O le tulafono faigofie lava a le lima matua e faapea afai ua matua lelei lava e avea ma mea moni, e masani lava ona faapena.

O le lapataiga mai le Faletupe Tutotonu o Samoa ma le Faletupe o le ANZ ananafi e uiga i gaoioiga tau faasese e tusa ai ma faiga pi’opi’o tau tupe e faatino i le initeneti-ua matua talafeagai ma le taimi.

E tatau ia i tatou uma ona aloa’ia lea lapata’iga. E ui lava ina o lea tulaga e le o se mea fou, ae matua taua tele ona iloa lelei ia faiga pe a fua i lona tulai mai pea ma le tele o faiga o loo faaaoga e ia tagata tau faasese e faatosina atu ai tagata e afaina ai latou te le o iloa lea tulaga.

O le mea amoni e faapea o nisi o i latou e matua uiga ese i le faatosina o tagata ma o le a faate’ia oe pe a e iloa le toatele o ia tagata-e aofia ai nisi o tagata e matua atamamai lava-ia o loo pagatia ai ma e o’o ane i le faaiuga-ua faavalea.

O loo tupu i totonu o Samoa, talitonu i ai pe leai! 

O le pogai lea e tatau ai ona faafetaia faletupe mo le faatinoina o lea gaoioiga faanatinati e lapata’ina ai a latou paaga-ma sui uma lava o tagata lautele e tusa ai ma lea mataupu-talu ai-o i tatou uma lava o tagata ia e afaina ai ona nei fuafuaga faale-alofa. 

O nei faiga tau faasese ua ui se taimi o faataamilo pea iinei. O manatua le faiga pi’opi’o a se tagata Nageria ma isi lava ituaiga i aso ua mavae? Ia-e ui lava i se gaoioiga tele faava-o-malo ina ia titina le galuega a nei tagata solitulafono, ae ua latou le mafaia lava ona taofia ia faiga.

E pei lava ona faia e le tekonolosi se suiga tele i tausaga ua mavae, o ia faiga pi’opi’o ua liua i totonu o ni faiga fou, ma faaaogaina ai ni faiga lavelave e sili atu e faasese ai oe ma tupe o lou afu maligi.

I totonu o Samoa i lenei vaiaso, ua lapata’ia e le Faletupe Tutotonu ma le Faletupe ANZ sui o tagata lautele ina ia matua faaeteete –ona o faalavelave tau faiga sese i tupe e faaliliu mai ma isi lava gaoioiga tau faasese ua matua faateteleina lava i totonu o Samoa.

E tusa ai ma lea lapataiga, o se tasi o faiga fou o loo faasese ai tagata-o se faiga tau faasese lea mo tupe e auina atu. E faapefea la ona faagaoioi? E tusa ai ma faamatalaga ua faailoa mai ia i matou, o tagata e le sala o loo afaina ai e manino mai ua faase’e e faapea ua latou maua sea tupe i totonu o a latou teugatupe mai tagata tau faasese i soo se vaega o le lalolagi.

O le tagata ua na maua lea tupe e una’ia ina ia tala i tua lea tupe, tuu se pasene o lenei tupe e avea ma mea ua latou faaigoaina o se tupe totogi, ma faaliliu atu le tinoitupe o loo totoe mo le faaaogaina i isi lava faiga.

 “E ui lava ina le lava le malamalama  o paaga i lea faiga, ae o le mea moni ua auai i latou i totonu o ni faiga sese lavelave tau tupe ua fuafuaina e tagata solitulafono,” o le faaaliga lea a Faletupe.

“O se solitulafono ogaoga lenei ma o lea o le a le faatali ai le Faletupe Tutotonu e ala i se sootaga ma le Faletupe ANZ ma isi lava faletupe tau fefaatauaiga i le faata’apeina o nei ituaiga o gaoioiga  i sui sooupu tau le faamalosia o le tulafono mo nisi suesuega ma atonu o le a molia ai.”

O se mea tau faafefe lea –a ‘ea? Fai mai ua matua leai lava ni au tupe i totonu o lau teuga-tupe-ae faafuase’i ane ua e maua ua i ai ni nai selau o afe o talā ua saofafa’i ai i totonu, o le a faigata ona e teena, a ‘ea?

Tusa lava pe o le a e maua ai ni nai afe mai lea faiga, e te ono manatu e le o se mea leaga lea. Ae peitai-e leaga. Pe na o lou faanatinati o lea talosaga, o le mea moni-ua avea oe ma itu auai i lea gaoioiga tau faasese tau tupe lea e le faatagaina e le tulafono.  

O le atugaluga e uiga i lenei vaega o le lalolagi e faapea-e toatele tagata e matua afaina ai pe a fua i le maulalo o a latou tupe maua ma le ono faigofie ona faatosina e le folafolaga o le tamaoaiga vave. 

O le tala fiafia e faapea e ui lava ina lavelave-tu gaoioiga tau faasese i lea aso ma lea aso, ae peitai –ua uma ona tuuina mai e Faletupe ia i tatou ni laasaga faigofie e puipui ai i tatou mai le faaseseina ma taunuu atu ai i le itu sese o le tulafono. 

 “O le faiga e sili ona lelei tau le puipuiga o le mataala lea i le malu puipuia o faamatalaga auiliili o  le teugatupe a le tagata lava i le faletupe, igoa e faaaoga i teugatupe i le Initeneti ma upu e faatino ai, pepa o tupe e tala ma tupe tala –Numera e Faamaonia ai le Tagat (PINs) ma soo se faamatalaga e faasino i teugatupe a tagata teutupe- e le tatau ona faailoa atu,” o le faaaliga lea a le Faletupe.

“Matou te una’ia foi paaga a faletpe ina ia sui i taimi uma upu aloaia e fai ai a latou teugatupe i le Initeneti ma pepa PINs, e amata atu i le asō. “Mata’itu lelei lau teugatupe. Ia e tilotilo lelei i au gaoioiga tau teugatupe ma a e vaaia soo se mea e te lei faatagaina, faafesootai loa lava lau faletupe.

“Puipui le avanoa i lau masini computer ma telefoni feavea’i. Afai e te le faaeteete, e ono mafai e tagata solitulafono ona faamatalaga e uiga ia te oe ma au teugatupe i le faletupe.” 

O le mataupu mulimuli, a e maua se imeli mai soo se tasi e te le o manatua pe e te le iloa, aua ne’i e tatalaina.  “O Imeli e mafai ona faalafi ai ina ia foliga mai e sa’o ma tonu. Afai e i ai ni ou masalosaloga, ia faafesootai le tagata poo le faalapotopotoga e aliali mai e aumai ai lea imeli ina ia mafai ai ona siaki lona tulaga moni.”

Ia-ua na o nisi na o auala e puipui ai oe.

Ae talu ai o lenei tusitusiga e masani lava ma i taimi uma lava e una’ia ai pe a pa’ia lenei mataupu, afai e aliali mai ua sili ona lelei ina ia avea ma mea moni, e tumau laa ona moni. E leai se mea e sili atu i lo taui o le galue ma le tiga. 

O le mea lea-ia outou mataala, puipui lau teugatupe ma oe lava ia-ma ia outou maua se Aso Lulu uiga ese, ma ia faamanuia atu le Atua!