E silia ma le 100 i latou na mafai ona fa’au’uina i le Aoga a le Matata Eseese a Ausetalia i le aso ananafi mai Polokalame na a’oa’oina ai lenei tausaga.

O uo ma aiga na mafai ona molimauina lenei fa’amoemoe tele a le aoga e pei ona fa’aiuina ai ma le manuia taumafaiga a alo ma fanau o le atunu’u.

O se fiafiaga tele lea i a’i latou uma na mafai ona auai.

E pei ona silafia ai , o le aoga Matata Ese’ese lenei a oo ina malaga i fafo i isi atunuu e faigofie ona maua le galuega i le tusipasi ma le faailoga ua maua i se matata e pei o le fai eletise, kamuta fau meaafale, kuka, galue i le atinae o tagata tafafao e pei o galuega i faletalimalo ma faleaiga, aemaise o isi tomai e pei o le saunia o teugafulaau matagofie mo sauniga eseese poo le teuina faamatagofie o se maota e faia ai se sauniga e pei o maliu, faaipoipoga ma isi lava sauniga e pei o le faamanatu o se aso soifua. 

O le una’i a le malo o lo’o ua i ai nei,  o le aoaoina o so’o se tagata soifua i se tulaga maualuga o lona faaeaina lea i le lumanai. O se feau tāua lea na lagonaina i le aso ananafi i Tuanaimato i a’i latou na lautogia e saunoa i saunoaga autu o le aso i le to’atele o i latou na auai lea e aofia ai ma  mātua ma aiga faapea uo ma ē masani.

E mo le silafia ai o le faamuamua foi lea a le malo Ausetalia i fanau a le Pasefika e pei ona mafua ai ona lautogia Samoa e avea ma se tasi o atunuu o le Pasefika e faatū ai se tasi o ana kolisi maualuga mo le aoaoina o matata eseese faapitoa.

E lima isi kolisi o loo faatutū i isi atunuu o le Pasefika ma o le autu lava ia maualuga le aoaoina o tagata Pasefika i tomai faapitoa e faigofie ai ona talia ma maua galuega i isi atunuu e faimalaga ma faamautu ai i le lumanai.  

I ripoti talu ain a maua a ii nisi o suesuega na faia i nai tausaga ua mavae  na iloa ai o le 90 pasene o fanau ua iu mai le APTC le kolisi lea o matata faapitoa i Samoa, o fanau a le atunuu ma ua mau galuega lelei i tomai ua latou umia. E faatupe e Ausetalia le faagaioia o lea kolisi e oo foi i le aumaia o i latou e faatino le aoaoina o tomai eseese.

E silia ma le 20 poloklame tau aoaoga eseese i matata faapitoa o loo aoaoina ai. O le tomai ua sili ona molimauina ua fiafia nisi e aoaoina i le APTC o le avea ma kuka poo se tasi e saunia mea taumafa. Ua toatele nisi ua iu mai ai ma ua galulue i faletalimalo i le atunuu, a o nisi foi ua maua galuega i luga o vaa tetele o le sami e pei o vaa la‘uoloa ma le tele lava o vaega o lo’o ua i ai nei le atunu’u.

O nisi nei o ata mai lenei fa’amoemoe taua.