LAUGA - “Ia e filifili i le ola”

2550 Hits

Petaia Setu

Petaia Setu

(Teuterenome.30:18-20)

Tusia - Petaia Setu

 

O upu a failauga o le atunuu, e sua le lapa lalaka ma le lapa mamao. E vaavaai i manuia o nei ma a taeao. A o le tamaloa Aana foi e le i moe faasamasamanoa, ae sa moe mānatu mo se taeao fou o Samoa.

E le i tuufaūa e le Atua le uluai tagata e ola faa tagata noa i lona siomaga. Ae sa tuu atu iai ma le laau e gaepu ai lana tofa ma lana faautautaga. E iloa ai lona ituaiga tagata, poo le manuia poo le malaia, poo le oti poo le ola, pe lelei pe leaga. Fai mai le Atua, “Aua” (Ken.2:17); ae fai mai Mose, “Ia e filifili i le ola.” 

O le tala sa’o, soo se pulega lava i Samoa, e le o alu i luma, ae tifa i tua. A o le tifa, o foliga na o le onā! O tatou lea e onā. Ua leva ona tau le ua Samoa! E sa’o se mea e te faia pe a sesepa lau vaai. O fea e fua mai ai ni manuia o aiga ma fanau pe afai e sasapa ou vae ma lau savali i aso uma? O le olaga lea ua iai tagata o le Esoto. E le o i luma ae faatitifa solo i autafa ma tua.

E tele lava foi ina fefoifoia’i ai lava i le mea e tasi. A silasila foi la i le ala na ui ai le nuu, ua faapena foi ona faataamilomilo e le Atua i le mea lava e tasi, aua ua faasesepa le vaai a’e i le Atua i aso uma, ma ua ola faasasapa ma ō faaautafa. E a, e sa’o a’u? Pe le o le ituaiga olaga lena o loo tifa solo ai tatou? Ua le manatu i le Atua a ua avaga i tuinanauga o le olaga. Ua pei le Atua o se isi tagata e pei o oe i lau faitau.

Ua malo ou tuinanau. Ua e le iloa o le Silisili Ese lea o  loo faavae ai Samoa. Auā e tautala lou olaga o aso uma ma mea o loo e fai. E molimau le natura o mea ma le siosiomaga i mea o loo fetosoaiina ai oe. ‘Aua e te ta’ua le suafa mamalu o le Atua i mea valea o loo e fai  ma taaa’iga sese o loo e mulimuli ai. Ua tuu sa’o lava le afioga a le Atua i le nuu. E lua lava mea, o le ola ma le manuia, poo le oti ma le malaia. O tua ia o le usitai ma le le usitai. O le avanoa mo le nuu o Isaraelu e filifili ai. 

Samoa e, o tatou o le atunuu lotu, ae le o tatou o ni tagata talitonu! E taulagi i gutu o Isaraelu lo latou Atua, a o loto ma amioga e tufanua. Tatou te mimita e ta’uta’u le faavae o Samoa, a o se mata’u ma se usita’i iai e misi atoa! Maifea le loto maaa ma le faamaualuga? Samoa, e faavae le usitai i le alofa. O le usitai lena e ‘oa ma susua ona faamanuiaga. O faamanuiaga o taoto mai lumāmea i faiva ma tiute ma le siomaga o le a fai mou (f.16).

E inu ai lau fanau; e mapu iai lou aiga; e to’a iai le ekalesia; e ola iai le atunuu. O manū ia na mele e le fanauga a Isaraelu. Ua le ese ma foliga sa tutulu ai le Alii ina ua latalata i le aai o Ierusalema i lana malaga faatupu, na ia faapea ane ai, “Ana e iloa…o mea e te manuia ai! A o lenei ua lilo i lau vaai.” (Luk.19:42).

Aisea? Papa’u le tofā! E vale le faautautaga! E alu i le Atua, ae tepa i tua. E mafanafana i le afi faaniutu i le po ma taitai e le ao faaniutu i le ao, ae anau lava i meaai ma le tamaoaiga o Farao! E te lotu faasoloatoa i aso uma lava, a o lou loto ua faatumulia e Satani i faufauga leaga!

O ai e tu mo oe, o Iesu poo le tiapolo? O ai na te laveai i lou aiga ma lau fanau, o lou salamō poo ou tuinanau? Ia e filifili i le ola. O oe e faia le filifiliga. O lau filifiliga e te ola ai; o lau filifiliga foi e te oti ai. Pe tou te faaletonu i manatu e lua seia afea? Afai o Ieova o le Atua ia, ia mulimuli ia Ieova; afai foi o Paala, mulimuli ia Paala (I Tupu.18:21).

Samoa e, ala mai ia! Ua lava ia lena faavalevalea. ‘Aua e te vaai i le HRPP. ‘Aua e te faalogo i le Tautua Samoa. Vaai sa’o oe ma faalogo i le Atua (Sala.121). O le manu’a tele lea o tagata o le Esoto i le fesaga’iga ma le Atua.

E a Mose e faapupula iai le silisili ese o le Atua ma saga faamanino, ae a le nuu e falala pea loto i Aikupito. Tele vavega ma faailoga tetele ua faia e le Atua, ae le mafai lava le ifo tupua. E iloa lava o le agasala, a ua suamalie pea i le manava. E auma le faamaoni, ua amo mamalu ma le tofi? Talofa e, Samoa! O ai na te fofō ou manu’a? O oe lava.

E le faia lava e se isi; o oe lava. Salamō nei ma foi loa i le Atua. O le alofa ia Ieova lou Atua, ma e savali i ona ala, ma e tausi i ana tulafono, ma ana faamasinoga, e tuu tulu’i ai lou ola ma faamanuiaina ai oe i ou laasaga uma o a taeao.

O le tautinoga lea a Mose i le nuu. Vaai i le ola. Faalogo i le ola. Filifili i le ola. Silasila toto’a. Ia malamalama ou mata; ia talitonu lou loto; filifili ma le poto. O iai le tapuaiga. E molimau le lagi ma le lalolagi i le faamaoni o le Atua. O la Ieova ia Samuelu, ‘Aua e te vaai i lona tino, poo le maualuga o lona tino… auā e vaai tagata i le tino, ae vaai Ieova i le loto (I Samu.16:7). Vaai a’e i le Atua, ona faapupula lea e le Atua ou mata i le loto ua iai le mata’u ma le alofa e usitai ai i le Atua.

Samoa pele e, o lau filifiliga, o le taeao lea o oe ma lau fanau. O le lima tausaga lea o i luma o lou aiga ma lou nuu. Ua tuu manino mai lava e Mose le finagalo o le Atua ia te oe ma a’u. O le ola ma le oti, o le manuia ma le malaia, o loo i le usitai, ma le le faalogo i le Atua. Peitai ua tautino mai lava e Mose le alofa faapalepale o le Atua mo oe, “ia e filifili i le ola.” Ua le fe’alofa’i  le alofa faaola o le Atua ia te oe ma a’u, auā o le mătua fai tama e putiputi ma faapelepele. O le valaau, filifili i le ola.

Lo’u atunuu e, ua tele ma anoanoa’i ‘au a le tiapolo. E   ono pu’ea foi e le fili lau vaai ma lau faalogo. Na ona ou faamanatu atu, e leai ma se mea a Satani o i le lalolagi. E leai foi ni mea a se vaega faa upu fai o iai.

Auā o le lalolagi ma mea o tumu ai o a Ieova ia (Sala.24:1)I le ua fetalai  mai lava le fofoga o le Atua, “O mea uma lava o i lalo o le lagi, o a’u mea ia.” (Iopu.41:11). Se a la e saili solo ai i mea vaivai o lenei olaga? Fai mai Tavita, O le faatuatua ia Ieova, e sili lea i le faalagolago i tagata (Sala.118:8). Afai o lea le faatuatuaga, o lea le faalagolagomaga, o lea le olataga, filifili la ia i le Atua, auā o le Atua, o le ola lava ia.

E ola ai oe ma lau fanau. E manuia ai lou aiga ma lou nuu. Uso e, ma tatou uma, o loo i le Atua mea uma lava. Mea mama; mea atoatoa; mea uma ua saunia; mea ua iai le mamalu ma le faauuga a le Agaga; o faamalologa ma faamanuiaga; o le saolotoga ma lelei uma lava. Ua tatou iai i le vaiaso o faiga filifiliga. Samoa, faalogo i le siufofoga o Ieova; e faavae i le alofa.

Ia le fetāa’i faalou  le magā sou lagona, a ia e pipii atu ia Ieova, auā ua ia te ia lou ola. E le faatauina i tupe  ma taumafa ma le aso e tasi lou saolotoga. A o le tautua na masaesae ma masofasofa ai lou Faaola. Ua na o ia e moni ma faamaoni lona alofa, na te faafualoaina ai ou aso.

O ia ua na faamafola mai ona aao ma valaau mai ia te oe, “Ia outou o mai ia te a’u…o a’u foi e malolo ai outou.” (Mata.11:28)

Uso e, o Iesu o lou toomaga; o lou mapusaga, o lou malologa. O ia lava o lou ola. Vaai lelei i lau palota. Ou te toe fai atu, Samoa, ia e filifili i le ola, ina ia ola ai oe atoa ma lau fanau, i le olaga nei, ma le ola e faavavau. 

 

Amene

7737063  

E-mail: petaiasetu@gmail.com

 



© Samoa Observer 2016

Developed by Samoa Observer in Apia