Teena e le Sui Faatu ua le faamanuiaina lona moliaga
O se tasi o sui faatu mo le Faiga Palota Lautele ia Mati o le tausaga nei o Tu’ula Kiliri Tuitui na tula’i i luma o le Faamasinoga Faa-Itumalo i lenei vaiaso.
Na tuua’ia o ia i le fai o se ta’utinoga sese i le Ofisa o le Komesina o Faiga-Palota. O lenei mataupu na tuuina au i luma o le Alii Faamasino o Vaepule Vaemoa Vaai, faatasi ai ma Iliganoa Atoa lea na auai e avea ma sui o Auaunaga Tau Moliaga a le Atunuu ma Leota Su’atele Manusegi lea sa fai ma sui o Tu’ula.
O le Aso Lua na teena ai e Tu’ula lona le nofosala i le moliaga e faasaga ia te ie ma o lea mataupu ua toe tolopo i le aso 1 o Aokuso 2016 mo le fofogaina.
O Tuula o se tasi lea o sui faatututu mo le Faiga Palota na faaleaogaina e Lana Afioga i le Faamasino Sili o Patu Tiava’asu’e Falefatu Sapolu ina ua mae’a le fofogaina o lona tulaga agavaa e avea ai ma sui faatu mo le Itumalo o Lepa.