Ia tele avanoa faigaluega mo Savai’i

Tusia Vatapuia Maiava ma Ilia L Likou ,

248 Hits

So’oalo Kome.

So’oalo Kome. (Photo: Misiona Simo)

‘O le fa’afitauli o lo’o ua ua i ai nei Savai’i ua tele ina ta’ito’atasi tagata o lo’o ua nonofo i totonu o aiga ae ua o atu uma i Apia.” So’oalo Kome Mene, 57 le matua o le soifua o Samauga.

O le aso ananafi i le fa’atalatalanoaga ma le Fofoga  o Samoa na ia fa’ailoa ai le tele o suiga o lo’o ua i ai nei ma ua avea ma nisi o suiga ma ‘a’afiaga o le soifuaga o lo’o ua i ai nei.

“Ia e pei ona silafia ai o Apia e tele galuega ma kamupani o lo’o i ai aemaise o fanau o lo’o ua tele ina o atu e a’o’oga ai.

“E pau lava le tulaga ia fa’atupula’ia avanoa faigaluega i totonu o Savai’i ma aoga ina ia fa’aititia ai lea tulaga,

 “Ou te iloa o le tele lava lea o mafua’aga ua o atu ai le to’atele  i Apia, ia o isi ua tele ina o atu i Apia ona o le tele o saoga, ua lelavava e isi tagata fai saoga tupe.

“Ia ae pei o aiga o lo’o i Apia e fesoasoani mai, a tele atu fa’alavelave ia ua logo  Niusila ma Ausetalia.

 “A i a a’u lava ia, a mafai e le malo na aumai nisi kamupani se tele, ia ou te lagona o le a  tele ni galuega mo tagata nei i Savai’i.

“Ia aua o le to’atele o tagata o lo’o Apia ia ua fa’aletonu ona o le tele o vaega o lo’o totogi, ae a tele ni kamupani i Savai’i nei ia ua maua galuega ma le so’ona feoa’i atu i Apia.

O le tele o fa’afitauli e feagai pe ā o atu i tua o aiga, o le isi lea fa’afitauli tele.

“Ia o nisi na o atu e su’e seleni mai Apia ia o atu feagai ma isi fa’afitauli o lo’o tupu mai ai.

“A le o lena ua le mafai ona fuafua lelei le tele o amioaga a tagata aua e leai ni faiga nu’u a matai i le tele o vaega o le taulaga.

“E pei ona silafia ai e toe lava o nu’u i tua ma Savaii o lo’o ola ai le aganu’u ma o so’u iloa lea ua i ai i lenei taimi.

“Ua ta’a’alo  lava isi tagata fa’asamasamanoa ma aumai ai ma uiga le talafeagai .

“Ia o le isi vaega e ao lava ona toe silasila i ai pulega a matai ma nu’u , ole taofia lea o le toe fa’ate’a o aiga pe ā sasala mai totonu o nu’u ma alalafaga.

 “Ua tatau ona silasila i i ai aua ua leai ni tagata o nu’u ma aiga, e le toe tatau ona i ai le fa’asalaga lea o le tutuli ua tatau ona i ai se suiga.

“Ia tu’u pea i totonu o nu’u, e a’oa’i , a’oa’i....lelei.

 “Aua a tuli atu i Apia, fo’i mai, ia e fo’i mai ua ova atu ma le leaga, e tatau ona fa’anonofo pea i totonu o nu’u ma afioaga e a’oa’i lelei ai.

“O le tama a le manu e fafaga i fuga o la’au ae o le tama a le tagata e fafaga i upu ma tala.

© Samoa Observer 2016

Developed by Samoa Observer in Apia