Samoa ne’i Galo Talatu’u ma Tala o le Vavau a Samoa

2494 Hits

E pei o se lamepa lotolotoi i le pogisa, ma o le a le-mate le susulu o lona malamalama e ofaga iai mafaufauga o tupulaga au i luma o Samoa

O nisi nei o Tala ua ‘oto mai le Tusi, Samoa Ne’i Galo (Volume 1) sa tu’ufa’atasia ma fa’amaumauina e le Matagaluega mo Tupulaga, Ta’aloga ma Aganu’u, ua ‘auina atu e lau Nusipepa, le Samoa Observer aua tupulaga ma le mamalu o le atunu’u e pei ona fa’ananau iai. O nei tala, o le a ‘auina atu i vaiaso ta’itasi.

 

APAULA MA VAATAUSILI

 

Upu Tomua:

O nisi ia igoa e laulau vivilu ai tagata Samoa. e afua mai po o le Vavau ua o’o mai i nei ona aso. Faapei la ona lautala ai le atunuu, faapena fo’i ona tusia nit ala e nisi Alii Tusitala na asa le taeao i Samoa aua talatu’u ma tala fo’i o mea o le vavau. Ua mautu le mau i le toatele, o Vaatausili o ia o le uso o le toa ta’utaua ma le malosi o Vaea. O ia ua ta’ua nei, sa nofo i le Tuamasaga i le itu lea i matu o Upolu. Mai le Tala lenei, na mafua ai ona taoto fa’anoanoa le alii o Vaea ma iu ina liu mauga ai, aua ua alu Apaula lona toalua e ola i lona aiga i Fiti po’o Toga fo’i. 

Ua iloa, e eseese silafia o nisi Tusitala e uiga i le tama’ita’i o Apaula. O loo ta’ua i ia taofi eseese, e mai Toga ia Apaula, o ia o le alo o le Tuitoga. Se tasi mau o le tama’ita’i na o mai Fiti ma ona tuagane e foua Vaea. I le ua faatonutonu gata la lea vaega. Peitai, a fua i le igoa o le tama’ita’i, Apaula, e ono moni le taofi e mai Toga. E vavalalata tele upu Samoa ma Toga aua o le ‘afu’afu Polenisia ia atunuu, e ese mai lo Fiti.  E manatu le Alii Tusitala, Felela Emani, ‘Tales of the Ancient’ itulau 25-29 e o mai Fiti ia le uso ma le tuafafine o Apaula. O loo ta’ua i le ‘Pale Fuiono’ – itulau 16, o Vaea na faatasi ma Apaula le tuafafine o le fanau tama a le Tuifiti. 

E ese le taofi ua fa’aalia i le Tusi ua taua: Tapasa o Folauga i Aso Afa 30-35. O le auso Toga e toalua, Tatua ma Tano, na o mai i Samoa e fia iloilo ma Vaea. E le gata i lea, e aufaatasi taofi, na saili e Apaula ia Vaatausili i le motu i Savaii, ina ua fia taui le agaleaga o tuagane o Apaula na fasiotia lana tama o Tuisavalalo. 

 

O le Tala:

“Ua Atoa Tino o Va’atausili”

Ua fesaua’i faalatana e pei o le upu faasamoa, ia le tele o taofi o Samoa e uiga i le Tala ia Apaula ma lana tane o Vaea. A o lea feuluulufaiga o manatu, e matele le avega o vaega i le ala e tasi. O Vaea ma lona uso o Vaatausili. Na faatasi Apaula ma le alii matautia o Vaea. O le tama o Tuisavalalo o le atalii lea o Vaea, lea na fasiotia pen a malolo fo’i talu o tuagane lava o Apaula. O Vaea o le toa malosi, sa ta’ua o le sau’ai. Sa nofo o ia i matu o le motu o Upolu, o le Tuamasaga lea. Na oo atu ia tala i motu paepae solo o le Pasefika e i ai Toga ma Fiti. Sa ia Vaea le mana saualii na atili logologoa ai o ia.  Ona malaga mai lea o atalii e toafa o le Tuifiti e fia fa’atoilalo Vaea, faatasi ma Apaula le tuafafine. Taunuu le vaa i gatai o Mulinuu ona taula lea ma tau sema se ituaso e foua ai le sauai. Ua po, a ua iloa e Vaea le vaa ua taoto mai i le sami, ua ite foi i le mafuaaga o le malaga. Na ‘a’apa ane lima malolosi ma le mata’utia o le sauai sii lemu le vaa a’o momoe le au malaga ma tu’u i tumutumu o laau. A o le’i fotu malama o le aso fou, o le a tafa ata, na tata lea o le liu o le vaa, ma iloa ai, e le o le sami o pau ifo i ai le sualiu, ao tumutumu o laau. Ona o le augani a tuagane o Apaula ia Vaea ia ola le sala ona o le ma’ema’ea, lea na foai atu ai Apaula ia Vaea, ae foi tuagane ma le toilalo. Ina ua lata aso e fanau ai le tama’ita’i ona ia poloai ai lea i lona aiga e fia foi atu, aua ua lata i lona masina. Se tasi finagalo, e lei toe foi tuagane, ae na fai ma ‘auaiga o Vaea. Faatoa foi faatasi ina o le a fanau le tama’ita’i. 

A’o folau Apaula ma tuagane sat u Vaea ma vaavaai i le folauga, seia oo ina lilo le vaai aua ua nefu tafatafailagi. Na fanau le tamaitai ma faaigoa ia Tuisavalalo e faamanatu ai le tu a Vaea i ogaeleele i Apia, ua ta’ua o Savalalo. 

Tele tausaga ua mavae, ua le toe foi ane Apaula ia Vaea, ua ola ma tupu malosi foi le tama. A o Vaea ua nofo toatasi, ma o loo mulimuli pea lona loto ia Apaula. Sa lei galo i tuagane o le tamaitai lo latou luma ma le toilalo ia Vaea, ma ua amata ona fafau se taui ma sui i le tama o Tuisavalalo. 

O le tasi aso, na logo Apaula e ona tuagane, o loo manao le alii o le nuu (Tuifiti) e agai ava le tama i le alofi Sa o le nuu. Sa iite Apaula, talofa i si ana tama, e le taumate o se togafiti le manao. 

O le mafua’aga lea na fai ai le upu mavae a le tamaitai, a’o lei tuua o ia e le tama o Tuisavalalo “Sau ia ina alu, ae a fatitoto galu o le sami, e logo mai ai “oe ia te a’u, ua e oti”.

Ua tonu le iteite, aua na tau ii le tama le loto tiga o le ‘auso. Ua malolo Tuisavalalo, aua ua fasia fa’apo o ia ma ua leai se laveai. Ua tagi nei le fatu ma le eleele o Apaula. Ua tu mai le ataata mu.  Ua featia’i le ma’ai o le faanoanoa. Ua tagi tautala Apaula, Vaea o i Samoa. Talofa e, Tuisavalalo ua e malolo!

E taunuu Apaula i le nofoaga o lana tane, a ua iloa e Vaea le faalavelave ma ua atili fa’aopoopo ai le aifoi ma fai atu lona alo, ua amata ona gase le tino ua liu eleele. Na feiloai i loimata maligi. Fai o le fasiotia o le tama, a ua toe o fofoga o Vaea ua vaaia e Apaula aua ua ta’atia o se mauga tele. O le taofi o Samoa, o loimata o Apaula, lea ua avea ma vaitafe i tafatafa o Vaea, ua igoa foi o Loimata o Apaula. Ua oo upu faanoanoa o le savali a Apaula ia Vaea, a ua leai se mea e toe mafai e le alii. “Talofa, ua e sau Apaula ua tautua. Alu i Savaii i lo’u uso o Vaatausili, na te taui le agaleagaina o lo’u atalii, o nai toe upu faamavae ia a Vaea. 

Ua gase le toa” O isi taofi na taunuu Apaula i Savaii ona ia feiloai lea i le tama o Vaatausili i le nuu ua igoa ia Salelavalu. O isi mau, o Lealatele na maua atu o seupepe ai le tama, ua na o se tamaititi tino ‘ause, ona savali lava lea aga’i i le itu sisifo ma taunuu i le va o Tufutafoe ma Falealupo. 

Ua malu le tauafiafi, o le a taena’i le malama, ua mou leo o le aso, aua ua ta’aligoa’au a le pogisa. “Se’i e malolo Apaula, ou te faaitiiti ifo i gauta e saili saualii, aumai se malosi e laveai i lo ta puapuaga,” o upu faalaei’au ia a Vaatausili. E faafeagai tonu le Ana na moena’i ai le tama ma le Fafa o Saualii i le va o nuu ua taua i luga. Na maofa ma meia le tamaitai ina ua tu se tagata tino ‘ese ma le maualuga, o Vaatausili lea. 

 

 

 

Ua atoa tino o Vaatausili. 

O lagona nofoloto ia o Apaula, fai nei ma muafetalaiga a failauga o Samoa. Sa malaga loa Apaula ma Vaatausili i le vasaloloa, ma, na tau le mana’o o le tamaitai. Na fano e le gata o ona tuagane, a’o le ‘auao a le Tuifiti. A o le’i toe foi ane Vaatausili i Samoa, na tu’u ane e le tamaitai i le tama o Vaatausili lona igoa e avea ma faamanatu i lo la va, ma manatua ai pea i ‘augatupulaga i ona aiga ma lona atunuu. O le igoa Apaula, ua fai lea ma Sa’o Tama’ita’i o nisi Alii o Falealupo ma Tufutafoe. Fai mai le mau, na toe taunuu ane lava ii a nuu le alii o Vaatausili. 

 

Manatu Faaopoopo:

1. E fete’ena’i taofi o le ‘aufai tofa o Samoa e uiga i le uso na malaga mai fafo ma lo latou tuafafine o Apaula. O le taofi foi o nisi o nuu o loo i ai le Vavau, o Fiti na o mai ai i latou. Fai mai le molimau o le tele lava o Tala o le Vavau e ta’ua ai le va o Samoa, Fiti ma Toga na tau ane i le ogaeleele ua igoa o Talifiti. Pe folau mai i Samoa, pe toe foi ese, o le ogaeleele lava lea e lata i le Fafa o Saualii, e ofaga uma i ai le ta’asaualii o le Vavau. 

2. O le igoa Apaula, e talitonu le taofi pei foi o finagalo o nuu na feagai ma le sailiiliga, pau ia o nuu o Samoa e a latou le Sao Tama’ita’i pei ona ta’ua, vagana ai ni usuga a Aiga maualuluga o Samoa, mai anamua. Ao le oo mai o le uso, pe toalua, pe toafa foi ma le teine o Apaula, ma to’ai i gatai o Mulinuu i le motu o Upolu. O loo manatu nisi, e ui ina taunuu i Upolu le folauga ae mai Fiti le uso e toafa ma le teine o Apaula. 

3. O i ai ni fatuga pese a nisi o le Tuamasaga i Upolu, e mai Fiti le ‘auso ma lo latou tuafafine o Apaula. O le fe’e foi sa i le Tuamasaga i po o le Vavau, o le Tuifiti foi pei o talitonuga o Samoa. O loo ta’ua i upu tomua o le Autu, e felata’i le tele o upu Toga ma Samoa, pei o le igoa o Apaula. Ailoga e faamaonia o se igoa faa-Fiti ia Apaula? E ono moni foi le taofi o le uso Toga o Tatua ma Tano ma lo la tuafafine o Apaula, lea na faatasi ma Vaea. 

4. O le ‘ese’esega foi o nisi taofi, fai main a fono le ‘ava o tuagane o Apaula i le tama o Tuisavalalo a’o pepe. Ae taofi nisi, na tupu a’e le tama ma iloa e malosi, ona fasi la lea ma toilalo ai. La lea na mafua ai ona toe sau Apaula ia Vaea se’i taui le fasiga o Tuisavalalo. 

“A ou vaaia le ataata mu ma fatitoto peau o le sami ua iloa ua e oti, Tuisavalalo”

O le itu taua, o le faamaoni o mea vaaia na tutupu i aso o le Vavau. Atonu e le taua tele naua le auiliili pe mai fea le uso ma lo latou tuafafine, aua e le mafai ona tavaleina le eseesega o mau ma finagalo e uiga i fesoasoani tuuina mai, faapea ai ma molimau a nisi o le ‘Au Tusitala. 

 

Muagagana ua faaaogaina i le Tala:

1. “Ua tagi le fatu ma le eleele”

(a) lagona faanoanoa, faavauvau

(e) loto nutimomoia, le taulau le faamoemoe

2. “Ua tu mai le ataata mu”

(a) Upu o le faanoanoa

(e) Saafiafiaga o alofaaga (mf)

(i) Upu faanoanoa. Faailoga o le faanoanoa

(o) upu faataimua o se faalavelave a tupu 

3. “Ua gase toa – gase le toa”

(a) le toa aoga 

(e) uma le faamoemoe

(i) ua mavae atu – mou malie atu 

 

Alagaupu:

1. “Ua atoa tino o Vaatausili”

(a) Upu fiafia. Atoatoa ona lelei 

(e) se faamoemoe ua taunuu 

(i) manaia, matagofie, atoa ona lelei 

2. “Ua sau Apaula ua tautua”

(a) upu o lagona alofa 

(e) ua tuai: tautuapega ona taunuu 

 

Faamatalaga:

Afioga Seumanutafa, Gisa, le tofa a Togia ma nisi o tamalii ma failauga o Falealupo. Nisi foi o tamalii ma failauga o Neiafu i le motu tele i Salafai.

© Samoa Observer 2016

Developed by Samoa Observer in Apia