Mafatiaga o lo’o feagai ma Aso

Tusia Deidre Fanene ,

83 Hits

Tamā ia Falelua Aso ma lona atalii o Theodore

Tamā ia Falelua Aso ma lona atalii o Theodore

O Falelua Aso o se tamā galue malosi tele.

O le olaga olenei tamā 49 le matua o le soifua mai le afioaga o Nu’usuatia e le faigofie.

I le tausiga ai o tamaiti e to’alima o lo’o ao’oga uma e le faigofie, ma le tau toe atina’eina o loana fa’atoaga lea sa fa’aleagaina uma e le afā o Gita, ua fai ma popolega ia te ia ona ole auala lea o le latou tamaoaiga.

“O le fa’atoaga o le olataga lea ona o lea fa’alagolago iai le aiga, ae ona o Gita ua ia fa’aleagaina uma la’u fa’atoaga, o lea ua ou tapā ai se fesoasoani mai o’u aiga o lo’o tu lelei ia ia latou tu’u mai o latou tauau.

“Tau lava mo sina taimi latou te fesoasoani mai ai ona ua leai se mea o toe tua iai, o le ua toe amatamata le fa’atoaga ma e ono masina e fa’atali ai fa’atoa tali mai.

“Ua ou mana’omia la’u fa’ataoga e pei ona mana’omia e lo’u aiga o a’u ina ia tausi ma va’ai lelei latou aemaise ai o lelagolagoina o latou i mea uma.”

Sa ta’ua e Aso e $100 lana tupe e maua i le aso mai le fa’atauina o ana meatotō i le maketi.

Sa ia fa’ailoa fo’i i le Fofoga o Samoa, o si ana fanau ua mama’i talu ai o le lē lelei o le umukuka latou te fa’aaogaina fa’apea ai le leai o se ta’inamu e momoe ai.

“Mana’omia lava se ta’inamu sa ave se tasi o atali’i ananafi i le falema’i ae e le’i leva ona malosi mai lo’u afafine.

“Sa ave e va’ai le foma’i ma sa fa’ailoa mai e le foma’i le mafua’aga o le mama’i ona o fa’ama’i e mafua mai i namu.

“Tusa lava po’o le a le fa’amamaina o le fanua atoa, e iai lava namu. E le se mea faigofie le ola maloloina, ma ua ou leiloa pe fa’apefea ona sefe mai la’u fanau mai nei fa’ama’i ona e leai se tamaoaiga e fesoasoani ai.”

Sa fa’ailoa e Aso o le latou umukuka e fai lava si matamuli pe a o’o ina asia e tagata le latou fale.

“Ou te naunau lava ina ia lelei ma mama nofoaga aemaise o meaai e a’ai ai si a’u fanau, ae peita’i e le mafai ona ave’ese i le mafaufau o le mafua’aga lea e mama’i ai tamaiti ona o le lē lelei o le tausiga.

“I le ituaiga aiga lea e iai le matou aiga, e na’o le lua sipuni ma ipu e lua, matou te maua lava le loto fa’afetai.

“O ipu uma nei e matou te fa’aaogaina e fa’atau ta’itasi mai lava, e le gafatia ona matou fa’ataua atoa se taseni ipu.”

Ae o le fa’afitauli a lenei tamā e le gata ai ii.

“O le suavai le isi fa’afitauli tele o lo’o feagai ma matou.

“O lea ou te iai i totonu o le komiti o le suavai ale matou nuu.

“Afai ae ti le tanevai ale nu’u, e au i aiga o lo’o nonofo i vaega maualalalo se’iloga lava ua tutumu, ae o le a lava la le vai e totoe o le suavai lea e fa’asoasoa i aiga e iai le matou aiga o lo’o nonofo i nofoaga maualuluga.

“E iai taimi e atoa lelei le lua aso fa’atutumu vai a nei aiga a’o le’i o’o mai i le matou fale, ae o le fa’afitauli e le tumau ai pea.”

Sa ia fa’ailoa le mana’omia tele e latou o se tane vai.

“E ui lava o lo’o iai ni kalone tetele e fa’atali ai vaitimu ae peita’i e uma lava ona fa’aaoga nei vai e le’i o’o mai lava le fa’asoa ale suavai i le matou aiga.

“E ese le faigat ao le fa’atali i aso e lua mo le vai, ma o le la’uina mai o le vai e le o se tulaga faigofie fo’i ona e matou te o i le vaitafe e la’u mai ai le vai.

“Aemaise lava le fa’atumauina o le vai mama mo le fale le ta’ua o se itu taua lea mo le fanau.”

“Ua tolu tausaga talu ona toe suia le tane vai ale nuu, ma ua iai se suiga fou ona pe a fa’atusatusa atu i aso ua mavae sa matua’i leai se suavai e o’o mai iinei.

“O lea e taumafai atu e faia se fale ta’ele lelei ona e iai lo’u afafine, o le matou paipa muamua sa fai i tapoleni ae peita’i ua fa’aleagaina ona o le ma’ema’ea o Gita.

“O lo’u afafine lea e matua ai lava i le fanauga, ma ua iai nei i le vasega 13.

“E le faigofie le olaga, ae peita’i e sefesefe lava le seleni auā le fanau ma latou aoga.”

Mo so’o se tasi e fia fesoasoani i le aiga o Aso fa’amolemole fa’afeso’ota’i le numera 7681327.

© Samoa Observer 2016

Developed by Samoa Observer in Apia