Amata galuega o le Maota fou o le Palemene

Tusia Lanuola Tusani Tupufia ,

205 Hits

AMATA O LE MAOTA FONO FOU: Le Ta’ita’i o Tofaeono Peter Savea ma lana vaega mai le konekarate faufale a le Craig Construction, ua amata tepenaga mo le maota fou o le Palemene.

AMATA O LE MAOTA FONO FOU: Le Ta’ita’i o Tofaeono Peter Savea ma lana vaega mai le konekarate faufale a le Craig Construction, ua amata tepenaga mo le maota fou o le Palemene.

Lea ua amata ona fa’agasolo galuega mo le fausia o le maota fou o le palemene i le Malae o Tiafau. E ui i le leva o fa’atalitali mo se seleni ma tuai fo’i ona fa’asalalau o tauofoga, a’o lea ua amata le galuega. 

O ananafi sa iai le ‘au-faigaluega a le konekarate faufale a le Graig Constructions i Mulinu’u e fuafua ma tapenapena le fa’atinoina o lea galuega.

SAUNIGA FA’AI’U I LE MAOTA TUAI: Totonu o le Maota o le Palemene i le 2015.

SAUNIGA FA’AI’U I LE MAOTA TUAI: Totonu o le Maota o le Palemene i le 2015.

Sa fa’atalanoa e sui o le Samoa Observer le Ta’ita’i o le ‘Au-kamuta, o Toafaeono Peter Savea ma ta’ua ai, o lo’o galulue le ‘aufaigaluega e tapena le nofoaga e amata la’u atu iai mea e mo’omia mo le galuega.

E tumau ai pea le fa’avae o lo’o iai nei o le fale tuai.  

O le isi mafuaga o le tuai o galuega, ona e fa’alua ona fa’asalalau tauofoga mo lea poloketi. 

Na ta’ua e Tofaeono, o le ulua’i fa’asalalauga lava na manumalo ai le Craig Constructions. Sa toe fa’asalalau fa’alua, lea ua manuia ai le latou kamupani. 

SAUNIGA FA’AI’U I LE MAOTA TUAI: Totonu o le Maota o le Palemene i le 2015.
SAUNIGA FA’AI’U I LE MAOTA TUAI: Totonu o le Maota o le Palemene i le 2015.

“’Ou te talitonu na ala ona toe fa’asalalau ona e le’i fiafia le Kapeneta i le ata na avatu muamua,” o lana fa’aaliga lea.

“Ao le taimi lona lua la, na toe iloiloina ai ma talia ai loa…e sili teisi atu i le 20 miliona tala ($20,000,000.00) e fa’atupe ai e Ausetalia ma le tatou malo.”   

E le’i mamao atu sa ta’ua ai e le Palemia, Tuila’epa Sa’ilele Malielegaoi, o le poloketi lea sa ofo Ausetalia latou te faia, o se meaalofa mo le Fa’amanatuina o le 50 Tausaga o le Tuto’atasi o Samoa.

Peita’i sa iai fesuia’iga o le malo o Ausetalia na mafua ai ona faigata ma tuai ai ona fa’agaioi.  

O le isi fa’aletonu na tula’i mai, ona sa fa’aitiitia vaega-tupe a Ausetalia mo fesoasoani i atunuu i fafo.

“Ae sa ‘ou toe fa’amanatu la le poloketi lea i le Sui Palemia o Ausetalia ina ua ma feiloa’i ma sa ia fa’amautu mai, o le a toe talanoaina i sa latou fono,” o le fa’aaliga lea a Tuilape’a i se talanoaga e le’i mamao atu.

“Na ‘ou fai iai, i le tatou aganu’u fa’aSamoa, e ta loa se tatau a se tagata, o se matua fa’alumaluma lava ae le ‘uma.” 

E le’i umi na’ua le feiloa’iga lea a Tuila’epa ma le Tama’ita’i Sui Palemia o Ausetalia, ae fa’amatu’u mai loa le tupe ma le talitonuga, o le a iai fo’i le sao o Samoa mo lea poloketi.

O le Maota Fono tuai o le Palemene, sa tatala aloa’ia i le tausaga e 1972, o se meaalofa mai le malo o Niu Sila. 

Na tu’u i lalo i le masina o Aokuso o le tausaga talu ai, ae sa fuafua e amataina galuega mo le Maota Fono fou, ia Novema o le tausaga talu ai.

© Samoa Observer 2016

Developed by Samoa Observer in Apia