E sili le fa’amalumaluga a matai
“O lo’u iloa e matua’i tele lava o le ‘ese’esega o le olaga o lo’o ola ma soifua ai o tatou tagata i le taulaga ma tua nei” Le tamā i a Sene Etipule, 40 le matua o le soifua o le afio’aga o Falefa.
I le fa’atalatalanoaga ai ma le Fofoga o Samoa na ia fa’ailoa le tele o le suiga ua i ai nei le tele o afio’aga e le’o i ai se faiganu’u ma le pulega a matai.
“Ia e pei ona o tatou silafia uma lava, ia o totonu o afio’aga ta’itasi o lo’o i lalo i fa’amalumaluga lenei, e lelei tele lea i a te a’u i lo’u ola ane ai i totonu o Samoa.
“Aua fo’i e leai se mea e fa’aletonu, e a’oa’o le tu, savali o le tautala ma le fa’aaloalo i mea uma, e leai se isi e malovale solo i luga o le auala aua ua mautinoa e le’o lea aganu’u ma e i ai nai fa’asalaga e fai pe ā fai e sasi.
“O le tele e fa’apea o pulega nei e le sa’oloto ai le tele o vaega e fa’atinoina e le tagata, ae o le’o lea le fa’amoemoega lea o nei vaega uma.
“E ala ona fa’atino , ia saogalemu ma manuia aiga uma, ia mafai ona toe timata le tele o vaega o le olaga ma le soifuaga o lo’o ua i ai nei i le tele o tatou tagata.
Na ia fa’ailoa o le isi itu e lelei ai nofoaga i afio’aga i tua o le iloa ai ona fa’atino o fe’au.
“Ia o nisi a o atu i le taulaga ma nonofo ai, ia a leai ni fe’au na o le feala ane lava i le taeao fa’asaga i le televise, a o’o la i le taimi e toe fo’i mai ia ua fiu e tau a’o atu ai le fa’atinoina o se feau.
“O tua i’inei e tele popo , o lauele’ele mo fa’ato’aga o fafie...ia a tele lava ua la’u loa le maketi mo se tupe.
“Ia a’u lava ia o nofoaga i le taulaga ia o le mativa o le olaga le mea e o’o ai , aua a leai se tupe e leiloa pe fa’afefea ona fai le olaga ona e leai ni fanua tetele e galulue ai.
“Aepeita’i o tua i’inei ia e sologa lelei lava mea , e tele fanua e galulue ai, fesoasoani ai aiga, a leai se tupe ae e mafai ona fa’aaoga talo o le ma’umaga mo mea’ai i le aiga.
“A oti fo’i se ina’i ia ae o lo’o lololo le fa’alifu talo ma le koko Samoa.