Fia maua se isi galuega
O le maua ai o le fa’atalatalanoaga ma Hala Tavita i le aso ananafi na ia fa’ailoa ai le tulaga faigata ua i ai nei le soifuaga.
Sa galue o ia i se tasi o va’a fagota ma ole taimi lenei o lo’o ia taumafai ina ia su’e se galuega.
“Ia ua tatou iloa uma le tulaga faigata ua i ai nei Samoa, ma o se itu lelei tele lea mo a’u lava ia i lo’u iloa i ai.
“E tatau ai lava ona silasila toto’a i galuega e mafai ona o tatou fa’atinoina aua le tausiga o aiga.
E maua le fa’atalatalanoaga ma Hala ananafi o lo’o aga’i atu i le gataifale aua se i’a mo le aiga.
“Ia e pei o lea lava le tulaga o lo’o ua i ai aso uma, e pei o le sami lava o lo’o ua fesoasoani malosi aua le tausiga o aiga.
“E pei ona fa’ailoa atu le taimi muamua lava ua le toe faigofie nei aso, ua faigata lava ma ua tatau ai lava ona o tatou va’ava’ai i auala e mafai ona fesoasoani mai ai lenei vaitau o le le tagolima.
O le taimi lenei e to’atolu le fanau a Hala ma le tinā o le aiga.
“Ia ou te iloa lava e a’u ia o lea lava le tulaga o lo’o ua i ai le taimi lenei, e o’o lava i tausiga o aiga , a le poto le fa’asoa ia e ono tula’i mai se isi tulaga.
“Ae e pei ona fa’ailoa atu muamua , ia o le sami lava o lo’o ua tua ai le taimi lenei aua lava le tausiga o aiga i aso uma.
“A tele fo’i ua sau e fa’atau i tai nei, ia e pei o vaega nei o lo’o fai ma fesoasoani tele ma tapa i ai i taimi uma i lo’u ia iloa i ai le taimi lenei.
“O se itu lelei ma taua i a te a’u ia o le taumafai e ola ai lenei olaga ua i ai, e ui ina ua le toe faigfofie lava e o’o mai le taimi lenei.