O Lau Teuga-tupe Aupito Telē

Tusia Fa’aliliu e Maiava ,

140 Hits

Toe mafaufau tasi lava… A fa’apea o taeao ta’itasi uma e teu ai e se tagata i lau tusi tupe, le tupe e $86,400; ae a o’o i le po ua ‘uma le aso, a e te le’i fa’aaogaina ona toe ‘ave’ese uma lea o tupe o totoe, ‘ae ‘ave susunu. E talitonu a, o le a e matua taumafai lava e fa’aaoga uma le $86,400 i aso ta’itasi uma – ia ‘aua ai lava ne’i ma’umauina se tupe e susunu!

Pe talitonu iai pe leai, ae iai lau tusi tupe e fa’apena tonu lava. Peita’i o lau tusi, e tumu i isi mea e sili mamao atu lona aogā i lo tupe: o le taimi. A uma lou taimi, ua ē leai ma le lalolagi. A lē fa’aaogāina, ua ma’umau. O taeao uma lava, e 86,400 sekone le taimi e avatu mo Oe, o lau fa’alumagā-taimi lena. A o’o i le po, o taimi e le’i fa’aaogaina i le aso atoa, ua leiloa ma lē-toe maua mai. “O taimi ua alu, e le-mafai ona toe maua mai.” O le mafua’aga lena e tatau ai ona tatou taumafai e fa’aaoga tatau o tatou taimi i mea tonu ma mea e aupito lelei. Manatua: “A ē taumafai e fa’auma le taimi, o le pule lena i le ola – auā o lou ola e fafau mai le taimi.”

O le mea lea e le tatau ai ona fa’ama’umauina o tatou taimi i mea lē-aogā ma mea lē-tumau. E telē tele tupe tatou te totogi, ae laititi tatou te maua. O a la mea silisili, mea lelei e aoga iai lou taimi ma le ola?

E numera tasi se paga o le fa’aaoga o ou taimi mo tagata. E uma ane lou soifua, a e te le o salamō ona o taimi sa e fa’aalu mo lau fanau, lou to’alua, ou uso ma tuafafine, ou matua ma uo. E le gata i lena, a e te le salamo fo’i i le taimi na e fesoasoani ai i isi tagata i ou tua’oi, i lau galuega ma e fo’i e te le-masani ai. O le ‘ave o lou taimi mo tagata, e fa’amanuiaina ai oe, aua o fa’amanuiaga mai lau fa’alumaga-taimi, o le a fa’aopopoina pea ma saga fa’ateleina ai lava.

O le isi faiga-lelei o ou taimi, o le fa’aalu lea i Lē na avatua le taimi atoa o lou ola. Na faia oe e Le Atua ina ia fa’asoa mai Lona soifua matagofie mo Oe. Na Afio mai lava e fa’aali atu ia ‘Oe Lona Soifua, o Ona ala lelei fa’amalie-loto na faia mo ‘Oe. O le tele la o ou taimi e mafuta ai ia Iesu, o le tele fo’i lea o lou iloa o le ola manuia ma le ola lelei. O le mea moni, na Ia ta’utino mai lava, a fa’aaoga lau 86,400 sekone i aso uma e ola ai mo Ia ma isi tagata, e o’o ane i le itula ua leai sou taimi, ua avea Oe o se tagata silisili ona fa’afiafiaina i Lona tamaoa’iga fa’ale-Agaga. 

Ae fa’afetai, aua o lo’o maua pea le avanoa a’o tatou ola pea, auā e le’i tuai tele ona sui! Ae a le asō, ae amata ai? Tatalo mo Iesu e fa’amagalo Oe, ma fesoasoani atu ina ia amatamea Ia i se suiga lelei, i le fa’aaogaina o lou taimi o totoe. Na o Ona ala lava e mafai ai ona e saogalemu i Lona Soifua e fa’avavau i le itula tonu e uma ai lou taimi. Toe mafaufau tasi lava…

© Samoa Observer 2016

Developed by Samoa Observer in Apia