O le saogalemu o Taumafa ua tapunia ai se faleoloa

By Ilia L Likou 28 May 2016, 12:00AM

O le vaiaso talu ai na tapunia ai se pisinisi a se tagata o le atunuu i Apia ona o se mataupu tau le saogalemu o taumafa mo tagata lautele.

O se tagata faatau o le atunuu mai Apia, o Taute’e Le’i’o fai mai o se mea lelei le suesueina e le Matagaluega o le Soifua Maloloina ma asiasia faleoloa ma faleoloa tetele i totonu o Samoa.

O a’u o se tasi o tagata faatau o le atunuu i lea faleoloa, ma ua ‘ou mautinoa e le na o i latou le fale fai falaoa e tatau ona silasila i ai le Matagaluega. E tatau ona latou iloa e leai se tasi e mafai ona lafi e faavavau, e tumau pea ona i ai le taimi e maua ai oe pe afai o e tuuina atu i au tagata faatau taumafa e le soifua maloloina ma e le mamā e taumamafa ai. 

“O pisinisi uma, fale’aiga, e tatau ona galulue faatasi mo le saogalemu o lo tatou atunuu aemaise ai lava pe a pa’ia le itu tau taumafa. O lenei mataupu o le a avea foi ma lapata’iga i pisinisi uma o i totonu o le atunuu, talu ai-ou te talitonu e le fou lenei mataupu

 “E anoano taumafa e le soifua maloloina ma oloa na lipotia i le Matagaluega i aso uma ma ua tatou vaaia foi-o nisi mataupu sa faaalia i luga o le televise ma i totonu o nusipepa. Sa musu le e ona le faleoloa e toe tautala i lea mataupu ina ua fesiligia o ia e uiga i lea mataupu.

“Leai! O loo lelei le fale falaoa ma e lelei fale falaoa iinei,” o lana finauga lea. “Ua na o ni nai loi lava i luga o le fola lea na vaaia e le alii mai le Matagaluega i le mea na matou teu ai mea’ai….o loo mamā mea uma i le taimi nei, ma e na o le tasi lava le aso na tapunia ai lo matou faleoloa.

“Matou te vaaia lelei mea uma mo le saogalemu o tagata lautele. O lea alii o le Matagaluega o le Soifua Maloloina na musu e faailoa lona suafa, na ia faamaonia e faapea na tuuina atu e le Matagaluea se tusi e tusa ai ma le “saogalemu o taumafa” i lea pisinisi. 

 “Na fautuaina i latou e le gata i le saogalemu o taumafa ae faapea foi le tulaga mamā o le faleoloa atoa,”o le faaaliga lea a lea alii ofisa..Na toe tatala lea faleoloa ananafi talu mai ona tapuni mo ni nai aso ua mavae.

I totonu o se lipoti talu ai ia Me o le tausaga nei, na faailoa ai e le Minisita o le Soifua Maloloina o Tuitama Dr. Leao Talalelei Tuitama –le fuafuaga a le Matagaluega ina ia toe faamalosia le mafai e Samoa ona mautinoa le saogalemu ma le lelei o ana oloa tau taumafa.

“O lea matou te talanoa atu e uiga i le faia o se gaoioiga mo le lumana’i ina ia mautinoa ai o loo faaauau pea ona avanoa Samoa i taumafa saogalemu talafeagai ai i totonu o le atunuu ma ia mautinoa i lea lava taimi o loo faaauau pea e i latou e faagaoioia pisinisi tau tamafa-ona tuuina atu taumafa lelei ma le saogalemu mo maketi i totonu o le atunuu ma atunuu mamao, o lana faaaliga lea. 

Ina ia ‘ausia la lenei tulaga-o lea ua matou faaaulufaleina atu se Tulafono o Taumafa 2015 i ona po nei, o lea ua matou faamae’aina ni tulafono faatonutonu fou tau le saogalemu ma le lelei o taumafa faatasi ai ma se faavae malosi faa-saienesi-ma ua matou ati a’e ni ta’iala mo taumafa e toe tapā ai le malo ma i latou e faagaoioia pisinisi.

O le Aso Gafua 2 o Me 2016, na fautuaina ai e le Faatonu Aoao mo le Soifua Maloloina, o Leausa Toleafoa Dr. Take Naseri, se vaega soofaatasi a le malo ma pisinisi e galuea’ina taumafa e faapea “O le galueaina o Taumafa ua fai faa-pisinisi ma o lona faatauina atu ma le tufatufaina ua so’o ai le lalolagi. 

“O lona taunuuga, o le eseese ma le lelei o taumafa e avanoa atu i tagata o le lalolagi, e aofia ai ma o tatou tagata Samoa ua matua faateleina lava.” 

Fai mai Dr Naseri o le noataga tau le puipuia o le soifua maloloina o tagata ma le saogalemu o le vaaiga autu lea o le fuafuaga a le Matagaluega ina ia toe faamalosia atili le malosi o Samoa e mautinoa ai le saogalemu ma le tulaga lelei o ana oloa tau taumafa ae o loo faamamafaina ai foi e faapea o se sootaga felagolagoma’i i le va o alii ofisa tau le soifua maloloina, ma isi lava sui sooupu a le malo ma le alamanuia e matua taua foi mo le tufatufaina atu o le alamanuia tau taumafa i le tuputupu a’e o le tamaoaiga o Samoa ma lona manuia lautele.  

By Ilia L Likou 28 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>