O LE MAU A PULE-THE MAU MOVEMENT-

By Fuimaono Na’oia Faasavalu Touli F. Tupua 27 April 2016, 12:00AM

TALANOAGA

O se fuafuaga lea ina ia mafai ai ona auai se 800 tagata o le Malo o Samoa i le Fuāva’a mo le atunuu atoa -ina ia mafai ai ona tapu’e le Ta’ita’iga o le Mau- lea na faamuta ai le talanoaina o lea mataupu.

Ina ua faafofoga Bishop Darnand i lea fuafuaga-na ia faaalia lona matua popole tele ona o lea fuafuaga ma ona taunuuga, sa popole foi o ia ina ne’i avea lea fuafuaga ma pogai o se taua a tagata lava o le atunuu.

E ese ai mai le Fuava’a-na ia silafia lelei le mea o loo faamautu i ai le Mau-ma ina ua mavae ni nai aso-talu mai le talanoaga ma Tupua Tamasese Mea’ole-o le taimi lea na malilie ai o le a o mai le Mau e feiloa’i ma Cobbe ma Allen-pe afai e le toe tapu’eina ma saisai tagata o le Mau; ma e faapea o le a matua malolo lelei lava le fuāva’a ma leoleo a’o faagasolo lea fonotaga.

O le a le toe faia ni sailiga o tagata o le Mau i totonu o nuu ma o le a leai foi se gaoioiga a le Mau e faatinoina i le faagasologa o lea fonotaga. 

Na tatala aloa’ia lea fonotaga i le Aso Gafua-3 o Mati 1930 i le ‘afa o le itula e 11 i le taeao i le Maota o Tupua Tamasese i Vaimoso. O Allen, Cobbe, Blake, Jeffreys ma le Failautusi o Mataupu Tau Samoa- o Frank Lewis sa fai ma Sui o le Pulega-a’o Fautua e to’alua o Malietoa ma Mataafa-sa auai la te maimoaina lea fono.

O Sui auai o le Mau sa matua toatele lava: e 50 tamalii sa taiulu ai Faumuina ma Tuimalealiifano.

Na tatala e Allen lea fono faatasi ai ma se fuafuaga faatiga-e ala i le aloa’ia o le auai o ni “malo faaaloalogia na asiasi mai-o Cobbe ma Blake-ae sa le faalauiloaina aloa’ia o le auai o Fautua ma Ta’ita’i o le Mau-o Malietoa ma Mataafa-ia sa auai e mata’ituina taualumaga o le fono.

Na amata le lauga a Cobbe i se mataupu na fuafuaina mo se faaleleiga, ma faaalia ai lona faamoemoe e faapea o le a tumau pea le “filemu, fiafia ma le manuia” i le salafa o Samoa. Fai mai a ia afai o i ai se “faimea-le-tonu” i totonu o Samoa-o le taimi lenei e faailoa mai ai.”

O la’u upu faai’u e faapea-e le mafai ona faaauau pea le Mau a’o pulea Samoa e le Pulegamalo. Matou te mana’omia le filemu ma le fiafia iinei. O loo e mana’omia foi lena lava mea, ae o taimi uma lava e faaauau ai pea le Mau-e le mafai ona tino mai lena tulaga. Sa le mafai e Allen ona faatusalia lea lagona-ae na amata lava ana upu i le tuua’ia o le Mau ona ua vaeluaina ai le atunuu. Na ia tuuina atu se lisi o mea e mana’omia:

1. Ia faamuta le Mau. O le faatinoina o lea itu e aofia ai le faataapeina o le Mau i o latou lava nuu, ma le tausisia o tulafono a le atunuu.

2. O le tuuina atu lea o tagata na latou faia ni solitulafono- ina ia faamasinoina e Faamasinoga i le faiga e masani ai. E le mafai e se faalapotopotoga ona faafoliga  na te puipuia tagata mai nei faiga e saisai ai- poo le faamasinoina-ma e tatau lava ona tasi le tulafono mo tagata uma lava-tamalii pe leai.

3. Ia fono Tamalii ma le Pulega e ala i se fono i soo se taimi e manaomia ai. O le aano o mana’oga e lua i luga, ua nofo sauni le Pulega e talanoaina soo se mataupu e aafia ai le malo o le atunuu, pe o soo se tagi, i le taimi nei poo i se taimi e pei ona fuafuaina. 

O le tali atu a Faumauina fai mai talu ai ona e leai se tagata e to’atasi na te mafai ona pulea le Mau-sa mana’omia se talanoaga a’o lei tuuina atu ni tali. Sa matua tete’e Allen i lea tulaga ma fai mai o ia mataupu e le mana’omia ai se talanoaga, ae fautuaina ina ia tolopo lea fono i le itula e 2 i lea aoauli.

Fai mai Faumuina o le a umi ai le taimi ma o le a latou faailoa atu ia Allen pe a maua se latou faaiuga. Na ia una’ia le toe fai o lea fono i le aso e soso’o ai e talanoaina lona tulaga auiluma. O lea la fono i le Aso Lua 04 o Mati sa matua puupuu lava.

Na lipotia e Faumuina e faapea e le’i taliu uma mai sui o le Mau mai le vaomatua-ona e le’i maua lava se latou faaiuga. Fai mai Allen ua malamalama lelei ia latou faafitauli- ua una’ia ai o ia ina ia malie i se faaiuga e uiga i le aso tonu, ae sa le mafai ona una’ia Faumuina mo lea itu.

O le aso na soso’o ai na vaaia ai ua pulea e Faumuina lea fono, sa faailoa atu ia Allen ma Cobbe e faapea ua maua se faaiuga a le Mau e uiga i le mataupu muamua e tusa ai ma mana’oga.

I sana saunoaga faanatinati-sa faaalia e Faumuina e pei o se tasi e lagolagoina le Mau- ae le o se Ta’ita’i. E tusa ai ma lou manatu “ina ia faamuta le Mau,”o le tali a tagata Samoa ia ua fai a’u ma o latou sui e faapea:-

“E le uma le Mau; talu ai o le Mau-o le fofoga lea o tagata Samoa- ia o le a outou feiloa’i, o lo’u la manatu-o le Mau- ua na ona pau lea o le avanoa o tagata Samoa ia ua avea a’u ma o latou sui.

O le tali lena-ma ona pau lena o le tonu ua fai e tagata Samoa e tusa ai ma lea mataupu-ma ua latou faailoa mai ia te a’u ina ia tuuina atu i outou luma. O le tali mai a Allen i lea tulaga sa matua umi lava- ma o se tuufaatasiga uma lea o upu faatiga ma le pepelo.

Fai mai o le faanaunauga faifai pea o le Malo-ia tuuina atu i tagata Samoa-“se sea e matua sili ona tele” i totonu o atugaluga o le malo.Fai mai a ia e faitau miliona ma miliona tagata o loo i lalo o le Fu’a a Peretania i le tele o vaega o le lalolagi, ma latou te auai uma lava i totonu o latou malo.

E na o le Mau lava a Samoa I le salafa atoa o lea Malo- e musu. Na ia tuua’ia le Mau a Samoa ona o le teena o le Malo o Peretania. Na ia tuua’ia le Mau ona o le taofia o le faagasologa i luma, taofia le faatulagaina ma le tulaga o le tagata Samoa-le “tagata mativa”e tusa ai ma atugaluga o lona olaga ma le soli o le tulafono, poloka o ala tetele, tau’ai o ma’a i taavale ma le fasi o Leoleo.

By Fuimaono Na’oia Faasavalu Touli F. Tupua 27 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>