manatu o le Fa’atonu - O le Tau o le fulitua i le mana’o ina ia fo’ia faiga pi’opi’o

Tusia Mata'afa Keni Lesa ma Faaliliu e Seagaitumua Tupuola ,

119 Hits

A e lolo’u se fasi la’au o se laau malŏ ma le umī, e i’u lava ina gau. E pei lava o soo se mea e felelei i luga- e toe pa’u’ū uma mai lava i lalo, ma e peiseai e tau faapena le soifuaga.

Tatou te selesele i mea na tatou lūlūina. A tatou tilotilo i nisi o lu’itau o loo faafeagai ma lenei atunuu i aso nei ma lenei vaitau, pe o se mea tau polokiki, tau tamaoaiga, faale-agaga poo le a lava, ua faigata lava ona fulitua i lea manatu faavae faatasi ai ma le manatu e faapea- atonu lava o le a avea nai suiga autu itiiti tatou te le’i faatinoina, ma taunuuga -lea e ono matua ese ai.

O se itu lea e ofo ai ona e leai se mea na tatou faia, o loo totogi e i tatou uma lava se tau e matua maoa’e mo ia mea i le taimi nei. 

O le mea moni, e tatai lava ona matua aoaoina le malo le mea moni mata’utia-o le le faaaogaina lea o ia lesona-faatasi ai ma le maoa’e o le aitalafu i fafo ma faafitauli uma e mafua mai lona le mafai –ona ia matua faia o se faiga lelei e faafeagai ai ma faiga pi’opi’o ma le faitau miliona ma million ua maumau-talu ai le faatautala  o lona faaluina o tupe mo elefane papa’e ia ua tatou vaaia o loo si’omia ai tatou. 

O le manatu lea matou te fia faailoa atu iinei e faapea o loo i ai se tulaga mata’utia mai totonu. Matou te talitonu e tatau ona toe faamanatu atu i o tatou taitai poo le a le tulaga tonu o loo latou faafeagai ai ma faiga pi’opi’o, faaaoga sese ma le faaaoga e le tatau ai o le paoa lea o loo afaina ai le vaega toatele o tagata o loo aupito i sili ona afaina ai i totonu o lenei atunuu.

O le faapea ua faigata le soifuaga ua na o se faaupuga e le talafeagai ai. O le Soifuaga e sili atu i lo le tulaga faigata, e matua faigata mo le toatele o tagata. Vaai i le tulaga o tagata fai faatoaga, tina ma latou fanau matitiva ma tulaga faigata latou te uia i aso uma-ina ia mafai lava ona maua se tala poo le lua i totonu o Apia ma Salelologa.

Silasila i le faatupula’ia o tagata Samoa-o soo se matua i tausaga-ia ua faa-pologa e fetaufetulia’i solo i le taulaga e faatau atu pine, apa inu, twisties ma fagu faamanogi ‘ea ae saofafa’i o latou “pule mai fafo” i le paolo ma ao le tele o a latou tupe. Mafaufau i le tau faavae o le soifuaga ma auaunaga faavae.

O le a le pasene o ia faaopoopoga e avea ma taunuuga o le faatautala, faiga pi’opi’o ma le faafoeina o galuega a le malo? Mafaufau pe o faapefea ona faatiga lafoga i tagata uma aemaise ai lava pe a manaomia i latou e totogi lafoga i aso uma se’ia o’o lava ina totoe na o ponaivi.

E le o se matua le alofa ‘ea lena mea pe a manaomia tatou e totogi lafoga i nofoaga uma i totonu o lenei atunuu i aso nei, ae o lea ua tatou iloa e faapea o le tau o le soifuaga, le tau o auaunaga faavae ma le tau faavae o mea aoga-o loo faaauau pea ona faaalia ai le matua leai o se alofa e o’o lava i le agaga ua matua olopalaina?

Tama’ita’i e ma alii,  e i ai lava se tagata-poo ni tagata- e noatia ona o lenei tulaga pagatia. Ma e tatau i le malo ona na tauaveina se uta tele o nei faaseā-talu ai lo latou matua le kea i ai ma leai ma so latou mafaufau e uiga i le fai o le mea sa’o e fesoasoani ai i tagata. 

O le itu ua matou maua e aupito i sili ona faalumaina ai o le uiga lea o le lē lea o loo faaalia e uiga i nei faafitauli- e nisi o tagata faigaluega o le malo-ia a fua i o latou manatu faaaliga faalaua’itele-o loo faaalia ai le matua le kea lava i le tulaga pagatia o tagata.

O nisi nei o ia alii ofisa sa faa-tautoina ina ia fai le mea sa’o e tusa ai ma le vaai a tagata ma lona Atua, ina ia puipuia aia tatau faasili a tagata –ia na faafaigaluegaina ai i latou-e auauna atu i ai. I aso nei, e i ai le mafuaga tatou te talitonu ai –latou te le o auauna atu i tagata tonu lava ia.

Ua matou fai atu faapenei ona i le avea ma sui masani o tagata lautele ia o loo tauivi ona o le fiaola i aso uma –e aofia ai pisinisi ma le faitau afe ma afe o tagata faigaluega e faalagolago ia i latou- e leai se foliga e iloa ai e talia e le malo lea tulaga.

Ua matou fai atu faapena talu ai-i le avea ma sui o tagata lautele ia o loo tauivi ona o le fiaola i aso uma-e aofia ai pisinisi ma le faitau afe ma afe o tagata faigaluega e faalagolago ia i latou –ae leai se foliga e iloa ai e talia e le malo e faapea o se vaega o lea faagasologa, o lana amio pe afai e te loto i ai-ua avea lea ma vaega tele o lenei tauiviga. 

Ia ‘aua nei galo ia i tatou le faaaoga sese, faaalu faatautala ma le faaalu sese o le faitau miliona ma miliona o tala-ia semanu e mafai ona faaalu e fesoasoani ai i ia tagata-e pei ona faaalia manino e le Pule ma Su’etusi Sili i totonu o lana lipoti i le Palemene mo le 2009 ma le 2010.

O mea na maua i totonu o lenei lipoti sa faamaonia manino i le faagasologa o se suesuega a le Komiti o Alii Ofisa o le Palemene ia na fautuaina  le fai o se faiga faale-tulafono e faasaga i alii o ofisa o loo tuua’ia ai. 

O lea matou te talanoa atu i le faitau miliona ma miliona o tala. Ma o nisi o nei galuega tetele e le o mafai ona faatino-ua amata ona pulato’a mai i o tatou foliga i aso uma, ae peiseai o se faamanatu lea e uiga i le mana’oga mo le amiotonu lea e tatau ona faatinoina. 

O le a la le mea o loo faatali i ai lenei malo? O afea o le a latou tuu ai nei taaloga tau polokiki ae faagasolo i le mea e tatau ona fai mo le amiotonu moni ina ia faatinoina? Faamata tatou te feagai ma le faatiga talu ai nei a Lauitiiti Tualima pea na faaaoga se vaega o ia tupe na faamaonia i le lipoti a le Pule ma Su’etusi Sili –e fau ai se pa lelei?

A tatou mafaufau i lea tulaga, aisea tatou te faa-falepuipui Joe lea na gaoia le 50 tala ae faataga isi e faaaoga sese le faitau miliona ma mili ae o lea e feoa’i sa’oloto lava?

I totonu o Samoa i aso nei, o loo i ai se elefane i totonu o le potu ma o taimi uma lava e le faia ai se fuafuaga i ai, e le toe mafai lava ona tatou faagasolo i luma i le avea ma atunuu. Ua tatou iloa le mea moni, latou te iloa foi le mea moni. E na o le “vale ‘aipopo”na te le o vaaia le mea moni o loo tupu. 

Ma e te faapea pe aisea ua anoanoa’i ai a tatou faafitauli lautele ma lu’itau tau le tamaoaiga. Tatou te le o soifua ‘ea i se soifuaga lea e matua taua ai pene uma? Ma o le a le mea ua tupu i le faigamalo ma lana mua’au faalele lauiloa o le faimea tonu, mautali atu ma faigamalo lelei.?

Sa matou faailoa atu muamua lenei tulaga ae o le a matou toe fai atu foi iinei. O loo i ai tagata fai mai e tatau ona fai o tatou pulou faa-Kerisiano, faamagalo ma faagalo mea ua te’a ae faagasolo i luma. O nei upu o le matua lapisi lava. 

E i ai lava le taimi mo mea uma. Ae ia matau mai, O le Atua Silisili Ese-e matua mautinoa lava- na te le talia le fai o mea sese, aemaise ai lava pe afai –e faapologa ai ona tagata pele. O le Atua  o le amiotonu uma lava ma mana’o i le mea moni. Ia ‘aua lava ne’i galo ia i tatou lena upu moni.

© Samoa Observer 2016

Developed by Samoa Observer in Apia