Ripoti a leoleo

82 Hits

1. O le aso 25 o Mati i le tea o le 7 i le taeao na logoina mai ai le ofisa o leoleo o lo o i ai se tino o se taulealea na faapea ona mauaina lea e ni tagata o lo o taatia i se auala i Vailoa Faleata. Na agai i ai leoleo ma iloa ai ua maliu lenei alii ma aumaia ai loa lona tino maliu i le falemai ma faamaonia mai ai e le falemai ua maliu lava o ia.

E faapea se faamatalaga o inugaava malosi na mafua ai ona tulai mai lenei faalavelave. Na faia uluai suesuega a leoleo ma taofia mai ai se taulealea 18 tausaga o Vailoa Faleata ma ua molia nei i moliaga o le fasioti tagata (murder) ma o lo o taofia nei o ia i lalo o vaavaaiga a leoleo seia aulia le aso 16 o Aperila e tulai ai i luma o le faamasinoga e tali i ona moliaga. O lo o faaauau pea suesuega a leoleo i le taimi nei.

2.O le aso Sa foi 25 o Mati na oo mai ai se tina mai Sagone Savaii ao lo o aumau nei o ia i Lalovaea ma faaulu se tagi e faasaga lea i le uso o lona toalua i lona faaoolima lea i lana tama tama e ala lea i le faaogaina lea o se agaese. O lenei mataupu e faapea o se feeseeseaiga lava faaleaiga na mafua ai.

Ua molia nei e leoleo lenei tama i moliaga o le faaoomanua ua oo ai ni manua tuga i le ua aafia ma o lo o taofia nei o ia i lalo o le vaavaaiga a leoleo seia aulia le aso 28 o Mati e tulai ai i luma o le faamasinoga. O lo o taofia pea i le falemai le o lo o faamanualia i lenei mataupu ona o le ogaoga o manuaga o lo o aafia ai i lona ao ma lona lima.

3. O le aso lua 20 o Mati na logoina mai ai le ofisa o leoleo i se faalavelave tau taavale i Safaatoa Lefaga. E faapea se faamatalaga na fetoai nei taavale e lua ona na taumafai se tasi o loli o lo o agai mai i Safaatoa i Lefaga mo Apia e tipi se tasi o taavale o lo o i luma atu o lana taavale i luga o se aega ae o lo o agai mai se tasi o loli mai i Apia mo Lefaga.

E toalua ni tagata na manunua ai ma auina atu i le falemai i Leulumoega ma ua molia ai nei le avetaavale o le loli na gai mai i Lefaga mo Apia i le ave taavale faatamala ua oo ai le manua (negligence driving causing injury) ma e tulai i luma o le faamasinoga i le aso 10 o Aperila.

4. O le aso 19 foi o Mati na tulai mai se tasi o faalavelave i Vailoa Faleata na fetoai ai foi se taxi laupasese ma se taavale ituaiga o le Ford. E faapea se faamatalaga o le saoasaoa tele o lenei taxi laupasese na mafua ai na tulai mai ai lenei faalavelave. E toafa le pasese a le taxi na manunua ai i lenei faalavelave ma auina atu ai i le falemai i Motootua mo togafitiga ma toe tetea ai lava i tua. Ua molia ai nei le ave taavale o le taxi laupasese i le ave taavale faatamala ua oo ai le manua i le pasese. 

5. O le taeao foi o le aso sa 25 o Mati 2018 na tulai mai foi se i si faalavelave tau taavale i le magafa i Vaimoso. O lenei mataupu e faapea o le taavale ituaiga o le Noah na agai mai le auala i le malaevaalele mo le falemai i Motootua ona o se mai sa aumaia ai ae fetoai ai ma se taavale i lea vaega o le auala o lo o i ai moli auala ma manunua uma ai i latou sa i totonu o lenei taavale ma auina atu ai i latou uma sa i totonu o lenei van i le falemai ma ua toe tetea uma i tua.

Ua molia ai nei la e leoleo le ave taavale o lenei van i le ave taavale faatamala ua oo ai ni manua ma e tulai i le aso 10 o Aperila i luma o le faamasinoga.

6. O le aso 25 foi o Mati na tulai mai ai foi se i si faalavelave tau taavale i Luatuanuu lea na aafia ai se van Hiace a le EFKS TV na malaga mai i Lufilufi mo Apia. Na taunuu i se pioga i Luatuanuu ma ua le mafai ai e le ave taavale o lenei van ona taofi le taavale ona na masalomia ua saosaoa tele ma agai atu ai loa i luga o maa o lo o i luga o le sami.

Na manunua uma le ave tavale ma le pasese o lenei van ma auina atu ai i le falemai ma toe tetea ai i tua. Ua molia ai nei le ave taavale o lenei van i moliaga o le ave taavale faatamala ua oo ai le manua ma ua toe tatala nei o ia i tua e faatali ai lona faamasinoga i le aso 10 o Aperila.

© Samoa Observer 2016

Developed by Samoa Observer in Apia