“Mo’omia le fa’aleleia o a matou auala”- Salā Tauiliili

Tusia Seia Soloi ma Aruna Lolani ,

70 Hits

Alofagia matou auala- Sala Tautiaga Tauiliili mai Leauva’a.

Alofagia matou auala- Sala Tautiaga Tauiliili mai Leauva’a.

Ua atoa ai nei ii le 2 tausaga o fa’atagisia pea e le afio’aga o Leauva’a lo latou Sui Faipule i le Palemene ina ia alofagia le fa’aleleia o le auala e pei ona vaaia le tele o le fa’aletonu.

O le tama ia Sala Tautiaga Tauiliili, 70-tausaga le matua ua faaalia lona atugaluga i lea tulaga ona ua aafia ai le tele o aiga o le afioaga

“Ua 5 tausaga talu ona tupu mai le leaga o le matou auala nei ma ua va’aia ai le fa’ateteleina ai o lea tulaga ma ua o’o lava i le fa’asi’usi’uga o le matou nuu” o lana tala mai lea i le Fofoga o Samoa.

“Ta te va’ai alofa lava i nai aiga e iai ta’avale aua e leaga ai foi ma sina fasi mea lava e leaga e taugata mafua ma i’i le leaga o le auala.”

“O nisi o taimi e le o’o i uta le o ai o pasi ma ta’avale laiti e tu’u lava tagata i le mea e gata mai ai le lelei o le auala ona savavali lea o tagata agai i latou aiga.”

“Ma ua moomia ai lava le faia fa’amae’amae’a lelei o ia auala mo le feoa’iga a le mamalu o le atunu’u aemaise lava le fanau aoga ma i latou o lo’o faigaluega.”

Salā Tauiliili
Salā Tauiliili

“O nisi taimi ua ta augata e savali mai i’i ona o le leaga o le auala atonu e maua mai lava se tali i se taimi vave lava mo si o matou nu’u.”

I le mau a le tama ua 2 ai nei ii tausaga o ave le tusi talosaga a le afioaga i lo latou Sui Faipule aua le auala ae o’o mai lava i le taimi nei e lei faia lava se mea se tasi.

“O tulaga fa’apenei e pei o auala, suavai ma le auala o mea pito i taua ia i le ola a’e ai o le tagata soifua” o lana tala mai lea i le Fofoga o Samoa.

“Aua o le mea e lelei mo Apia e lelei foi mo nu’u i tua e pei o matou ma e tatau foi ona faia ia tutusa uma lava nuu ma afioaga.”

O lona talitonuga ina ia vave maua se tali mo le latou auala ina nei ua tuai aemaise ai le fesuisuia’i mai pea o le tau.

“O le talosaga lena i le Malo ina ia alofagia ma talia le manaoga ua tuuina atu mo le faaleleia o a matou auala.”

© Samoa Observer 2016

Developed by Samoa Observer in Apia