E mafaia pe ā loto i ai

Tusia Sarafina Sanerivi ma Ilia L Likou ,

147 Hits

Saulo Pito mai le afioaga o Uafato Fagaloa.

Saulo Pito mai le afioaga o Uafato Fagaloa.

Na fa’ailoa e le tamā i a Saulo Pito o Uafato Fagaloa o le galuega i le gaosiga o meataulima e le’i leva ona fa’atinoina e ia ma ona alo ma o se fesoasoani tele lea mo le aiga.

“O si o matou aiga e leai se isi o le aiga o faigaluega i le taimi lenei ma e pau lea o vaega o lo’o ua fesoasoani tele mo le aiga i le taimi lenei.

“E ui la e le’i leva ona amata ae o se tulaga e fa’afetai ai i le Atua ona o le fesoasoani mai, aua o a’u ma le aiga o nai tausaga i tua atu na omai ai i Uafato nei.

“O a’u ou te faipaolo mai nei, ia o le o’o mai ia e maitauina o le tele o aiga o le afio’aga nei o lea le galuega o lo’o tele ina o latou fa’atinoina.

“Ia na ou fa’apea ifo ia afai o lea le tupe maua le tele o aiga i’inei, a mea ou te le taumafai ai?...ia o le amataga lenā, ua ou alu maitau ia ma fa’apea ona fa’ata’ita’i atu ai ma le fanau.

“O lea la ua alu ai lava le taimi lenei.

Na ia fa’ailoa o le galueaina o meataulima e tele vaega e fa’atinoina.

“Ia e manatua e mamao le itu o le mauga o lo’o e silasila atu ai e aumai ai le la’au e fa’aaoga, ia po’o le ifi lele.

“Ua le maua gofie lea la’au , ia e a’e mauga ifo vanu.

“E le so’ona alu, e la’a lava ma tatalo i le Atua e fesoasoani mai ona e tele fa’afitauli...e pei o lea le tulaga e fa’atino i aso uma.

“Aua a o’o ina timuga aso , ia e alu lava aua e pau lea o le fa’amoemoega i le taimi lenei.

“O lea ua alu alu ia lea ua masani lava ma ua tele ina fa’atau atu tanoa palu ava nei.

O a ni fa’afitauli o lo’o feagai ma oe i aso uma?

“Ia e pei ona silasila mai , ia o mea faigaluega o lo’o fa’aaogaina  e mana’omia ai lava se fesoasoani ona e le lelei.

“O naifi o lo’o taumafai e vane ai le tele o meataulima nei e pei o tanoa.

“E i ai  le agaga maualuga a lelei maua ni meafaigaluega fou ia o le a fesoasoani tele mo a’u ma le aiga. 

© Samoa Observer 2016

Developed by Samoa Observer in Apia