Mana’omia nisi avanoa faigaluega

By Vatapuia Maiava 27 September 2016, 12:00AM

O le fa’aitiitia ai o avanoa faigaluega mo le to’atele o le atunu’u aemaise o fanau aoga ua tele ina fa’ai’uina mai taumafaiga i le tele o Aoga Maualuluga o se mataupu e le fou i totonu o le atunu’u.

O le to’atele o le fanau aoga e i’u mai ma fa’ailoga tetele o lo’o ua maitauina le tau sa’ilia ai o ni galuega i le taimi lenei.

Fa’amata o fea tonu o lo’o taoto ai le fa’afitauli? Fa’amata o le le o lava e su’e galugea po o le  le lava o avanoa faigaluega mo le to’atele o lo’o i ai i le taimi lenei.

O le talitonuga o Filemu Vaito’o o le afio’aga o Faleasiu, ‘ua leai ni avanoa faigaluega mo le to’atele o tagata o le atunu’u.

O Filemu ua 30 nei le matua o lona soifua ma o ia o se ave ta’avale aua lava le fe’aveaina o le mamalu o le atunu’u.

 “O lou ia iloa i ai, ia o le le lava o avanoa faigaluega le fa’afitauli o lo’o feagai mai nei ma le atunu’u.

“Ua tele vaega fa’atino i totonu o le atunu’u ae o le fa’alavelave lea o lo’o i ai i le taimi lenei o le leai o ni avanoa faigaluega mo le to’atele o nai o tatou tagata.

 “E tatau lava i le malo ona fesoasoani lelei mo le to’atele o tatou tagata, ua laki le tele o Saina aua o lo’o tele avanoa e galulue ai mo le atunu’u.

 “Ae o le mea lea e tu’u atu pea i a’i latou o lo’o ta’imua mo le lelei o le atunu’u.

O le fautuaga a Filemu mo le to’atele o tupulaga talavou ‘ia aua nei fiu gofie’

 “O le feau mo le tupulaga talavou aua ne’i avea vaega nei e fai ma se pa e punitia le mea e ao ona fa’atinoina o le tausi lea i matua.

“Ia fa’amaoni i galuega ua vala’au e galulue ai aua le tausia ai o aiga, nu’u ma le ekalesia.

O le isi itu na ia fa’ailoa o le taugata ai o le tau o le soifuaga e pei ona i ai i le taimi nei.

 “Ua taugata lava nei aso.

 “Ae mo’i lava i le maitauina ai o vaega nei , o le fa’afetai i le Atua ona o lo’o fesoasoani mai e ui lava ua amata ona va’ava’ai atu i le $50 i le tausiga o le aiga i aso ta’itasi.

 “O le mea lava ia ia o le a le mea ua maua i lea aso, ia avea lea ma fa’amanuiaga mo le aiga.

 “O le taimi lenei o lo’o sologa manuia mea uma i totonu o le aiga..e to’atolu tagata matutua o le aiga ia ma le fanau e to’afa  o lo’o i ai nei.

 “E moni lava e le lava le tupe e maua le tele o aso ae a fa’asoasoa lelei lava a, ia e le taumate le solo lelei.

By Vatapuia Maiava 27 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>