Le-pisa pea le Palemia i fuafuaga mo Sogi

Tusia Lanuola Tusani Tupufia ma Fa’aliliu e Maiava ,

178 Hits

Ali’i Palemia, Tuilaepa Sa’ilele Malielegaoi.

Ali’i Palemia, Tuilaepa Sa’ilele Malielegaoi.

E o’o mai nei lava, e le o mana’o le Ali’i Palemia, Tuila’epa Sa’ilele Malielegaoi e fa’ailoa fa’alaua’itele mai i le atunu’u, fuafuaga a le malo mo ‘ele’ele o lo’o i Sogi.

E le’i mana’o Tuila’epa e ‘aumai se fa’amatalaga, po’o le a le mea o lo’o fuafua e faia i le ‘ele’ele lea pe a mae’a ona fa’ase’e ‘ese tagata o iai nei, i o latou fanua fou. 

Talu mai le 2011 ina ua fa’ailoa le fa’ai’uga lea a le Malo, na aga’i ai loa nisi o aiga sa i Sogi, i nofoaga ma ‘ele’ele ua i ai nei i Falelauniu. 

Peita’i, o lo’o iai pea i Sogi, aiga e le atoa le sefulu, e matua mumusu lava e o-‘ese. 

Saunoa Tuila’epa, “Ua mae’a lava ona fa’ailoa muamua atu le fuafuaga ma ‘ou te le-toe tali atu fo’i i se fesili e uiga i le mata’upu lea,” o le tali lea a le Palemia o Samoa. 

 “Toe fo’i e laga i luga fa’aaliga na tu’uina atu muamua e le malo,” o lana fa’aaliga lea.

“Ua mae’a lelei ona fa’ailoa atu e le Minisita sa iai i le taimi lea.” 

Na fesiligia Tuila’epa po’o ai le Minisita lea, ae musu fo’i e tali ma le-tu’uina mai ai lava se fa’amalamalamaga.

“O la’u tali lena, toe fo’i e sa’ili fa’asilasilaga na tu’uina atu muamua e le malo. E tatau lava ona maua i a tou fa’asalalauga sa faia muamua.

O le vaiaso talu ai, na fa’amautuina ai e Tuila’epa le le-suia o le mafaufau o le malo, i le ‘ave-‘esea o tagata o lo’o nofoia Sogi.

Na fa’aopoopo ai fo’i, ua mae’a ona fa’atonuina e le Kapeneta le Fa’alapotopotoga mo ‘Ele’ele a Samoa (SLC), e feagai ma tagata o lo’o totoe nei i le nofoaga lea. 

I se talanoaga ma le Ofisa Sili o Pulega a le SLC, o Ulugia Petelo Kavesi, na ia te’ena ai ni fa-fa-tala e uiga i se atina’e a le malo e faia i le ‘ele’ele lea i Sogi.

“’Ou te matua le-iloa se mea fa’apena ma e leai fo’i sa’u tala e fai,” o le fa’aaliga lea a Ulugia. 

I le tausaga e 2009, na ‘ave’esea fa’amalosi ai fo’i le kamupani a le Siva Afi mai ‘ele’ele o le malo i Sogi, sa nofo-lisi ai. 

Le ‘ele’ele tonu lea ua iai nei le Maota Fogafale-ono o Tui Atua Tupua Tamasese ‘Efi, o lo’o iai i tua atu, se nofoaga mo fonotaga ma se vaega mo ta’avale i ‘autafa.

Le taimi tonu lea na molita’i ai e le Pule o le Siva Afi, o Leota Lene i le Fa’amasinoga, le Matagaluega o Puna’oa Fa’aleNatura ma le Si’osi’omaga.

Na tu’ua’ia e Leota le malo ona o le le-aloa’ia o tu’utu’uga na faia, a’o lea o le a tutuli ‘ese e le’i o’o i le taimi e uma ai le aoga o le lisi.  Na lisiina e le kamupani a le Siva Afi le ‘ele’ele lea i le 2006 mo le 20 tausaga, ma iai fo’i le sa’olotoga e toe fa’afouina ai le lisi.

Na tula’i mai fe’ese’esea’iga, ina ua toe teuteu e le malo le Tulafono o le Aveina o ‘Ele’ele i le masina o Oketopa 2009, ina ia ‘ave’esea ai le Siva Afi mai Sogi, i le Aso 16 o Novema 2009.

O lea suiga sa tu’uina atu i le laulau-a-fono a le Palemene, e le Minisita o Puna’oa ma le Si’osi’omaga i lena taimi, o Faumuina Tiatia Liuga.

O teuteuga ia na tu’u ai le malosi i le malo, e ‘avea ai ‘ele’ele faitele ma ‘ele’ele umia-sa’oloto mo galuega faitele a le atunu’u. O le tu’uina atu fo’i lea o le malosi i le Minisita e faia ai se taui mo ‘ele’ele e ‘ave e le malo ma tapena fo’i se ‘auala e fa’atino alo’ia ai.   

E $462 afe tala le taui (tupe) sa tu’uina atu i le Siva Afi i lea taimi, ae na te’ena e le kamupani. 

O le fa’ai’uga a le Fa’amasinoga Maualuga ia Iulai 2013, na totogiina ai se taui e $748,186.15.

Na toe talosaga Leota ia Novema 2012 i le Fa’amasinoga Toe Iloilo ma o le fa’ai’uga na tu’uina mai ia Tesema 2012, na maua ai le totogi mulimuli e $1.769  miliona tala e tu’uina atu i le Siva Afi. 

© Samoa Observer 2016

Developed by Samoa Observer in Apia