Fa’ateteleina le fa’amalosi-teine

Tusia Pai Mulitalo Ale ,

157 Hits

Fofoga o le Matagaluega, Maotaoali’i Kaioneta Kitiona

Fofoga o le Matagaluega, Maotaoali’i Kaioneta Kitiona

Ua fa’aulu i le Matagaluega o Leoleo se tagi a se tina talavou e 28 tausaga, ona o faiga-fa’atautala na fa’atino e se ali’i e 27 tausaga le matua, i lana tama-teine na o le fa (4) tausaga. 

O lea solitulafono le-mafaufau na fa’amaonia mai e le Fofoga o le Matagaluega, o Maotaoali’i Kaioneta Kitiona i le fonotaga a le Matagaluega o Leoleo ma vaega fa’asalalau. 

Na ta’ua e Maotaoali’i, o le fa’alavelave lea na tupu i le Aso 20 o Me ma sa ripotia mai le motu tele o Salafai.

E le’i mafai ona tu’uina mai o fa’amatalaga e uiga i le ua molia ona e tilofia ai si teineitiiti na a’afia. ‘

Na fa’amaonia mai fo’i, o le ali’i ua molia, e leai sona pi’itaga i le tina na faia le tagi ma si ana tama na a’afia. 

E lua fo’i isi mata’upu tau-fa’amalosi-teine fa’apea na ripotia i Leoleo i le Aso Lulu 18 o Me 2016.

Saunoa Maotaoali’i, o le tagi muamua e mai se tama’ita’i e 18 tausaga sa a’afia, e fa’asaga i le to’alua o lona uso.

O le fa’alavelave lea na tupu i le Aso 01 o Ianuari o le tausaga nei lava. 

O le ua tu’ua’ia, o lo’o molia fa’atasi ma lona to’alua – le uso o le na a’afia – ona o le taupulepule fa’atasi e fa’atino lea mea sese.

O le a tula’i lea ulugali’i i luma o le fa’amasinoga i le Aso 6 o Iuni e tali i o la moliaga.

Na ta’ua e Maotaoali’i, na silafia lelei lava e le faletua o lana susuga lea, le mea na tupu peita’i, sa nofonofo lelei ma fa’ataga-leiloa, ma o le mafuaga lea o le molia fa’atasi ai i lenei solitulafono matuia. 

O le isi ripoti o feusua’iga fai-fa’amalosi, na tupu i le masina o Aokuso o le 2015. 

Ta’ua e le Fofoga o le Matagaluega, o le na a’afia o se teineitiiti e 15 tausaga le matua sa fa’aulu lana tagi e fa’asaga i lona tama-fai, e 27 tausaga le matua. 

O lo’o taofia pea la e Leoleo le ua molia ma o le a tula’i i le Fa’amasinoga i le Aso 6 o Iuni mo le va’ala’uga muamua o lana mata’upu. 

Na fesiligia pe mafua i se a le tuai ona o’o atu o le ua molia e ripotia lea fa’aletonu, ae saunoa Maotaoali’i, e tele lava mafuaga e le vave ripotia ai e teineiti ma latou e a’afia fa’apea, ia fa’alavelave e tutupu ia latou.

O nisi e fefefe i fa’amata’u sa faia e latou na a’afia ai, ae maise ai le popole ne’i iloa e tagata faitatala o le lalolagi o Samoa mea e tutupu ia latou.

© Samoa Observer 2016

Developed by Samoa Observer in Apia