‘Otegia e le Palemia le Faipule Savai’i
Maua lelei lava le mea-mama a le na avea muamua ma Minisita o Tupe, o Faumuina Tiatia Liuga mai le Ali’i Palemia, Tuila’epa Sa’ilele Malielegaoi, i le Fono a le Palemene i le vaiaso talu ai.
“Ae le’i toe faia lava se isi au fa’aaliga, mafaufau i le taimi sa e iai,” o le saunoaga lea a Tuila’epa. “’Ou te le-toe fia o’o i mea na tutupu i aso ua mavae. Na ‘ou manatu lava e te le toe laga mea ia, ma ‘ou te fautua atu ia te ‘Oe, ia mafaufau loloto iai.”
O lea fe’upua’iga na tupu i le talanoaina o le Tala o le Tupe 2016/1017, ina ua fesiligia e Faumuina ta’utinoga sa fai a le Malo mo le atina’eina o Savai’i.
O le fa’amanatuga e Faumuina i le Ali’i Palemia ma lana faiga-malo, o ‘upu-masani a le HRPP, o le “mea e lelei mo Upolu e lelei fo’i mo Savai’i”, na saunoa ai, ua tatau ona fa’ataua le atina’eina o Salelologa, i se tulaga maualuga.
Na fa’atusatusa e Faumuina i le motu o Upolu, ma ta’ua ai, e leai ni avanoa i Savai’i ma o le mafuaga lea o le to’atele o tagata Savai’i ua malaga mai i Upolu nei.
Na ta’ua fo’i le taua o le avea o le Uafu i Salelologa o se uafu fa’ava-o-malo, e fa’atosina atu ai le tele o pisinisi i Savai’i.
“E leai se pisinisi e fia o’o atu i Salelologa ona e fai lava si taugata o le fela’ua’ina o oloa mai Apia i Savai’i,” o le fa’aaliga lea a Faumuina.
Na taula’i lana pupula i le Minisita o Tupe, o Sili ‘Epa Tuioti, o le faipule fo’i mai Salelologa ma una’ia malosi, ina ia fa’amuamua le atina’eina o le Taulaga o Salelologa.
Na ta’ua, o le ma’umauga o le taimi o faipule mai le motu tele, pe a mae’a atu fo’i lenei paea’iga a le Palemene, ae leai lava se atina’eina o le Uafu i Salelologa.
“Tatou o-tatou i Savai’i e fa’atu le tatou malo ona o lea e foliga mai, o lo’o fa’aitu’au pea le malo i le fa’atinoga o le atina’eina o motu nei e lua,” o le fa’aaliga lea a Faumuina.
Na fa’aopoopo atu fo’i, ua tatau i le malo ona fa’ase’e atu nisi o ‘au’aunaga taua e pei o le falema’i ma le Ofisa o Leoleo, mai Tuasivi i Salelologa, ina ia matua faigofie ai mo tagata o lo’o papa-a’ao i Salafai.
Peita’i, e le’i tatagi-malie i fofoga o Tuila’epa lea ituaiga-musika. Na matua te’ena lava e le Palemia lea tulaga ma fesiligia ai Faumuina, pe aisea na ia le-faia ai mea ua tautala ai, a’o avea ma Minisita o le Kapeneta.
“Sa avea muamua fo’i ‘Oe ma Minisita o Tupe,” o le fa’amanatu lea a le Palemia. “Ae ‘aisea lava i lea taimi umi, na le-tau ai lau va’ai i atina’e ia?”
Na tu’usa’o e Tuila’epa ia Faumuina, e sili ona lafo atu lana talosaga i le malo ona o mea ia sa tatau lava ona ia faia a’o iai tonu i le tulaga lea, e faia ai fa’ai’uga mo le aga’i i luma. I ona taimi, sa avea ai Faumuina ma Minisita o Galuega, Feso’ota’iga ma Galuega Tetele a le Malo, o le Minisita o Puna’oa Fa’aleNatura ma le Si’osi’omaga fa’apea le Minisita o Tupe.
Ina ua tali mai i le Palemia, na saunoa Faumuina, e le’i iai lava sona avanoa e fa’atino ai poloketi ia.
“E le’i tele ni poloketi fa’apea sa ‘aumai ‘ou te galuega ai,” o lana fa’aaliga lea. “O le mea lava e finagalo iai le Kapeneta, o mea na e ‘ave iai le fa’amuamua. Ae o le taimi la lenei ua tatau ai ona taula’i le va’ai, i le atina’eina o Salelologa.”
Na fa’ailoga atu fo’i e Faumuina, o ia na amata le fausia o le uafu i Salelologa a’o avea ma Minisita. Ae na alu ‘ese loa mai le matagaluega lea, taofia loa galuega. O le mafuaga lea o lona una’ia o le malo, ina ia fa’amae’a le poloketi lea.
Ae na te’ena e Tuila’epa lona mana’o.
“Na e alu-‘ese mai le mea sa e iai ma avea ma Minisita o Tupe. O i’ina sa tatau ona e taumafai ai e una’i ai le poloketi lea ia vave ona uma.
“Ae e te le’i toe faia lava se isi fa’aaliga, mafaufau lelei i le taimi sa e iai.”
E le’i fa’amanino mai le uiga o lea saunoaga.
Ae le’i taofia ai fo’i Faumuina. Sa ia fa’amanatu mai fo’i taimi a’o avea ma Minisita o Tupe, sa ‘ave ai lava le fa’amuamua a le malo i galuega fa’aleleia ina ua mae’a le Afa o Evani, lea e faselau miliona tala ($400 miliona tala) le tupe na fa’aaluina ai.
Na toe tula’i mai le Ali’i Palemia ma saunoa, o le taimi lava e a’afia ai le atunu’u i se fa’alavelave fa’aleNatura, o le taimi fo’i lea e ‘ave ai le fa’amuamua a le malo, i galuega toe-fa’alelei. Lona uiga, e taofi uma isi poloketi.
“’Ou te le-toe fia o’o i mea sa tutupu i aso ua mavae,” o le saunoaga lea a le Palemia. “Na ‘ou manatu lava e te le toe laga mea ia, ma ‘ou te fautua atu ia te ‘Oe, ia mafaufau loloto iai.”
Na toe tula’i fo’i Faumuina ma saunoa, e ala ona ia laga mata’upu ia, ona e talitonu, e taua tele ma aoga mo tagata Savai’i – pei fo’i o tulaga o lo’o fiafia ai tagata i Tumua nei, ma saunoa ai, ua tatau i le malo ona silasila toto’a i le fa’atuina o se lala o le Iunivesete Aoao o Samoa i Savai’i.
Na ta’ua fo’i, o avanoa tauPisinisi e maua ai galuega ma tupe-maua, e fa’ateleina ai pea tagata e si’itia atu i Upolu. O le fa’atuina fo’i ma le si’itia o tulaga tauA’oa’oga, o le a to’atele ai tamaiti Savai’i e o’o i luga i Iunivesete.
“’Ou te fa’amanatu atu fo’i, o le mea e lelei mo Upolu, e lelei fo’i mo le motu tele o Savai’i,” o lana saunoaga lea.
Na talosagaina fo’i e le Sui o le Palemene mai Palauli i Sisifo le malo, e uiga i le vaega o feso’ota’iga tetele fa’aInitaneti. Na ta’ua, o le tasi lea o poloketi e talitonu e manuia ai Samoa, ae maise lava i tulaga tauA’oa’oga aua o le a maua ai e tamaiti-a’o’oga i Savai’i, avanoa, o metotia ma ‘auala ‘ese’ese ae maise o faia’oga i Upolu e fa’asoa atu ma maua ai fesoasoani e mo’omia .
O lea ‘au’aunaga e aoga fo’i mo le Matagaluega o Fa’amasinogaa ae maise o Fa’amasino e mafai ai lava ona galulue mai Upolu mo ni mata’upu i Savai’i, e fa’atinoina i luga o feso’ota’iga televavave.
Na mulia’i i saunoaga a Faumuina, lona fa’apea mai, o le avea ma faipule o le Palemene, o la latou matafaioi lea, o le fa’amanatu i le malo o poloketi e mafai ona maua ai o se suiga tele e fa’aleleia ai le soifua o le lautele o tagata Samoa.