Osofa’i se Alii, ae susunu le taavale

By Pai Mulitalo Ale 27 March 2016, 12:00AM

O le le tausisia o le tulafono ma le tulaga le maopoopo na pa’ū i luga o Salelologa i Savaii i lea taimi ma lea taimi i le po o le Aso Tofi a’o tapenapena le atunuu e faamanatu le Aso Faraile Pa’ia. O lea faalavelave na tupu ina ua fasi se alii mai Salelavalu na ta’u’ai i ma’a ma susunu lana taavale i le Uafu i Salelologa. 

Sa le mafai ona maua mai se faaaliga aloa’ia mai Leoleo ananafi, talu ai ona sa le faigaluega le Fofoga o Tala Fou a le Matagaluega. Ae peitai-na faaalia e se Alii Leoleo i Savaii-o ia lea na talanoa mai i le Sunday Samoan i luga o se aiaiga ia le faalaua’iteleina o ia- ae na ia faamaonia lea faalavelave.  “Na tupu lea faalavelave pe tusa o le itula e 12 i le vaeluga o le poi na ua tapuni fale kalapu,” o lana faaaliga lea.  “O lea taavale sa aveina e se alii mai Salelavalu na toeitiiti lava a feto’ai mai le taavale mai Salelologa ma o le mea lena na afua mai ai lea eseesega.”

Fai mai lea puna o faamatalaga na taofi le taavale mai Salelavalu i luma mai o le uafu, ina ua alu ese. 

“O le nofoaga lena na tau’ai ai e le tupulaga lea taavale ma susunu,” o lana faaaliga lea. O se faalavelave tau faamata’u ma ua matou fiafia ona o le leai o se isi lava tagata na aafia ai.” “Na sola ese le avetaavale ina ia saogalemu ma ua laki ina ua lavea’ina e seila o le Lady Samoa III.” Na viia e lea Alii Leoleo le vave ona faalave le matai o Salelologa.  “O se mea lelei tele ona o le vave tali mai o se matai mai Salelologa ma fesoasoani i Leoleo i lea po,” o lana faaaliga lea. 

O le isi puna o faamatalaga na faaalia i le Sunday Samoan e faapea o se tasi o loo masalomia o se pagota lea na faataga i tua i le faaiuga o le vaiaso o le Eseta. Fai mai a ia o lea pagota e lauiloa e tagata lautele ma na faate’ia o ia ina ua tuuin atu ia te ia le parola i le faaiuga o le vaiaso.  “O ituaiga ia o pagota e tatau ona matua faaeteete i ai falepuipui pe a tatala latou i tua.” Mo se sui o tagata lautele e mana’o ina ia faaigoa o ia o Ioane, fai mai a ia o le vaai i lea taavale na mu e matua tau faafefe lava. “Sa leai so’u manatu e mafai ona tupu lenei mea i totonu o Samoa,” o lana faaaliga lea. “O se mea lea e masani ona ‘ou vaai i ai i tifaga  ma atunuu i fafo. I le taimi nei-o lea tupu i totonu o Samoa ma o se mea lea e matua tau faamata’u lava. “Sa ‘ou fefe ma matamata i le loto ita o nisi o ia alii talavou.” E talitonu le Sunday Samoan o loo fai suesuega a Leoleo.

By Pai Mulitalo Ale 27 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>