O LA’U TALA FO’I

92 Hits

1. Matauina i Tala Fou fai mai ua otegia e le Palemia Faumuina-ma o lea faaupuga e faasino i le Palemia o Tuilaepa Sa’ilele Malielegaoi ma Faumuina Tiatia Liuga! Afai la e moni lea faaupuga-o lona uiga-‘ua tala le va o le Palemia ma lana Tama”! Ae ui o lea-o le a le pogai ua otegia ai le Palemia lea Faipule?

O lona uiga-e i ai se paoa o le Palemia na te otegia ai sui mamalu o itumalo a’o faafogafoga mai o latou itumalo? I se tasi faaupuga-‘e mafai lea mea i le aganuu a Samoa- o le otegia e le tasi matai le isi matai? O le isi fesili-‘e i ai se mea faapena na tupu- talu ona tuto’atasi Samoa mai le 1962-o le otegia e le tasi faipule o le tasi itumalo- le faipule o le isi itumalo? Afai la ua otegia e le isi faipule le faipule o le isi itumalo-o le a le uiga o lea mea?

O lona uiga la-ua pule foi le Palemia i le itumalo o Faimuina? E mafua ona tutupu nei mea- ona ua malosi tele le paoa-ua soli ai faavae-popo o nuu ma itumalo! Afai la e na o le atalii moni o le tagata na te otegia poo lona ‘auaiga-o le a le pogai o lea mea? Ua silasila la i le mata’utia o nei mea o faiga-vaega faa-upufai?

E leai lava se mea e ese ai ma le otegia e le Faia’oga o lana Vasega! O le a la le mea ua otegia ai Faumuina-ae sa lē faapea ona fai i le taimi muamua? E faapefea la pe a tali mai Faumuina? O manatua faiga pi’opi’o a le faigamalo lea na maumau ai le faitau miliona ma miliona o tupe a le atunuu?O le a la le mea ua toe otegia ai i le taimi nei-ae sa le otegia i le taimi na tutupu ai nei faaletonu ma le anoano o tupe a le atunuu ua maumau ai? O le a sou taofi? 

2. Matauina foi i Tala Fou se ulutala fai mai –“Ua faasa’o e le Taitaifono le faauigaina sese o le aganuu poo faiga faale-atanuu-ma o le faaaliga lea a le Taitaifono a Ekalesia Soofaatasi-o le Tiakono o Kasiano Leaupepe-ina ua tula’i mai ni manatu mai le Asosi o Faafine a Samoa-ina ia aloa’ia e le atunuu a latou aia tatau-ma o lea manatu na faaalia i se talanoaga ma le Samoa Observer.

O le finagalo faaalia la o Kasiano Leaupepe-‘o faafine o tagata soifua na fai e le Atua ma e tatau ona aloa’ia….ae na ia teena le faapea o Faafine-o se vaega lea o le aganuu a Samoa…!

Ia atonu ua lagalagā so’o lava lea mataupu i lea taimi ma lea taimi-ae o le mea lea ua lotelotea soo ai faafine-ona o latou uiga faa-teine poo ua fia avea ma teine-ae le o ni teine-o i latou o tama tane na fai e le Atua-ae foliga mai e mumusu ai- e le manana’o e avea ma tamatane e pei ona faia ai e le Atua. Ia afai la e le’i faia e le Atua ina ia amio faa-teine-ua tatau la ma talafeagai ai le finagalo o le Tiakono-talu ai-“e na o le lua lava ituaiga o tagata na fai e le Atua Soifua.

O le a lea? O le tali-‘o le tane poo le tama ma le teine-ae leai se mea e igoa –o se tama ua fia teine! O le a sou taofi?

3. Matauina foi i Tala Fou se isi ulutala fai mai-“Ua silasila se Minisita i maketi i fafo-ma o lea ulutala e faasino i se fuafuaga a le Minisita o Faatoaga ma Faigafaiva.

E tusa ai la ma tala fou-fai mai o lea folafolaga na fai e le Minisita i totonu o le Palemene! O le faamoemoe atoa la o le Minisita- fai mai ia manuia ai le Aufaifaatoaga ma le Aufaifaiva uma lava! Ia-atonu o le a manino atili ma tino mai lea fuafuaga i se aso o i luma! E mafua ona- afai o lea faatoa uma ona tufatufa fatu koko, fatu kope ma isi lava mea i le ‘aufaifaatoaga-ma talosia ua uma ona totŏ!

Ae a tatou toe manatu i tua-“o le Fa’i, Talo, Popo, Koko ma isi lava mea-sa auina atu uma i fafo-ma sa tatou vaai uma lava i vaa tetele e pei o le Tofua ma le Matua-o o mai ma tuutaula mai le Taulaga-ae la’u uma atu i ai nei oloa I-i lanisi e toso e vaa-afi! O le pogai lena sa leai ai se mativa i totonu o le atunuu!

Afai la ua toe folafola mai e le Minisita lea tulaga-ia talosia o le a tino mai. Ae ia manatua foi Samoa-o le tele lava o fuafuaga a le Malo-e peiseai o le mea taua lava o le faailoa mai i le atunuu-ona taatia ai lava lea. O lona uiga la-e tusa ai ma aso nei- o le mea taua lava o le ta’u mai i le atunuu –ona gata ai lava lea! O le a sou taofi?

© Samoa Observer 2016

Developed by Samoa Observer in Apia