Ui e le’i manuia taumafaiga a le Ikale Tahi mai le Malo o Tonga i le Aso To’ona’i talu ai, a o le silasila a lana ‘Au-tapua’i, e numera tasi lava tamasi’i-Tonga.

Na fa’aailoa e le nisi o le ‘Au-tapua’I a le Ikale Tahi i le Samoa Observer ina ua ma’ea le ta’aloga, sa matua fiafia lava i le ta’a’alo a le latou ‘Au, e ui ina malolo i le Manu Samoa. 

“O a’u o le Samoa ao-uliuli a ua ‘ou o’o mai lava i le Apia Park i lenei aso, e avatu la’u lagolago i lo’u atali’i-fa’aleTulafono, o le Tonga o Tasileta Tagilima. 

 “Mai lava i le amataga o le ta’aloga e o’o i le fa’ai’uga, sa matua manaia lava ui sa iai nai mea-sese, nai fa’aletonu laiti, ae na manaia tele. 

“E fa’afetai ai lava i nai tama-ta’a’alo uma mai le Malo o Tonga.

Na fa’aalia fo’i e le isi tina-Tonga, o Sophia Silva, “e siamupini a Tonga”.

“O a’u ua fa’aipoipo i se ali’i Samoa ae tumau pea lo’u fatu i Tonga na fanau ai, ma o le mafuaga lena o lo’u sau e tapua’i le matou ‘Au,” o lana fa’aaliga lea.

“Pei lava o lea ua ‘ou i Tonga ina ua malaga mai nai tama e ta’a’alo i lenei aso i Samoa, tusa lava po’o le a le i’uga ua iai – ae mo le matou ‘Au mai Tonga, fa’afetai lava, malo le ta’alo fa’atausala, ua ta mimita lava ia ‘outou tamasi’i. 

Mo le tapua’iga a le atunu’u, na ta’ua e nisi, ua tele lava se suiga lelei talu mai le ta’aloga ma Fiti ma Georgia, ae mo’omia lava le fa’aleleia atili. 

“Manaia tele le ta’aloga, ae tele fo’i mea e ao ona fa’aleleia, e tatau ai i le pulega ona silasila lelei i vaega ia pei o le malosi, ia lava lelei le manava, ae maise ia fa’aleleia fo’i le togiina o le polo i totonu,” o le fa’aaliga lea a Toleafoa Taulemoe mai Leone. 

“Tele lava ina mamulu atu ma fao fo’i e Tonga le polo pe a togi i totonu e le Manu Samoa.

“Ae ui lava i lea, e fa’amalo lava i nai tama, lelei mo le tatou ‘Au ma e momoli ai le fa’afetai ona o le finau. 

“Fa’afetai lava i ‘Au uma e lua, manaia le ta’aloga.

To Lolani Tamaleaoa from Vaoala, ‘the game was spectacular’

E o’o fo’i ia Lolani Tamaleaoa mai Vaoala, na fa’ailoa lona fiafia tele, “’ese le manaia o le ta’aloga.” 

“Manaia tele le ta’aloga, e fa’amalo ai i ‘Au uma e lua, ua silasila Samoa i se tasi o ta’aloga mata’ina ua faia i o tatou fanau, ma o se fa’afiafiaga lelei fo’i lea mo le atunu’u. 

“E leai se tala tele e toe faia, na o le fa’afetai lava i tama o le Manu, le Kapeteni ma le ‘Au atoa, le Susuga a Alama ma le pulega o le ‘Au. Fa’amalo lava,

“Ua malie le va’ai, ua fa’amalieina fo’i le atunu’u atoa!

O nisi nei o va’aiga sa iai i le Apia Park i le Aso To’ona’i talu ai.