O LA’U TALA FO’I

331 Hits

1. Ua matauina ma le loto faafetai tele i le Atua ona o Lona lavea’iina o Samoa mai le Afā o Amosa lea sa lamatia ai talu ai nei lo tatou atunuu. Ae ui o lea-e peiseai ua tau faaletonu lea taofi ona o manatu faaalia o se tasi e faauluulu i ai le Ofisa Vaai tau a Samoa-ma lona manatu fai mai-“

O le faasaoina o Samoa mai lea mala-“e le o se Vavega…….!”O le itu la e faanoanoa ai-o lea Afa o Amosa e pei ona matauina-sa aga’i tonu mai lava i Samoa!

Afai la sa faaigoaina e le Ofisa o le Vaai Tau o Amosa o se matagi poo se afā malosi-ae o lea ua faasaoina ai Samoa –e faapefea la ona fai mai “e le o se vavega” lea mea na tupu? O a ni faamaumauga a’o ni molimau ola a le Ofisa Vaai Tau-e faamaonia ai e le o se ‘Vavega”?

E mafai e le Ofisa Vaai Tau a Samoa ona latou faia ni vavega? O le upu moni-ma atonu e faamaonia foi e le atunuu lautele-ana le seanoa Tala Fou a le Televise a Niu Sila-e le atoatoa le silafia e le atunuu- o itulagi o le Pasefika ma ona vaega uma na amata taavili mai ai-aua a tu’u i lipoti a le Ofisa Vaai Tau a Samoa-e fa’i o le lē malamalama-ae o le faatinoga e pei o se faia’oga ma lana vasega-ae leai se isi e malamalama ai.

Taatia la le Tala o le Tau a le Ofisa Vaai Tau a Samoa-ae afai tou te fai mai e le o se vavega le mea na tupu –talu ai ona e le’i o’o le malosi o Amosa i le malosi e pei ona fuafuaina-o le fesili la-o sa outou galuega le faiga o le Tau ma le malosi o Afā?

O le faamanatu la-ua lava ma totoe lena faaupuga-“e le o se vavega,” e ta’u mai ai-e le tioa a malaia lenei atunuu-ona o le le malamalama lelei o le tagata i galuega a le Silisili Ese.

Afai la ua outou fai mai e le o se “vavega”-o se faaupuga lena e sili ona le mafaufau i le atunuu atoa o loo faavae i le Atua-aemaise ai o le Aufaigaluega Pa’ia a le Atua o loo tala faa-uto i le salafa o Samoa mo le tauasuina o le vai o le ola-o lona uiga o le malamalama atoato o le tagata ola i le Atua na faia o ia. O le a la sou taofi?

2. Matauina foi i Tala Fou ni lapata’iga mai Faletupe mo le atunuu lautele- ona o ni faiga tau tupe fau faasesē…! O lea la lapataiga fai mai:-“A e maua soo se imeli mai se tasi e te le masani ai pe e te le iloa fo’i-“ia ‘aua lava nei e tatalaina…..”

O ia la lapataiga ua matua faatonuina ai le mamalu o le atunuu-ina ia nofo uta i ai-“ina ia latou matua mataāla ia latou teugatupe tau i latou lava.”

O le lapata’iga la lea a le Kovana o le Faletupe Tutotonu o Samoa-o Maiava Atalina Enari ma le Ofisa Sili o Pulega o le Faletupe o le ANZ i Samoa nei.Fai mai la ia lapataiga-o ia faiga pi’opi’o ma le taufaasese- e ono aafia ai teugatupe a tagata ta’ito’atasi-o lea lapataiga-ua matua faailoa mai ai le sasao faa-afi o nei faiga pi’opi’o tau tupe i totonu o Samoa-ma ua peiseai ua avea Samoa ma laumua o faiga pi’opi’ a le lalolagi atoa…..!

Ia-afai la o nei faiga pi’opi’o o loo manuia ai nisi tagata-atonu o le pogai lea ua latou matua fiafia ai e fai ia faiga pi’opi’o…! O le itu la i tupe e auina mai fafo-fai mai e mafai foi ona faaseseina ai i latou e auina mai tupe mai fafo-ona o le manatu e faapea o ia tupe ua tuuina atu sa’o i totonu o a latou teugatupe-ae leai…….!

Ia-o le fesili la-“Aisea ua fiafia nei tagata e fai nei faiga pi’opi’o i totonu o Samoa-ae fai mai e faavae i le Atua Silisili Ese? Ia- atonu o le tali ua iloa lelei e ia tagata-o Samoa-“e le mafai ona molia ma faasalaina ai soo se tagata e faia se amio pi’opi’o….!

Ia –atonu e sa’o foi le manatu o ia tagata faimea pi’opi’o-talu ai- a tatou tilotilo i faiga pi’opi’o a le faigamalo a Samoa lea e faitau miliona ma miliona tupe a le atunuu na maumau ai –ae leai se tasi ua molia i le Faamasinoga ma faasalaina ai-e le tioa la a fetuleni mai tagata mai fafo ma fai faiga pi’opi’o iinei-aua e le mafai ona faasalaina ai! O le a sou taofi? 

Matauina foi i Tala Fou fai mai –“Ua toe faatulaga sa’o e le Ta’ita’ifono faamaumauga.” O lea faasa’oga ua na o se faamantu lea i tagata uma  e faapea o le Ofisa o le Vaai Tau-ona pau lava lea o le puna aloa’ia o faamatalaga e uiga i le Tau.

E pau lava lo latou popolega e faapea ua le malamalama tagata lautele talu ai lenei eseesega o le Vaaiga o le Tau-ona fesili atu lea o tagata pe o le fea e sa’o o  ia faamatalaga o le Tau. O le faaaliga lea a le Taitaifono o Suluimalo Amataga Penaia!

O lea la toe faatulagaina sa’o o faamaumauga e faasino i se tuuaiga a Seti Afoa e pei ona faaalia i nusipepa-e tusa ai ma lipoti o Tala o le Tau!

A matau atu la i nei faamatalaga uma-o le fesili taua lava-e le taua poo le faamatalaga a Pai poo Lafai e sa’o-ae o le itu e sili ona faanoanoa ai-“o le faapopoleina lea o le atunuu i ia tala o le Tau- fai mai o Amosa o se matagi malosi-ae le o mautinoa!

O le upu moni lava-o Tala o le Tau a Niu Sila-sa mafai ona faaitiitia ai le popole o le atunuu-ona o le vaai tino atu lava I ai i le Televise-i le ala tonu o le afā-ma lana faataamilosaga i le Pasefika.! Ana faapea e faapena foi ona fai le Tala o le Tau a Samoa-semanu-e le faapopoleina le atunuu!

Ae faafetai i le Atua ma lona alofa-e ui lava ina fai mai foi le Ofisa o le Vaai Tau a Samoa e le o se Vavega-ae faitalia ai latou –ae o le mea sili-ua faasaoina Samoa mai lea matagi vale! O le a sou taofi? 

© Samoa Observer 2016

Developed by Samoa Observer in Apia