Fa’atauina o koko aua se seleni

Tusia Aruna Lolani ma Seia Soloi ,

84 Hits

FA'ATAU KOKO SAMOA: Peka Moli mai Tuana’i ma Malie.

FA'ATAU KOKO SAMOA: Peka Moli mai Tuana’i ma Malie.

A avea oe ma tina, e tatau lava ona e mafaufau fa’alua i tonu ma fa'aiuga e te faia.

Aua o fa’ai’uga uma e te faia, e le na o oe e fa’asaga iai, e fa’asaga fo’i i lau fanau.

O le manatu fa’alia lea a se tina 64 le matua o lona soifua, Peka Moli mai Tuana’i ma Malie.

Sa maua atu e le Fofoga o Samoa Peka ao savali e fa’atau lana ato koko Samoa i Leauva’a, e le gata la ua afu uma o ia mai le vevela o le la, ae o le mamao o le ala sa savali mai ai.

“Ou te fa’atau koko mo se tupe mo lo’u fanau,” o lana tala lea.

“E lima a’u ipu koko ia e iai, ta’i $5 le koko e tasi ae lea lava e fa’asavali aua e leai se mea o taulia."

“Lea ea le mea o le a fai? E faigaluega se tasi o alo ae e le lava a le fa’asoa mo aso uma."

Sa ta’ua e Peka na latou omai fa’atasi ma lana fanau e fa’atau koko ae ua latou o i ala eseese ina ia vave ai fo’i ona taulia koko Samoa.

“E tele a ona matou mana’omia se fesoasoani, pei la o le taimi nei e le ola se matou eletise ma e leai fo’i se matou paipa."

“E tele a la ona fai a matou mea’ai e le’i po talu ai le leai o se eletise."

“E iai le matou tane vai e sefe ai a matou vai, o le mea na a timuga matou te fa’afetai lava aua e faigofie ai ona maua se matou suavai."

“Ae a fa’apea o aso la, e sefe lava e vai o le tane ae fa’aoga le vaitafe a le nu’u e ta’e’ele ai ma fa’aoga mo isi mea."

Sa ia fa’apea mai fo’i, “o la’u tama tama lea e faigaluega i le A.S.T. e iai ona aso malolo ae peita’i, e faigaluega lava o ia aua o lo’o ia silafia lea tulaga o le matou aiga ma matou te mana’omia fo’i le tupe.”

O Peka e to’afitu lana fanau ae tasi lava lana tama teine ma o le mafu’aga lea e galue malosi ai o ia i le faiga ma le fa’atauina o le koko.

“Sa matou nonofo i le aiga o le tama o le aiga ae ua matou omai iinei ona ua maliu o ia i le tausaga ua te’a ma ua tatou iloa uma lava, e te sa’oloto a oe ia i lou aiga.

“E to’atele lava la le matou aiga ma o le taimi nei o lo’o matou fa’aofiofi uma i totonu o le matou fale.

“E le o toe faigofie le olaga ma o le mea sa’o a ia, ua matou mana’omia lava se fesoasoani aemaise lava i le tulaga o le vai ma le leai o se eletise.”

© Samoa Observer 2016

Developed by Samoa Observer in Apia