LAUGA - “Omai inā vaai”

By Rev. Petaia Setu 27 August 2017, 12:00AM

Manaia le polokalame sa fausia e le Matagaluega o A’oga ma le Ofisa o tagata tafafao mai fafo, sa faatinoina ai e fanau aoga nisi o tala faa Samoa manisi foi o suiga i nei ona po.

O le pine lea o le manatu, e fiu e a’oa’o le tamaititi i totnu o le potu aoga e le malamalama, vaganā ua vaai tino mata i ata ma le faatinoga o taga. O le faanaunauga la lea o le polokalame, ia faatino, e malamalama ai; ia vaai tino, e iloa ma manino ai. O le taūa lea o le omai se’i molimau, ma vaai iai. Pau a lea o le faanaunauga o le fafine i tagata o lona nuu. Omai, inā vaai.

O lagona masani ia o le tagata. e faigata ona talitonu seiloga ua vaai iai mata. E moni lava i le faalogo, peitai o le vaai lava e mălie atoatoa ai. Fai mai le tupu fafine o Seepa ina ua vaai ia Solomona ma lona poto, “ Ua moni le tala na ou faalogo ai…” “Faauta, e itiiti mea na talaiina atu ia te a’u, ae tele mea na le talaina atu.” (1Tupu.10:6-7).

Ua talitonu ina ua oo mai ma vaai lava ia iai i le mamalu ma le poto o le tupu o Isaraelu. O le mea lea sa faananau iai Toma, fia vaai i le Iesu toetu. Ua vaai; ua lagona i le loto le moni. Ua ta’utino mai le loto talitonu, “Lo’u Alii e, ma lo’u Atua e. “(Ioane.20:27-28) O lagona ia faaletagata na faaosofia  ai le faanatinati atu o le fafine i le aai ae tiai le vai. Se’i logo le nuu ma aumai tagata uma sei vaai. Vaai i le atoatoa ua leva ona faalogo ai i ona tua’ā ma tala tuu gutu mai  anamuā! Se i vaai i le Moni ua na ta’ua mai ma faailoa mai mea uma sa tutupu, o loo tutupu, ma mea uma o le a tutupu! Pe le o le Keriso ea lea? “O a’u lava lenei…” (f.26) .

Samoa, o le inumaga sili lea o le vai ola o loo faananau iai lo tatou galala. Tau lava o sina matātulu o le suafa o Iesu ma lona soifua i lou loto ona e talitonu lea ma malamalama lou olaga. O le tali a Iesu (f.26), o si’ui ia o le talanoaga. Peitai o le taualuga, o le aumai o tagata. O le molimau ua amata. O le loto ua tatala. E le toe faatuaoia na o le fanau a Iakopo; a o tagata uma ua fia vaai ma faalogo. Oka, se manaia pe a faapea uma fafine o le tatou atunuu; e vae lise i le suafa o Iesu.

E faaaoga tatau le tautalatala, e molimau ai i nisi tagata le faaolataga. O le upu moni, o le tasi lea aposetolo o le talalelei a lo tatou Alii. O oe o se aposetolo? O mafai ona e talanoa I lau fanau ma lou aiga i le Faaola o tagata uma? Poo e faatalitali se i e alu i se Kolisi Faafaifeau? O le isi lea a’oga taūa ua a’oa’o mai ai lenei fafine ia i tatou uma. O lona faaaogaina tatau o le taimi ma avanoa ua ia maua. E le i faatali le fafine se i fai upu ma le ausoo. Ua le i fai mea tuu le tinā nei se i te’a ese atu le malaga. Ua le o lana utugā vai foi e faamuamua. E le i manatu se i talanoa taeao i ana uō ma tagata o le nuu i le mea nei- Lea. O nei lava. O le taimi nei. O le mau a le tusitala o le tusi nei, ua tuu e le fafine ana mea e utu ai vai. A o le avanoa lea e ta’u atu ai le talalelei ma aumai vave tagata e vaai. Se i vaai i le tagata n ate silafia mea uma e le mafai ona iloa e se tagata!

Faafetai ua maua e nei tagata ni avanoa taūa e vaai tino ai ia Iesu Keriso i ō latou taimi. A o ō tatou augā tupulaga Samoa, o le loto e talitonu a’e, o le vaai mautinoa lena e faaolaina ai oe (Rom.10:9). O nisi o tatou o le masau ia o le pupula i le vaiaso atoa; ae oo loa i le Aso Sa pepē loa mata, a ea? E tiotio mata i fale siva ma fale pia, ae fefe e pupula i se Tusi Paia! O le ’anau a le fafine, ia e iloa; ia lagona i lou loto; ia e talitonu; talia ma le loto maualalo, se i ’e molimauina!

O le vaai lenā o loo momoo iai le fafine nei. Vaai toto’a. Vaai mautinoa. Ia sa’o le tagata e vaai iai. Vaai i lelei ma manuia o le Alii. Vaai i lou saolotoga ia Keriso. Ia mamā le vaai. Vaai i le olataga mai le Atua mo oe ma lau fanau ma lou aiga. E sa’o loa lau vaai, lafoa’i loa lou tagata tuai. E tonu loa lau vaai, galo loa lou olaga tuai. Faauta i le fafine, ua tiai ana mea e utu ai vai; ua le fia talanoa i le vaieli; ua faafouina lona olaga, ina ua na maua le faaolataga. Ua galo le vaieli o Iakopo; ae ua vae vave i le galuega faaaposetolo. Ua le o toe manatu o ia o se Samaria, a o ia o le ave fu’a a le Mesia.

Le au uso e, e iai taimi e luagia ai la tatou vaai atu i le Atua. Ua iai foi taimi ua fāōa ail au vaai. E ono punitia le vaai i le tuinanau i mea o lenei olaga.  E ono avea foi a tatou tulafono faale lalolagi ma pulega faale tagata ma ala e mimilo ese ai o tatou mata mai le satauro o Keriso ae taulai i o tatou lava manaoga i’uvale. Fai ma le fafine, “… vaai i le tagta ua na ta’ua mai ia te au o mea uma lava ua ou faia” Le tagata ua na faamatala mai lo’u olaga matagā! O ia lea ua na ta’u maia a’u mea lilo uma! Ioe, o le Keriso lava lea. Auā na o le Keriso na te silafia mea uma lava; o manatunatuga ma loto o tagata; o upu foi, i le ma galuega uma lava.

Samoa e, vaai i le tagata na faasatauroina ona o oe ma a’u. O Lē na momomo fua ona o ā tatou agasala. Le tagata na amoina lau sala ma faasaolotoina i tatou uma! O ia ua fetalai mai, “O mai ia te a’u, o outou uma o ē tigaina ma mafatia i avega, o a’u foi e mālōlō ai outou (Mat.11:28).

E faapefea ona  e faamatalaina Iesu i lau vaai? Fai mai le fafine o Samaria, “Ua na ta’ua mai ia te au o mea uma lava ua ou faia.” Ae fai mai le toatele o e ua faatuatua ia te ia, “o i  matou lava ua matou faalogologo, ua matou iloa foi, e moni lava, o le Faaola lenei o le  lalolagi, ole Keriso lava.” (f.42).

O mai inā vaai, e te talitonu ai

 

Amene

7737063/7783782

By Rev. Petaia Setu 27 August 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>