Ua toe mana’omia foi se Pagota

Tusia Deidre Fanene ma Faaliliu e Seagaitumua Tupuola ,

171 Hits

Lauititi Tualima

Lauititi Tualima

Lapata’iga. O le pagota uiga ese i le sola so’o, o Lauitiiti Tualima, ua toe sola ese foi mai le falepuipui i Tafaigata ma o lea ua lapata’ina ai le atunuu lautele ina ia matua mataala.

O Tualima o se pagota na faasalaina i le toso teine ma o se tagata gaoi e ese ai mai isi lava faasalaga tau solitulafono. Na faamaonia e le Sui Sooupu o le Pulega mo Falepuipui ma Auaunaga Tau le Toe Fuataina (P.C.S.A), O Sagaga Galu Frost, le tulaga o Tualima ananafi, aua ua lua aso talu ona sola ese o ia.

Ina ua fesiligia pe aisea ua lua ai aso ae o lea ua faatoa faailoa atu e le Pulega i tagata lautele o le atunuu, fai mai a ia: “Ia-na faailoa mai ia i matou i le Aso Sa e faapea o ia lea o (Tualima) sa i ai pea i totonu o le falepuipui ma e le’i sola ese o ia. “Ae ui o lea, o ananafi na faatoa faailoa mai ai ia te a’u e faapea e le’i toe fo’i ane lava Tualima ma o lea na matou faafesootai ai loa le TV1 ma tuuina atu loa le faasilasilaga.”

Na lipotia e faapea o Tualima sa loka i totonu o se sela lea e faaigoaina o le Pa-sima. Ina ua fesiligia pe na faapefea ona sola ese o ia mai lea nofoaga, sa tuua’ia e Sagaga leoleo.

Ona pau la’u faamatalaga e faapea o leoleo ia sa tiute ua matua faatamala lava,” o le faaaliga lea a Sagaga.

“O le mea na ta’u mai ia te a’u e faapea na valaau mai Tualima mo se fesoasoani ma o lea na o atu ai loa leoleo i lona potu ma tatala le faitoto’a se’i vaai pe o le a le mea ua tupu. O le taimi lena na mafai ai e Tualima ona tulei ese i latou ma tamo’e ese.”

“O lona tau faasese na alaga mai ai mo se fesoasoani ae o lana faiga lena e solo ese ai.”Na ta’utino e Sagaga e faapea o le mea na tupu e le o atagia ai se tulaga lelei o le Pulega. “O loo fai la matou suesuega ia i latou sa tiute,” o lana faaaliga lea.

“Ou te manato e una’ia tagata lautele ina ia faamolemole ma faafesoota’i mai i matou pe a outou vaaia Lauitiiti ae ia ‘aua nei outou faalatalata ia te ia ona o ia o se tagata mata’utia.”

O le masina talu ai, na tuuina atu ai ia Tualima le isi 10 tausaga e faaopoopo i lona faasalaga mo le solitulafono so’o a’o sola ese mo le toetoe lava tolu masina. Na molia o ia ona o le umia o marijuana, talepe ma le ulufia o fale, gaoi ma le lima tagovale, a’o faa-auupegaina i se auupega mata’utia, ma le faamoemoe e faatama’i, sauaga ma le faomea.

© Samoa Observer 2016

Developed by Samoa Observer in Apia