Ua faalelei le Ao o le Malo ma Lufilufi

By Deidre Fanene 28 May 2016, 12:00AM

O ananafi le aso o le faafetai mo Lana Afioga Mamalu i le Ao o le Malo, oTui Atua Tupua Tamasese Efi ma lona nuu-o Lufilufi. O se eseesega ua fitu tausaga e fua mai tua i le 2010 i le va o le Ao o le Malo, ma le nuu o lea lava ua mafai ona toe teuteu.

O Aokuso 2010, na faate’a ai Tui Atua Tupua Tamasese Efi mai Lufilufi le nuu lea e pulea le suafa maualuga o le Tui Atua. 

I lea taimi, fai mai le fofoga o le nuu o Fe’esago Lopi o le faaiuga ina ia faate’a o ia mai Lufilufi na afua mai se fono a le nuu e uiga i le fausia o se vaega e faamalumalu ai e soso’o ma le Maota o le Ao o le Malo  totonu o le nuu.

Fai mai ta’ita’i o le Nuu e le’i logoina e le Ao o le Malo le nuu e uiga i le fausia o lea nofoaga ma ua le fiafia ona ua le tausisia faiga masani faale-aganuu

i lea taimi, sa faailoa mai i le Nusipepa o le Samoa Observer e Feesaga-ua le toe aloa’ia e Lufilufi le Ao o le Malo na te umia le suafa Tui Atua. 

E tusa ai ma le faaiuga a le nuu, i totonu o se tusi i le Resitala o le Faamasinoga o Fanua ma Suafa, sa faamata’u ai le Tui Atua ina ia faamavae pe afai e le mafai ona fo’ia le feeseeseaiga ma le nuu ma le aiga i se faiga to’afilemu. 

Sa na tapā foi se Komisi Su’esu’e ae sa mulimuli ane ona toe faaui i tua le talosaga.    Ae o ananafi, e to’atele sui o le nuu na auai e molimauina le sauniga o le faaleleiga lea na amata i se Ava. 

Saunoa Lana Afioga Tui Atua Tupua Tamasese Efi na te faafetaia le Atua ona ua maua le aso mo ia e toe faalelei ai ma lona nuu.. “Ua ‘ou matua fiafia lava ona ua mafai ona ‘ou toe fo’I mai ma maua le latou lagolago mo a’u.” o le tuleiga lea a Tui Atua. 

O lana saunoaga e leai se mea e sili ona mana’o i ai i lo le lagolago atoa a lona nuu a’o ia nofoia le nofoa e avea ai ma Ao o le Malo o Samoa “O soo se matai lava na te manaomia lona aiga ma le lagolago a le nuu e ta’iala i lana faiga-malaga i luma,” o lana saunoaga lea. 

O se tasi o matai o le nuu fai mai o le a latou faagaloina le mea na tupu i aso ua mavae.

 “O le mea na tupu i aso ua alu- e nofo ai pea i le taimi ua alu, ona o lenei taeao o se mafutaga fiafia lea i le va o Lufilufi ma le Tui Atua.” Na faai’u lea aso i loifofoga maligi o le fiafia ma le olioli i le va o le Tui Atua ma lona nuu ina ua toe tasi le nuu atoa. 

 “Ua uma ona maua le maliega o le nuu ma e leai se isi mea matou te toe faailoa atu e uiga i lea mataupu –talu ai-o lea ua uma ona fo’ia,” o le faaaliga lea a se tasi o matai. 

By Deidre Fanene 28 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>