O le a ‘uma le pologa o Leonē

Tusia Ilia L Likou ,

151 Hits

Le Ali’i Palemia, Tuila’epa Fatialofa Dr. Sa’ilele Malielegaoi o lo’o fa’amatamata le Senatoa Ausetalia o Brett Mason i le auala laupapa na fa’aleagaina e le Afa o Eveni i le 2012

Le Ali’i Palemia, Tuila’epa Fatialofa Dr. Sa’ilele Malielegaoi o lo’o fa’amatamata le Senatoa Ausetalia o Brett Mason i le auala laupapa na fa’aleagaina e le Afa o Eveni i le 2012

Ua amata ona toe fiafia le mamalu o le atunu’u i nofoaga pei o Leone, Ma’agao, Fa’ato’ia ma isi ona e le o toe mamao ae toe fo’i o latou soifuaga i le tulaga sa masani ai, e fa’afetai ai i le malo ma le fa’asalalauga, o le a toe amata galuega mo le fa’aleleia o le ala-laupapa i le masina fou.

Na matua alaga fiafia le tama’ita’i-faiPisinisi o Anita Wilson o Leone, ina fa’alogo i le fa’asalalauga lea a Tuila’epa. 

“Sa fai se fonotaga ma sui o le malo i le amata o le tausaga nei,” o lana fa’aaliga lea.   

 “O ina la na fa’ailoga mai ai, o le a amata galuega o le ‘ala-laupapa ia Iuni.

“Ia te a’u o se faiPisinisi, na matua ‘ou fiafia lava aua o la’u pisinisi le tasi sa tapunia ina ua mae’a le Afa o Eveni.

“O le pisinisi lea sa fa’amoemoe tasi iai lenei aiga mo tupe-maua, ae na matua leaga-faia lava ina ua tapuni le ‘auala-laupapa.

“’Ou te iloa e le na o matou na a’afia ai.

Na ta’ua fo’i e Anita, pau lona mana’o o iai nei, ia vave mae’a le fa’aleleia o le ‘auala laupapa. 

“Ua tuai galuega a ua leva ona matou sauni e toe amata lelei le pisinisi ae maise le mana’oga ia fa’alelei le tautua pe a toe amata.

“Lea fo’i ua tilotilo ina ia toe maua a matou tagata-fa’atau masani sa iai.

“’Ou te fia fa’afetai atu i le Ali’i Palemia ma le malo, o se tala fa’amalieloto tele ua fa’afiafiaina ai o matou tagata.

Na ta’ua fo’i e Sauta Tolua o Leone lava, o le tuai lava o le toe fa’afouina o le ‘auala laupapa, ua mafua ai ona tele a’afiaga o nu’u tu lalata iai.

“Matou te mo’omia tele le ‘auala-laupapa,” o lana fa’aaliga lea.

“O le mea sili, ua iai se mea e fa’amoemoe iai. Ua a’afia uma pisinisi i lenei itu o le taulaga…pei lava ua leai atoa nisi mea ina ua leai se ‘auala laupapa.

“O lo’o talotalo ia toe fo’i lava i le mea sa masani ai a’o iai le ‘auala laupapa tuai.

O le konekaratek a le China Railway First Group Fiji Co. Ltd, ua fa’amatu’u iai e le Kapeneta le toe fausia o le ‘auala laupapa. 

E fa konekarate sa tauva mo le fa’atinoina o lea galuega. Na faia se iloiloga a le Komiti mo Tauofoga, ‘ave ai se fautuaga i le Kapeneta mo sana fa’ai’uga. 

I le tausaga e 2013, sa tele ina le-fiafia tagata o lea nofoaga – e aofia ai ma Anita Wilson, ona o le tuai o fuafuaga a le malo mo le toe fa’aleleia o le ‘auala laupapa lea. 

“Na ‘uma atu le Afa o Eveni, ae amata ona gasolosolo mai ma latou mea-pu’eata u’umi ae na pei e foliga mai sa na ona tapu’e ata ma tilotilo i le ‘Auala Laupapa i Leone, e fuafua ai le faiga o se isi ‘auala laupapa,” o le manatu lea o Anita.  

 “E matua fa’aletonu tele lea mea, matou te le-manana’o i ni tagata pu’e-ata; matou te manana’o i ni inisinia e toe fausia le ‘auala laupapa.” 

“O a’u o se tagata faiPisinisi ua tau leai se tupe e maua mo le aiga, ma e le na o a’u fo’i o lo’o a’afia ai, o lo’o a’afia uma tagata o lenei nofoaga.” 

 “Pei lava ona tou va’ai mai, o ogala’au la na ta’atitia ai lava mai le amataga. Pei ni ogala’au-‘auro e fa’amanatu ai le Afa o Even I,” o lana fa’aaliga lea.

“Ua le tumutumu mai tagata fa’atau e maua ai tupe, a’o ua tumutumu mai i le ‘auala laupapa lea, tupulaga talavou ma a latou fagu-pia e onana ma pisapisao ai i lea nofoaga,” o lana fa’aaliga le-fiafia ona o le tuai ona toe fa’aleleia o le ‘auala-laupapa.

© Samoa Observer 2016

Developed by Samoa Observer in Apia