O suiga mo le lelei o Samoa

By Aruna Lolani 28 February 2017, 12:00AM

I le fa’atalatalanoaga o le tina ia Kololine Salu, 62 le matua o lona soifua mai Saleimoa e le Fofoga o Samoa, sa ia fa’alia ai le le toe tutusa o Samoa i le vaitaimi nei ma le sefulu fitu tausaga ua te’a. 

Na fa’afesiligia le tina e le Fofoga o Samoa e fa’atatau i lona ia olaga i totonu o Samoa ma na ia fa’aalia ai lona manatu e fa’apea o lo’o lelei mea uma. 

“E lelei a mea uma i Samoa.” O lona manatu fa’aalia lea i le aso ananafi. 

“E tele a tagata faimai ua taugata le soifuaga, ma e le mafai fo’i e a’u ona ou suia mafaufau o nei tagata i o latou talitonuga aua so’o se tagata a e tofu a latou ia ma lona ia talitonuga. 

“E eseese uma a tatou manatu ma le tatou va’ai i mea o lo’o tutupu. E fa’apena a lo’u ia va’ai i le olaga ma ona faiga aua e alu i luma le olaga. 

“I lo’u ia manatu fa’aalia, e pau a le auala e atina’e atili ai le tatou atunu’u ma aga’i ai luma e pei o isi atunu’u, o le faiga lea o ni suiga fou e tatau mo Samoa. 

 “Faimai a le to’atele o tagata e le fiafia ile aumaia ma le fa’atagaina e le malo o atunu’u eseese i totonu o Samoa, aemaise lava ile au Saina ae peita’i ole au Saina lea e fa’amama avega mai ile tau ole soifuaga. 

“Sa ou fa’apea fo’i i le taimi muamua. Sa ou tomumu lava ile to’atele o le au Saina i Samoa ae na ou toe iloa mulimuli ifo, ia o le au Saina a lea e maua ai se fa’amoemoe. 

“E le fa’apea la a ou faiatu fa’apena, ona fa’apea lea ou te lagolagoina Saina e omai i totonu o Samoa ma pulea Samoa, e leai. Ou te lagolagosua i le manatu lea e fa’apea, o le au Saina lea e fa’amama avega i tagata Samoa e fa’atatau lea ile taugata ole soifuaga. 

“Fa’ata’ita’iga , e fa’atau e le au Saina ia le vaemoa i le $1.50 ae o fale’oloa a Samoa a ia, o le tau ole vaemoa na e $2.00

 “Ma o le itu la lena ou te lagolagoina ai le au Saina na i lo’o tatou lava ia tagata. 

“Ma ou te masalo, e tutusa a’u ma isi tagata aua e to’atele tagata Samoa e le gafatia le taugata ole soifuaga lea ua iai nei. 

 I le malamalamaga fa’aalia a Kololine, e to’atele tagata o lo’o tauivi i le faigata o le olaga ma mana’omia le fesoasoani i lena itu, ae a fa’apea le e alu alu ai pea i luma le taugata o le soifuaga, o le to’atele fo’i na o tagata Samoa e latou filifilia fesoasoani mai Saina.

Le gata i lea, sa ia fa’alia fo’i ile Fofoga o Samoa, e pau lave le mea e tatau ona fai e tagata Samoa, ole taumafai lea e fa’amasani i suiga fou ole olaga ma taumafai e su’e ni auala e fesoasoani ai e fa’amama i le taugata ole soifuaga.  

“I lenei olaga, e leai ma se mea e faigofie. E tatou te tigaina a ile tele o taimi ma e iai fo’i tatou aso e le lelei, ae a fa’apea na o le pau le tatou mea e fai ole faitio ma nofonofo, ia na’o le fa’ateteleina o o tatou puapuagatia. 

 Sa fa’aalia e Kololine ile Fofoga o Samoa, e tele a suiga fou o lo’o fesoasoani ile atina’eina o Samoa. 

“Ia te a’u lava ia, o le lelei ole atina’eina o Samoa, o le lelei fo’i na o le tuputupu a’e o lo tatou atunu’u. 

“Ua maua e le matou nu’u ni auala lelei ma e momoli fo’i le fa’afetai ile au Saina mo le latou ia fesoasoani tele i aiga po’o matou, i le taugata ole soifuaga. 

“Tatou te aga’i pea i luma ma va’ava’ai i suiga fou ua iai, ia ma o latou aoga i tagata Samoa. 

By Aruna Lolani 28 February 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>