Manatu o le Fa’atonu - O le mea e tatau ona fai

156 Hits

Tusia: Mataafa Keni Lesa

Faaliliu: Ilia L Likou

 

O le lalata mai ai o le faigapalota tele  a le atunu’u e leai ma se isi e le’o fia fa’alogo i se fuafuaga e ono si’itia ai totogi, o se vaimalu lea i finagalo o le to’atele.

O se mataupu ua leva ona ta’utino mai ai le Vaega Fa’aupufai a le Tautua Samoa mo le fa’atinoina pe afai ae tula’i mai i le fa’afoeina o le atunu’u.

O ananafi i le lomiga a le Samoa Observer na fa’ailoa mai ai e le Ofisa Sili o le Iuni a Samoa i a Jerome Mika se mataupu taua e fa’atatau lea i le si’itia ai o totogi i le $3.

O lea vala’au ua tutu fa’atasi ai le Iuni lenei ma le to’atele o tagata ina ia fa’ataunu’uina lea o le sa’o ma le  fa’amaoni e ao ona fa’ataunu’uina.

 “O le si’itia ai o totogi o se vaega e ao ona fa’ataunu’uina ma ia tau fai laina tutusa uma ai tagata uma.” O le augani mai lea a Mika i se tala na tusia i le itulau o le nusipepa.

 “O se fiafiaga tele mo i matou le pulupululima fa’atasi ai lea ma le to’atele e fa’atagisia le malo mo se si’itaga.

 “A’o si’itia ai tupe maua a le tele o pisinisi aepeita’i e le’o ‘a’afia ai se si’itaga mo totogi. O le tele o le mau pisinisi lelei mai atunu’u i fafo o lo’o latou mitiia le lelei o Samoa aepeita’i o lo’o amo pea le pologa o’i tatou nei. 

Saunoa Mika, o le fa’atulagaina lelei o totogi o se itu e ao ona fa’atinoina aua galuega lelei uma o lo’o mafai ona tula’i mai.

 “Ae afai e le’o mafai ona totogi lelei le to’atele o tagata aua aiga ma afiaga, o lona uiga e le’o lelei le fa’atautaia o galuega i totonu o le atunu’u ma fale faigaluega.

 “E le mafai ona fa’agaloina nisi o vaega tetele ina ia aia tutusa uma i ai tagata. E le mafai ona o tatou avatua se totogi itiiti i se tasi o lo’o fia mana’omia le  ola lelei aemaise o le tausia lelei ai lea o aiga. E ao lava ona lelei totogi o tagata uma e tusa ma le mea o lo’o galue ai.

Mo le silafia ai , o vaega uma o lo’o fa’apea ona saunoa i ai Mika o lo’o laina tutusa ma le fa’amoemoe o lo’o ua i ai le tele o ofisa tu’umaoti ma le malo, ma o se maea talatala pe a talanoaina tulaga tau totogi o lo’o ua i ai nei – ma o lo’o silafia lelei lava e le to’atele o le atunu’u.

O lo’o o tatou talanoaina le tulaga pagatia ua leva ona asa mai e tele o tamā, tinā ma le to’atele o tagata o le atunu’u. Ia se’i aga’i atu la i le faletupe mo le talaina mai i tua o tupe o totogi ae iloa ai ua na’o ni nai tala o lo’o totoe ina ua ma’ea le tautiga ma le afu liligi mai galuega na gapatia ai i le la ma le timu.

Ese mai ai ma le tele o le mau fa’afitauli, ona e le maofa lea i le totogi i le 2.30 i le itula, ma fa’atusatusa atu i le maoa’e ua o’o ai le tamaoaiga ona e silafia ai le le fetaui tele – ma e leai ma se vaipanoa e ono sa’o ai lenei fa’atulagana.

E tatou te fai  talia le taua tele o lea vaega, ma o tausaga uma pe afai ae i ai se si’itaga o vaega nei tau totogi, e faitioina lava e le malo pisinisi tu’umaoti ona o lo latou tu’uina mai i luga o nei vaega uma.

E tau talafeuga vaega uma nei ma e le mafai ona te’ena se vaega e tasi.

O pisinisi tu’umaoti o i latou o lo’o fai ma lima ma vae mo le una’ia ai o tulaga tau i le si’itia ia o le tamaoaiga, o lona uiga o so’o se mea lava e ono tula’i mai mo lona fa’atinoina e ao lava ona faia ma le sa’o ae le’i tele ni  suiga.

O le mea e pito sili ona taua i le vaega lea o le malosiaga lea o pisinisi tu’umaoti e latou te sailia ai tupe aua se fa’aopopoga i le tamaoaiga o le atunu’u aua le sologa lelei o vaega uma o lo’o fa’alagolago ma ia aua ne’i alu alu tula’i mai se fa’aletonu.

O se itu taua le fesoasoani ai lea o le malo i pisinisi tuumaoti mo le una’ia ai o fuafuaga uma tau i le tamaoaiga o le atunu’u. O le mea muamua lava o le toe asia ai lea o lafoga lea o lo’o tele ina totolo ai le tele o pisinisi.

O le atunu’u i le taimi lenei, ona o le tetele ai lea o lafoga ae le gata i lea o le lafoga o lo’o fa’aopoopo i luga i tau o oloa.

O le tele o le taimi e talanoaina ai  e le malo le tele le o pisinisi tumaoti, o se vaega  malu ma le lelei i le malo  aua le fa’atupula’ia ai o le tamaoaiga. Ae o tupu ea ia vaega uma?

Afai o lo’o lelei nei vaega, e le tatau la ona to’atele i latou e le’o i ai ni galuega.

Aepeitai e le mafai ona fa’afaigata le  iloa atu ai o lona mafua’aga. Fa’amata o i ai se tasi o ona fesiligia le tulaga faigata o lo’o feagai mai pisi nisi ona o le tau o le eletise.? O lo’o taua le lauolaola lelei ai o pisinisi ae o le tau o vaega e ono mana’omia mo  le amataina ai o se pisinisi ua matua fa’ateleina.? E fa’apefea ona tupu lea vaega.?

Ia se’i o tatou mafaufau atu la i le vaega tau tagata tafafao maimoa mai fafo aemaise le galuega fita o lo’o gafa ma le to’atele o i latou o lo’o o latou umia le tele o le   mau faletalimalo i totonu  o le atunu’u lea o lo’o latou taumafai i le gata e mafai ai le tau saili o tupe aemaise ai le tau atina’eina o lea fo’i alamanuia o le atunu’u. E fa’amata e to’atele i latou e le’o mafai ona maua se moe lelei i le po ona o le tau le mafai ai lea ona totogi le mau nonoga tupe ona o le tau le i ai lea o e asia mai le atunu’u?

O le itu taua, e fa’amata e lelei i le malo le faitioina pisinisi i le taofiofia ai o totogi mai lona si’itia ai lea. Aepeitai afai e fa’atinoina lelei e le malo lana pito la’au mo le fausia ai lea o le tele o le mau avanoa lelei aua pisinisi ina ia atina’e ma olaola lelei semanu e leai ni talanoaga fa’apenei o lo’o faia.

Ia se’i o tatou mafaufau i le tele o le mau miliona o tupe ua ma’imau ona o le le fuafua tatauina o fa’atinoga aemaise o le alia’e mai pea o le mau pipi’o o lo’o maitauina ae o vaega nei e ao ona fa’aaogaina ma fa’asa’o lelei ina ia  mafai ona fesoasoani ai i le tele o le mau pisinisi tu’umaoti aua le si’itia ai o totogi.

E ao ona ou fa’amanatu atu vaega nei e ao ona silasila i ai e fa’atatau i le si’itia ai lea o totogi ma ia fai ma ta’iala ma alafua , e ao ona fa’atinoina i luga i le ‘atoatoa lelei, sa’o lona fa’atinoina ma lona fa’atulagana aemaise o le fa’amaoni, ma fa’atulafonoina lelei i luga o faiga fa’avae.

Ae sili ai le manatua ai o le vaega lea – fai le mea e te mana’o i le isi tagata e faia mo oe. Fesili i a te oe, o a ni ou lagona pe afai e na’o o le $2.30 lou totogi i le itula ae o lo’o e tigaina i le fa’atinoina o ou tiute i le po ma le ao?

© Samoa Observer 2016

Developed by Samoa Observer in Apia