Faasinomaga e iloa ai le taua o aiga

By Seia Soloi 28 February 2017, 12:00AM

O le siosiomaga ma o tatou laufanua, o suafa matai, o fale ma mea uma ua iai, o meaalofa ia mai i le Atua.

O le talitonuga lea o le Tama ia Sauuila Meafou, 56 tausaga le matua mai Salepoua’e, Saleimoa.

‘E atia’e lava o tatou aiga i mea ua maua I o tatou siosiomaga ma le lotoufale o o tatou aiga.

Na maua atu e le Fofoga o Samoa le tama ia Sauuila ua foi mai i lona faatoaga, o meaai mo lana lafu puaa e fafagaina i aso uma.

“O la’u galuega lava lea e fai i aso uma, out e le faigaluega ae o le faatoaga o le matou alaga tupe lea mo le faaaogaina o lo’u atalii e toatasi o lo’o aoga ma fai mea a le nuu.

“E ui lava i le taugata ma le faigata, ae o lo’o atia’e lava i e mea e gata ai le atinaeina o aiga aemaise le tapu’eina o le ola o fanau mo nei ma le lumanai manuia.

Ua tele ina maitauina e le tama ia Sauuila le tele o aiga o le atunuu ua agai i faamasinoga ona e mafua mai i fanua ma suafa o lo’o vevesi ai nei le toatele.

“O luga o le televise ma le nusipepa, ua vevesi ai le tele o aiga, ma ua fevaevaea’i ai le va o isi aiga ma leisi aiga, ae ua le maua ai foi ma se filemu i totonu o mafutaga faale-aiga.

“Ae ia iloa lelei e tagata o le atunuu, o fanua ma suafa o lo’o vevesi ai nei o meaalofa ia na foai mai e le Atua mo tatou ma a tatou aiga.

“E oo ai lava i toto, ivi ma aano o aiga, ua va ai lava talu ai lava lenei tulaga, o fanua ma suafa.

O le talitonuga o le tama, e iai le taimi o le lumanai e pulea ai e Saina tatou, e oo foi i a latou pisinisi o faleoloa tetele, ua faia lava ua oo lava i fanua ua faatau lava i tupe.

“A faatau la fanua ma foai, ae faapefea a tatou fanau i le lumanai ma lo latou ola tuputupua’e? O ai e tuuaia? O tatou lava.

O lona naunautaiga foi lea mo lona aiga, ia maua le fiafia ma le galulue faatasi o tagata o lona aiga, o le mea sili lea.

“A maua a le fanua o le tagata ia, ia atia’e ma galue malosi iai ae le o le manao tele ua tupu ai le vevesi.

“O mitamitaga ia o le tele o aiga I Samoa, o a latou fanua ma suafa, e manumanu ma aputiputi ai, o le mea foi lea e ao ina iloa e tagata nuu a Samoa, e ese le taua o fanua ma suafa i le faasinomaga o aiga taitasi.

O le faamamafa a Sauuila i lenei vaitaimi o lona aiga aemaise o lona atalii o lo’o aoga, aemaise o lona aiga.

“Leai a seisi mea sili atu nai lo le ola fiafia ma le ola saoloyo o tagata o le atunuu i mea a o latou lava aiga aua e leai ai lava se vevesi e maua mai ai.

O lana feau foi lea mo isi tagata o le atunuu.

“Mafaufau loloto iai i le taua o ia meaalofa na aumaia, o faamanuiaga uma lava mo le atina’eina o aiga aemaise le ola tuputupu a’e o fanau.

By Seia Soloi 28 February 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>