Toe Manatu Tasi... Nofoaga Fou

By Fa’aliliu e Maiava 27 August 2016, 12:00AM

Toe mafaufau tasi lava… Na manana’o se Faletupe i le A’ai o Niu Ioka, e momoli sa latou teu-fugala’au, i se isi faletupe na si’itia i so latou fale-fou. Ae iai le mea na tupu. Na fe-sasia’i le Fale Fai-teu i le tusiga o le Fa’amanuia (card), ma ave-sese ai le card o lo’o iai ‘upu fa’apea: “E momoli fa’atasi atu ma a matou fa’amaisega mai le ta’ele o o matou agaga.” Na matua fa’ate’ia, lagona fo’i le maasiasi o le tama’ita’i fai-teu ma fa’ato’ese ai ona o lana mea-sese. 

Ae na atili lona popole, ina ua na iloa mulimuli ane, o le card sa tatau ona ‘ave i le faletupe, lea ua ‘ave nei i se maliu. 

Lea o lo’o tusia ai ‘upu nei: “Fa’amalo atu ona i lou nofoaga fou!” Lena tonu a e te silafia, le fa’ate’ia o le aiga o lē ua maliu, ina ua maua le card! 

Ta’oto la le itu-mālie, a o le tulaga moni lava lea e fa’amatalaina ai le mea e tupu, pe a tatou feoti. A’o tatou soifua ma ola i le lalolagi nei, o o tatou tino, ua na o ni fale lē-tumau. O le mau a foma’i, a tatou  aulia loa le 20 tausaga, amata loa ona fai-ifo o tatou tino ma fa’asolosolo malie atu ai lava se’ia o’o ina tatou feoti. 

E fa’asolo ina sinā o tatou lauulu ma to’ulu’ulu malie-‘ese; e mimigi le pa’u ma tele suiga o o tatou tino, o fa’ailoga uma o le matutua o o tatou fale le-tumau, e to’ulu’ulu ta’itasi ‘ese atu lava, ma i’u ina palasi atoa ifo i le palapala. Ae sa’olele, e leai a se tasi e sao mai lea vaega o le soifuaga!  

Peita’i, e iai o tatou agaga e le mafai ona mamate – a o’o la ina feoti o tatou tino, na ona suia lava o nofoaga tatou te iai ae fa’asolo uma atu i lo tatou nu’u tumau – e fa’avavau. 

O lē fea la e sili ia ‘Oe, o le fiafia ma saogalemu i le 60 sekone po’o le 60 tausaga? E na o se fa’atusatusaga lena o le pu’upu’u ma le sa’asa’a o le ola i le lalolagi nei, pe a fua i le ola e fa’avavau e fia miliona tausaga pe a mavae atu o tatou tino. 

Na fetalai manino lava Iesu, e na o le lua lava nofoaga tatou te iai, pe a uma o le ola nei: o le lagi po’o seoli. A o le filifiliga lena a tatou e fai, a’o iai pea lo tatou taimi i le nofoaga nei. 

Pe filifili tatou te e ola nei - pe leai fo’i, i le so’otaga lelei ma tumau na fa’asino mai e lo Tatou Matai – e fua iai lo tatou ola e fa’avavau i lo tatou nu’u ma le nofoaga moni. Manatua, na fetalai Iesu, o seoli o lo’o iai le taufai tagi-aue ma le lilivau o nifo, lea na mafua ai ona Afio mai e faia mea ‘uma, ina ia mafai ona Ia fa’amagaloina ma lavea’ia ‘Oe mai tiga e fa’avavau.

Afai tatou te filifilia le lagi, ua tatau nei ona tatou tatalo ia Iesu mo Lana meaalofa o le fa’amagaloga o a tatou agasala uma ma sese o lo’o ola ai. Tatalo ia pulea e Ia lou ola fou ina ia e ola ai i Ona ala tonu i aso uma a’o tatou iai i le nofoaga le-tumau nei, se’ia o’o i le nofoaga tumau e fa’atasi ai ma Ia. Afai e uma lou soifua i le asō, o e matua talitonu i le nofoaga o le a e se’e iai? Pe o le ola e fa’avavau? Toe mafaufau tasi lava…                                                              

 

By Fa’aliliu e Maiava 27 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>