata uma. Ua maioio ona faamanino lelei e Iesu le ituaiga olaga ma amioga e saogalemu ma saoloto ai oe ma a’u. O mea e tatau ona faia ma mea ua le tatau ona faia. O taimi tatau ma taimi e le talafeagai.

O mea e lelei ma mea ua le lelei. O fea tonu la e tatau ona fafau agai iai lou olaga? Manatua ua le masino le mau tulafono ua saisaitia ai le tagata soifua! Ana iai se isi tulafono i tala atu o Iesu Keriso e mafai ona faaolaina ai oe i le malo e faavavau, po ua le afio mai Iesu i lo tatou lalolagi. Pe ana mafai foi e le mau tulafono a lo tatou malo ma le ekalesia ona faasaoina i tatou i le ola atali po ua le maliu fua Keriso.

Ou te toe fai atu pea ma saga fai atu pea ia e faitau lelei i aso uma i le lauga a Iesu i luga o le Mauga. E pulea ai lou loto i taimi uma. E te galue saoloto ai ma le fiafia. E te manumalo ai i ou faafitauli. E faatonuina ai lou olaga o aso uma. E malamalama ai ou ala ma tonu ai au filifiliga fai. E mafanafana ai mafutaga ma fiafia ai aiga.

Samoa kerisiano e, po ua e loto ia avea oe ma tagatanuu o le malo o le Atua? po ua fia fai oe ma suli tumau o le malo e faavavau? O le faamanatu, o Iesu Keriso, o le Atoatoa lea o le tulafono a le Atua. O le Fua lea e faatatau iai le amio a le tagata o le malo o le lagi. A ‘e maua Keriso e pule i lou olaga, Oka, o le a la le isi mana’o? (Filipi 3:7)

Amene 

7737063/7783782

E-mail: petaiasetu@gmail.com

 

© Samoa Observer 2016

Developed by Samoa Observer in Apia