Ia e ola i mea ua e maua

Tusia Aruna Lolani ma Fetalai Tuilulu’u ,

155 Hits

Maligi Aoao mai le nu’u o Tanumapua.

Maligi Aoao mai le nu’u o Tanumapua.

Ina ua ma’ea le fa’atalatalanoaga a le Fofoga o Samoa ma se tasi o tama ia Maligi Aoao, sa manino o lenei tama o ia o se faifa’ato’aga galue malosi ma o se faifa’ato’aga tausa’afia fo’i.

E 40 lona matua ma e nofo o ia i Tanumapua.

Sa ta’ua e Maligi le tele o suiga o le olaga ua iai ma  e taua lava le tumau o le tagata ia i lona fa’asinomaga.

E to’alima le fanau a Maligi; to’afa tamaiti a’oga ma le pepe o le aiga.

“O a’u o la’u matafaio o le faifa’ato’aga, o se mea fo’i ou te lelei ai.

“E tau le su’esu’eina se galuega aua o le fa’ato’aga a le tali ma e mana’omia fo’i e le tina o le aiga se fesoasoani i le va’aiga o le fanau.

“Ua tele a suiga o le olaga ma ua vave fo’i le alu i luga o le soifuaga.

“E taua a i le tagata ia ona galue a o ia ma lona aiga.

Sa ta’ua e Maligi o le ma’umaga a le tali o mea’ai ma le tali o se seleni mana’omia.

“O le ma’umaga e tua iai mo mea’ai. E fa’ato’a fa’atau atu ni meamata pe a fa’apea ua mana’omia vave le tupe.

“E ala lea i taimi e mana’omia ai se eletise po’o se mea e mana’omia e le fanau.

“Ae o lo’u a’u ia talitonuga lea e lelei mea uma i le taimi nei, lelei le eletise ma le vai. E mo’i a e iai taimi e pe ai le vai, ae e le umi fo’i ona fa’apena.

“O le matou aiga o se aiga laitiiti, a lava a le fa’alifu i le aso ma le iputi koko Samoa, ua lava ma totoe. Ua ma’ea fo’i le aso.

“O le olaga nei, ua fai lava sina saoasaoa, a e le iloa ola i mea ua e maua, ia e leai sau mea e maua. 

© Samoa Observer 2016

Developed by Samoa Observer in Apia