Tala-mālie ma talagā-gafa i le Tatalaina o le Ta’amilosaga Ta’ito’afitu o le Sisigafu’a 2016

Tusia Vatapuia Maiava ,

258 Hits

Ali’i Palemia, Tuila’epa Sa’ilele Malielegaoi

Ali’i Palemia, Tuila’epa Sa’ilele Malielegaoi

Leai se isi faiga aupito sili ma manaia e amata ai se ta’amilosaga iloga fa’apea nai lo le faia o se savali tele a latou uma o le a ‘auai, se’i maimoa uma iai le atunu’u.

Tasi lea vaega mata’ina e fa’amatagofie atili ai le fa’amanatuina o le tuto’atasi i lenei tausaga, o le Ta’amilosaga Ta’ito’afitu Fa’ava-o-malo o le Sisigafua a Samoa, le SII 7’s.

Na tumutumu le taulaga i le mamalu o le atunu’u – fa’apea fo’i nisi mai fafo – e fia matauina taualumaga ma le gasologa o le Ta’amilosaga lea e amata i le fa’ai’uga o le vaiaso nei, ae maise, le fia matamata fo’i i ‘Au a le atunu’u fa’apea ‘Au mai fafo, a’o savavali i le taeao nei i a latou toniga masani ma fu’a ‘ese’ese o atunu’u e malaga mai ai. 

O le solo tele i le taulaga na ta’ita’ia e le Fa’aili a Leoleo, soso’o ai ma ‘au uma o lo’o ‘auai i le ta’amilosaga na savavali atu i luma-maota o le Fale Tele o le Malo sa fa’atalitali mai ai le Ali’i Palemia, Tuila’epa Sa’ilele Malielegaoi ma le malo, e tatala aloa’ia lea fa’amoemoe.

Na laualuga i le fa’afofoga a e sa ‘auai i lea fa’amoemoe ananafi, saunoaga tu’u-sa’o a Tuila’epa  sa momoli atu ai le fe’au mo ‘au-ta’a’alo uma, lea na iloga le aoga ma manino ia fa’ala’ei’au ai e pei fo’i o ana saunoaga malie ma fa’a’Ata’ata ua masani ai, ae maise fo’i le ta’ua o nisi o tala teu-lililo o lona tupu’aga.

“Ia e maua le fatu o se Toa ma ‘aua le fefe,” o lana fautuaga lea.

“Tatou te mo’omia ni tama-ta’a’lo e si’ia i luga le maualuga o le Ta’ito’afitu i Samoa nei; ‘ou te fa’amanuia atu ma fa’amalo ia ‘outou uma o le a ‘auai i lenei ta’amilosaga.   

 “Ua sili atu ona tele suiga ua iai nei nai lo tausaga ua te’a. Ua tele ‘au ma o lo’o ‘ou va’aia pea ‘au nei mai fafo, o lo’o taumafai mai lava tatou te fai-fai-mea fa’atasi i le ta’amilosaga o lenei tausaga. 

“Fa’aaoga lelei le fa’ai’uga o lenei vaiaso, e fa’afiafiaina ai ‘Oe ‘ae ‘aua le fa’alagolago mai i le malo e tau-fafaga ‘Oe. Fa’aaoga lelei le avanoa lenei e fa’alauiloa atu ai taleni a o tatou tupulaga talavou, ae ‘aua le fa’ama’umauina.”

Na ta’ua fo’i e le Palemia: “Ua fa’ailoa mai ia te a’u e latou o tapenaina le fa’amoemoe lenei, o le ta’amilosaga aupito manaia lea ma mata’ina o le a iai, talu ona amataina i le tolu tausaga talu ai,” o lana saunoaga lea.   

 “E mafua ona o le tele o ‘Au lelei mai fafo ua ‘auai ma finau mo le fa’ailoga muamua.

A tilotilo atu i lo’u itu taumatau, e tau la’u va’ai i le ‘Au mai Fiti; le siamupini mata’utia i lakapi ta’ito’afitu i le lalolagi.

“Ua ‘ou fa’alogo e iai ‘au mai Ausetalia… lea fo’i ‘ou te va’ai atu i le ‘Au a tama’ita’i i lo’u itu taumatau. ‘Ou te fia iloa pe tou te le’i va’aia lava i parataiso i se isi nofoaga, pe o lea fa’atoa tou feiloa’i ma iloa ina ua taunu’u mai i Samoa nei.” 

Na fa’amālie saunoaga a le Palemia ma ofo atu ai le sa’olotoga i ‘Au mai fafo e nonofo ai i Samoa nei pe a mae’a le ta’amilosaga. 

“O lo’u lava mana’o, ia tou nonofo i’inei,” o lana saunoaga lea. 

 “A le-mafai, ona tou o-lea e va’ai a matou tagata i le vaega mo pepa-malaga, e fiafia lava e fesoasoani ia latou e fia ta’a’alo mo Samoa. 

“E o’o fo’i ia ‘outou mai Fiti, e silia i le afe tausaga talu ai, sa tatau ona avea o tou tua’a, o tagata-Samoa, e o’o fo’i ia te a’u, o a’u o se tasi e tupuga mai le Tui o le Motu o Lakeba ma o le mafuaga lena o le vala’au o a’u, o Tuila’epa.

Na fa’ai’u le saunoaga a le Palemia i lona tatalaina aloa’ia o le Ta’amilosaga Ta’ito’afitu.

“Ia outou maua se ta’amilosaga fiafia ma ia manuia ‘Outou uma.

“Ua ‘ou tatala aloa’ia nei le Ta’amilosaga.” 

© Samoa Observer 2016

Developed by Samoa Observer in Apia