Finau se aiga mo le latou fanua i le fa’amasinoga

By Deidre Tautua-Fanene 28 February 2018, 12:00AM

O le finau a se tasi o aiga o lo’o nonofo i Sogi ina ia taofi le taumafai o le malo e tulieseina i latou mai lo latou fanua o lo’o fa’aauauina pea.

O le aiga o Tokuma mai Sogi lea ua latou avea le mataupu lenei i luga o le fa’amasinoga maualuga ina ia fai ai se fa’aiuga.

I le aso ananafi sa vala’auina ai lenei mataupu i luma o le ali’i fa’amasino o le Fa’amasinoga Maualuga, Leiataualesa Daryl Clarke.

O lē o lo’o tula’i mo le auaiga o Tokuma o le ali’i loia ia Pa’u Tafaogalupe Mulitalo. 

O le tama’itai o Tafailagi Peniamina o lo’o tula’i mo le itu ale S.L.C. ma le malo.

O Nanai Liutofagaomataafa Tokuma, o le atali’i o Turaroe Tokuma lea ua malia mai le atu Solomona, ma lona tinā ia , Ulalemamae Leiataua ua maliu fo’i lea sa maolimau i le aso ananafi.

“Ou te le’o iloa lelei le mafuaaga na ala ai ona sau lo’u tamā iinei, pau le tulaga lea ou te iloaina sa aveta’ava’ale i le Pule o le Au Siamani, Patrick Percival,” o le molimau lea a Nanai i totonu o le potu fa’amasino.

“O lo’u tamā sa ave ta’avale i le tamaloa lea i le vaitaimi o le 1920.”

Sa fesiligia e le alii loia o Mulitalo pe na te manatuaina se matatupu sa tula’i mai i lona tamā i lea taimi o le 1920.

“Sa tu’ua’ia lo’u tamā ona e fa’apea o ia sa fasiotia se tasi o Saina faipisinisi sa fai lona faleoloa, ae uma ane e le’o ia,” o le saunoaga lea a Nanai.

“O nei mea uma sa ta’u mai e lo’u tamāia te a’u, ona o le taimi lea na tutupu ai nei mea uma ou te le’I fanau mai.

“Sa lokaina ma tu’ua’ia ae peita’i i le aso na tu’u  e lauina ai le iuga sa oatu ai nisi o toeai’ina ma latou ta’utino e le’o lo’u tamāna fasiotia le Saina lea o laua.”

O i tonu lea na fa’asalāvei ai loa le tama’itai loia ia Peniamina e uiga i le mau a Nanai.

“Lau afioga, o le itu lea e fai ai le ta;utinoga ale molimau lenei o tala fa’alogo,” o le manatu lea o Peniamina.

“O le taimi lea e tula’i mai ai le mataupu lenei e le’i soifua mai Nanai, o lona uiga o lenei molimau e afua mai i tala fa’alogo ma e le tatau ona fa’aaogaina lenei molimau.”

Ae peita’i sa tula’i atu le ali’i loia o Mulitalo ma ia fa’ailoa ai e tatau ona fa’aaogaina lenei molimau, ona a fua atu i le taimi na tula’i mai ai lenei mataupu e le’o toe iai ni fa’amaoniga maumaututū i leoleo e fa’atatau i lea mataupu.

Sa valaa’ulia loa e le ali’i fa’amasino o Leiataualesa loia uma e latou soalaupule i totonu o lona ofisa ae fai se malologa pu’upu’u a le fa’amasinoga.

Ina ua toe fa’aauauina taualumaga ale fa’amasinoga i le aso ananafi sa fai ai le fa’aiuga ina ia toe tolopoina lenei mataupu i le Aso 8 Mati, 2018 i le itula e 10 i le taeao.

“Nanai Tokuma, o loia ia e tula’i mai mo lesi itu o lo’o tete’e i lau molimau i le taeao nei, i luga o mea nei, o na o fa’amatalaga o lo’o e tu’uina mai e mai tala fa’alogao, ma e leai se fa’amaoniga o iai i lau molimau,” o le saunoaga lea a Leiataualesa.

“O le itu lea e maitau atu o lau fa’amatalaga lenei e fa’atatu i le mataupu o lo’o fesiligia ai oe sa tula’i mai ae e te le’i soifua mai.

“O lea la ou te fia mana’o e fa’alogo atu i le itu o lo’o tete’e mo se latou folasaga i le uiga o le latou tete’e ma aumai ni tala tusitusi e fa’amatala mai ai le latou tete’e ina ia mafai ona fai ai se fa’aiuga i lea mataupu e tula’i mai.

“E taua tele lenei vaega mo le itu o lo’o tete’e.

“Ma o lea o le a toe tolopoina lenei mataupu i le Aso 8 Mati, 2018 mo le fa’aiuga o lenei mataupu ua lagā i le taeao lenei ona fa’aauau ai lea o le taualaumaga o le fa’amasinoga.”

I le fa’atalanoaga ma le ali’i loia o Mulitalo i fafo o le potu fa’amasino sa ia fa’amanino mai ai le mafua’aga o le toe tolopoina o lea mataupu.

“O le mataupu lea e tula’i mai o le taliaina ma le fa’atuatuaina o le molimau a Tokuma,” o le saunoaga lea a Mulitalo.

“O le va’ai a le fa’amasinoga, ona o le molimau ai a se tasi fa’atoa soifua mai i le 1940, molimau i ni mea sa tutupu i le tausaga 1920.

“O le itu la lea e mana’o ai le fa’amasinoga ina ia avatu ni fa’amaoniga sa iai se mataupu fa’apea na tula’i mai, ae le tau o tala fa’alogo sa fa’amatalaina e Nanai mai i ona matua.

“O le mau la a le fa’amasinoga o tala fa’alogo, lea la ua aumai ai le avanoa ina avatu ai se folasaga mai itu uma e lua e fa’amaonia ai le taliaina ma le fa’atuatuaina o le molimau.”

Ae na fa’aalia e Mulitalo o se itu faigata tele lea.

“Ona o le tulaga o le umi o le taimi lea sa tula’i mai ai lenei mataupu ona o le taimi lea sa pulea e Siamani Samoa.

“Lea la e fai ai le fa’aiuga a Leiataualesa i le vaiaso a sau nei e uiga i lea mataupu.

“Pau lea o le tulaga lea e faigata ai, ae o le isi itu lea na feiloa’i ai Tokuma ma le palemia muamua o Samoa o Mata’afa o le mau la lena e fa’aauau pea ona sa iai Nanai i le taimi lea.”

O le mau a le aiga o Tokuma o le fanua le o lo’o faia ai le fa’amasinoga o se meaalofa sa tuuina atu mo Turore Tokuma e le Pule o Siamani Patrick Percival i le tausag 1920.

O Turore sa fai ma aveta’avale a le alii ia Patrick.

O le latou mau o le fanua sa avatu fa’ameaalofa mo Turore ona o lana tautua mo Percival.

By Deidre Tautua-Fanene 28 February 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>