O vi’iga lava ma le fia-kele ua pologa ai lenei atunu’u

Tusia Vatapuia Maiava ma Faaliliu e Maiava ,

149 Hits

TATAU LAVA ONA TOE FAI SE FA’ATATAU I LE TATOU AGANU’U: Molio’o Petelo Peters

TATAU LAVA ONA TOE FAI SE FA’ATATAU I LE TATOU AGANU’U: Molio’o Petelo Peters

E le-leaga le agaga mitamita o le Samoa ao-uliuli  i lona fa’asinomaga, lona aiga ma lana aganu’u, ae a sese loa ona fai ma so’ona-fa’amamafa, e matua ogaoga lava ona a’afiaga. 

O le fautuaga lea mai se tasi o faifa’ato’aga, o Molio’o Petelo Peters, lea na fetalai, “o le so’ona mimita sese lea ua mafua ai ona matitiva o tatou tagata.” 

O maliu e ta’i-fia afe tala e fa’aalu ai e o’o i fa’aipoipoga e le-taitai gafatia e le to’atele o tagata, lea na ta’ua e Molio’o, ua tatau lava ona toe silasila toto’a iai, e fuafua lelei i le tulaga e gafatia.

Na fa’amanatu mai fo’i, ua faigata nei aso ma ua tatau ona sui mafaufauga ma lagona o tagata.  

 “’Ou te fia talanoa lava a’u i le tatou aganu’u fa’aSamoa ma le a’afiaga e ono o’o iai nisi tagata,” o le fa’aaliga lea a Molio’o i le Samoa Observer, e fa’aalia ona atugaluga ona o le tulaga ua iai aso nei. 

“O le mea moni lea e tupu, o lo’o ta’afifili tagata ma le taugata o le soifuaga ma taumafai e tausi aiga ma fanau a o le tatou aganu’u lava lenei ua avea ma fa’atalua, ae maise mea nei o maliu,” o lana fa’aaliga lea. 

“O le to’atele o tagata i nei aso, e aga’i i maliu ma le ituaiga mafaufau fo’i lea, ia maua mai ai se manuia fa’aopopo po’o se mea-mama fo’i ona o le manatu fa’apea, o le aiga o tupu ai se fa’alavelave, e fia-iloa ma fia-tetele e le mafai ai lava ona te’ena latou nei ma mea o manana’o ai.  

 “Na o nai fesoasoani lava po’o meaalofa fo’i e o-mai ma tagata nei ae o’o ina toe fo’i, e o ma pusa-‘apa ma taumafa e sili mamao atu le tau i mea na latou ‘aumai; o nisi fo’i, e matua leai ni meaalofa e o-mai ma latou ae manana’o e manuia mai ai i se aiga o talimalo po’o tupu ai fo’i se fa’alavelave.

“O le se alofa moni lena mea, e le se fa’aaliga lea o se alofa ae maise lava i mea nei o maliu, le taimi o matua mo’omia e se aiga le alofa moni, ona o se tasi o le aiga ua fai-i-lagi le folauga. 

“A o le to’atele o tagata nei, e faigaluega ae taumafai lava ia maua se mea maua-fua mai isi tagata.” 

E talitonu fo’i Molio’o, e matua sese lava le fa’amamafa ua so’ona ave i mea pei o i’e o le malo, lea e masani ona lala’u ma taua’ao fa’ameaalofa i fa’atasiga ia.  

 “O le mea moni, e matua leai se aoga o ia mea,” o lona lea finagalo. “Atonu e aoga ma fa’atauaina e nisi, ae o le a lava le mea e aoga iai? Na o le tele ai o le pefu o pusa ma potu e teu ai.

“O pusa-eleni fo’i, e tele atu ona aoga aua e mafai ona taumafa e le tagata soifua ma ma’ona ai; ae ia a’u lava ia, e matua lapisi lava…o se lapisi e le-aoga.”

Na fa’aalia e Molio’o, e faigofie lava ona suia le fa’atinoga o isi vaega o le tatou aganu’u pei o faiga-meaalofa, i le potopoto ma si’i-fa’atasi le fa’afetai ma le Vi’iga o le Atua. 

 “Ia te a’u lava ia, pau le mea taua e tatau ona silasila iai, o le tautuaina o Le Atua,” o lana fa’aaliga lea.

“Tautuaina o Le Atua ae maise i taimi faigata, o le mea lena e tatau ona tatou fai, ae le o le taumafai e maua fua mai mea o le lalolagi nei; ma ‘ou te lagona, ua tatau ona suia le tele o mea o le aganu’u, i le na o le tautuaina o Le Atua Soifua.

“Ua tatau ona suia le ‘auala e fa’atino ai mea i Samoa nei; aua ua silafia lelei e tagata uma le faigata o le fa’atinoina o ia mea pei o maliu ma ua tatau lava ona mafaufau iai tupulaga o le lumana’i.

 “E tutupu ma ola ane a tatou fanau ma faigata nei o lo’o tatou fa’afeagai i le taimi nei pe a tatou le-faia o se suiga.” 

O le finagalo o Molio’o, ua leai se alofa i le mea tonu e tatau ona iai le alofa ma o vaega nei o le tatou aganu’u, le ‘autu ma le mafuaga o nei fa’afitauli uma.  

“Ua tatau ona taofi uma nei mea; o le uiga o se tala, a o-mai nisi i maliu, ‘ave na o sina meaalofa ‘ae ‘aua le mafaufau e toe maua mai ai se mea. O le mea sa’o lena ma lelei,” o lana fa’aaliga lea.

 “A’o nei aso, pau lea, e na o si tama’i lauga fa’amaise e fai mai, ae manana’o e toe fo’i ma se mea e sili atu, pei o tupe po’o pusa eleni se tele.

“Tatau ona fa’aali le alofa moni i a tatou tu ma aga, ae le na o le mana’o i mea maua-fua ma mea-mamā.” 

© Samoa Observer 2016

Developed by Samoa Observer in Apia