E mulimuli au galuega lelei i a te oe

Tusia Vatapuia Maiava ma Ilia L Likou ,

154 Hits

Elika Levao o Malifa ma Sale’imoa.

Elika Levao o Malifa ma Sale’imoa.

O le talitonuga lea o Elika Levao o Malifa ma Sale’imoa i le fa’atalatalanoaga ma le Fofoga o Samoa.

 “O lenei galuega ia o le tele lava o taimi e fa’amanuiaina ai, aua o le tele lava o vaega o lo’o fa’atinoina i le ava fatafata lava ma le alofa.” Elika.

O Elika o ia o se ave ta’avale laupasese i le taulaga ma o lana ia lea galuega o le feavea’ia o le mamalu o le atunu’u mai lea vaega o le atunu’u i lea vaega.

O ia o se tamā tausiaiga ma e to’aono ona alo ma le tinā o le aiga.

 “Ia  o lenei galuega e molimauina lava o le tele lava o le alofa e ofoina mo le mamalu  feafioa’i o le atunu’u ia e fa’amanuiaina ai a a’u ia i le tele o taimi.

“Ia aemaise lava i latou e fa’apea mai e le lava se tupe e totogi ai a latou pasese ia e tu’u ai lava le avanoa i ai, aua e uma lava totogi mai pasese…ia ua telē fo’i lona fa’asiliga.

 “Ia a toe totogi mai ia ua telē le tupe e maua mai ai.

O lona finagalo, o le galuega o lo’o ia fa’atinoina mo le tausiga o le aiga e telē lava lona ese’esega o tupe maua pe ā fua atu i le tausaga ua mavae.

 “Ua ou iloa ua i ai lava suiga o lo’o ua maitauina i le taimi lenei ai ona ua tele ta’avale la’upasese ua i ai.

 “E ui lava la ina tau fa’afefefe mai nei fa’afitauli ae fa’afetai i le Atua o lo’o i ai lava tagata o lo’o vala’au mai i la matou ‘au’aunaga i le tele o aso.

 “E le pei le tele o aso ua alu , o le tele o pasese o tagata fa’aletonuga e tele ina o matou aveina, ia ae lea ua alualu lea lava ua suiga malie lava ma lelei.

E ui lava ina solo lelei le tele o aso, ‘ia e i ai lava aso fa’ale-lelei ai fo’i’

 “O le tele lava o aso ia e maua lava le $100 pe sili atu fo’i, ia o lea tupe o lo’o tele lava ina fa’aalu mo mea’ai ia aemaise lava le tausiga o le aiga.

 “O le tele lava e mo le tausiga lava o le fanau.

O le fa’apipi’iina ai o mita mo ta’avale la’upasese o se tasi o itu o lo’o tau polepole ai le taofi o le tamā i a Elika.

 “Ou te le’o toe iloa lava se tala i le fa’apipi’iina ai o mita mo ta’avale la’upasese aemaise lava lona fa’aaogina.

 “Ia o lea fo’i faiga fou ia e i ai ona itu lelei ma itu fa’alelelei i lo’u iloa i ai, ia aua o le tele lava o le taimi ua fai lava i le alofa…ia ae o le mita ia o lo’o ta’u sa’o mai lava le aofa’iga o le pasese e tatau ona totogi.

 “Ia se’i va’ava’ai atu lava i ai i nei fo’i suiga po o le a se tala mai.

 “Ia ae o le tele lava o vaega o lo’o sologa lelei mea uma i le alofa ma le agalelei o le Atua, e pau lava le tulaga o lo’o i ai i le taimi lenei , ia na’o ao lava ou te faigaluega ai ae le o le po.

“O le fa’amoemoe lava  mea uma i le Tamā.

© Samoa Observer 2016

Developed by Samoa Observer in Apia