Teena e Tuala Iosefo lona nofosala

Tusia Lanuola Tusani Tupufia ma Faaliliu e Seagaitumua Tupuola ,

217 Hits

Tuala Iosefo Ponifasio

Tuala Iosefo Ponifasio

O se sui faatu mo Gaga’emauga Nu.1. o Tuala Iosefo Ponifasio, na ua na teena lona nofosala i ni moliaga se iva o faiga tau faasese ma le faafoliga e faasaa ia te ia e tusa ai ma le Faiga-Palota Lautele. 

I totonu o le Faamasinoga Faa-Itumalo ananafi, na ia talosagaina foi ina ia soloia ma faaleaogaina ia moliaga. 

O ia moliaga na faaulu e tagata palota o le itumalo, e pei o Faataunuu Malautea, Felagolagoma’i Tino, Ituao Enele, Taulamago Simone, Tevaga Samilolo ma Va Ve’a.

O loo fai ma o latou sui le loia o Ruby Drake. Ina ua tulai o ia ananafi i luma o le Faamasinoga, Sa teena e Tuala lona le nofosala i ia moliaga uma. Sa tulai o ia mo ia lava ma na faailoa atu i le Faamasinoga e faapea o lana loia o le a auai i le taimi e amata ai le fofogaina o lea mataupu.  

“Ou te talosagaina se faatagaga e fai ai se talosaga ina ia faaleaogaina ia moliaga uma,” o le faaaliga lea a Tuala. 

Na talia e le Alii Faamasino o le Faamasinoga Faa-Itumalo o Lei’ataualesa Daryl Clarke lea talosaga. 

O le moliaga muamua e faasaga i le itu tete’e na faaulu e Faataunuu Malautea.  

Na ia ta’ua e faapea o Fepuari o le tausaga nei na folafola atu ai e Tuala o le ana faia se fuafuaga mo se faaunegatupe e faamae’a ai le fausia o se falesa i Le’auvaa faatasi ai ma le faia o se fuafuaga  mo se vaega tau ‘apu mai le ekalesia e malaga i Niu Sila  mo le faamoemoe e faatosina ai sui o le ekalesia e palota mo ia ma o lea ua na faia ai se solitulafono tau le faasese ma le faatosina.. 

I se isi mataupu e ese ai i le faaiuga o Fepuari i Samalaeulu, na tuua’ia foi le sui faatu i lona tuuina atu o le $500 ia Vaifale Faasalafa ina ia tufafuta atu i tagata sa auai faatasi ai ma le faamoemoe e faatosina ai o ia e palota mo ia. Sa faapea foi ia Mati, na fai e le itu tete’e se solitulafono e ala i lona sui sooupu- e ala i faiga tau faasese ma le faatosina e ala i le tuuina atu o fale e mau i, taumfa ma ala tau femalagaina i tagata palota o Gaga’emauga Nu. 1.Pe tusa o Fepuari i Le’auvaa, na tuua’ia ai foi Tuala i lona tuuina atu o le $100 ma le faamoemoe e faatosina mai Ituao Enele e palota mo ia. 

Na ta’ua e Taulamago Simeone e faapea o Fepuari i Malifa-e tusa ma le to’asefulu tagata palota na tuuina atu i ai se tupe e $200 ma isi e ta’i  $100 a le tagata.  

 O le isi faalavelave na tupu i Vailele pe o Mati faatasi ma le auai o le tusa ma le 80 tagata palota –lea o loo tuua’ia ai Tuala i le tuuina atu o tupe i sui o lana komiti mai le $100, $50, $40 ma le $30 tala ina ia tuuina atu i tagata palota. Na ta’ua foi e Tevaga Samilolo e faapea o Mati i Samaleulu i se potopotoga a le nuu na talo e le itu tete’e, na ia “folafola ai ma faalauiloa muamua o le ana tuuina atu punavai tau aoaoga e faaleleia ai a’oga uma.”

E tusa ai ma lea moliaga, sa folafola atu foi e le itu tete’e ina ia “mautinoa e faapea o le taui o le a totogi atu i tagata e ou fanua ia o le a ave mo le fausia o se ala laupapa i totonu o le nuu. O lona tolu –o le ana totogiina pasese i le vaalele mo le 20 tagata ua tusia i le lisi e o i Niu Sila e tau ‘apu ma o le mea mulimui, o le a na amataina se konekarate moavao i Samalaeulu ma maua ai galuega mo tupulaga talavou o le nuu…..

O moliaga mulimuli na faaulu e Va Ve’a e fasdino i se faalavelave i Samalaeulu ia Fepuari lea e ala i se sui sooupu o Tulafa na tuuina atu se $50 tala.

Na tuua’ia foi e Va Ve’a e faapea i le isi taimi i Samalaeulu na tuuina atu ai ia te ia le isi $50 tala e se sui o le sui faatu. Sa teena e Tuala lona nofosala i ia moliaga uma ma o loo tuu-sa’oloto nei o ia se’ia aulia le aso 3 o Me.

© Samoa Observer 2016

Developed by Samoa Observer in Apia