Tatou talatalanoa ia i lenei upu e ta’ua o le fa’amoemoe. Ese ai i le tele o le mau vevesi o lo’o o tatou i ai , o le mau fa’alavelave ua le asa se aso o tatou molimauina, aepeita’i o lo’o i ai pea le fa’amoemoe.

O lea fo’i le feau o le Toetu o lo’o manino mai i lenei aso a’o fa’amanatuina ai e le au Kerisiano lea aso taua na Toetu Manumalo mai ai le Ali’i Fa’aola mai le oti ma o e talitonu ma fa’atuatua i lona Mana o lea o lo’o i ai le manumalo ma o lea e na te aumaia le fa’amoemoe ola mo le lalolagi.

O le mea pito sili ona mata’utia pe a fa’ailogaina le Eseta e tatou te le talanoa pe fa’amanatu se tasi na oti ae o le Keriso Manumalo mai le Oti ma le Tu’ugamau ma o lo’o afio  nei i le Itu Taumatau o le Atua le Tama ma o le a toe afio mai e pei ona ia ta’utino mai ai i a te ‘i tatou.

O le mea e ao ona iloa o le fa’amoemoe ua na’o Iesu lava o lo’o i ai, ma o lea fo’i le ala o lona maliu ai i luga o le satauro mo ma a’u ina ia sa’oloto.

But sadly, the message of Easter is still lost on so many, even here in Christian Samoa. Some people are still living in defeat, in bondage, and in hopelessness.

E ui la i lea, ae o le feau o le Eseta o lo’o le iloa lava e le to’atele, e o’o lava i a’i tatou tagata Kerisiano, ona o lea o lo’o tatou feola lava i se olaga le malamalama ma le tumu i le le mautonu.

O le mea moni o le tele o lotu o lo’o o latou foa’i tupe i lotu i le tele o ituaiga o vaega ma e leai se mea o i ai pe afai o lou loto malie ae le fai ma se pule fa’amalosi e foa’i ai.

E ono fa’ateleina mea e foai ma o’o atu ai ma avega mamafa i tagata ma o i o le a tula’i mai ai le fa’aletonu.

O le lotu o se tasi lea o vaega o lo’o fa’apea ona foa’i tele ai tagata. Ia sei o tatou tilotilo i le malo, e tele lava ina o tatou talanoa po o afea e fa’atino ai le malo se galuega i o po o totonu fo’i o tatou nu’u ma Itumalo, ma o le mea moni o le matafaioi na a le malo o le auauna atu i le atunu’u.

Ae fa’apefea lotu? Tele o tupe o lo’o fa’aaluina i lea vaiaso i lea vaiaso o le a sa’o lava le galuega a le lotu o lo’o faia mo le lautele o tagata?

E o’o mai loa i lotu e tele lava ina o tatou fa’alogo i mea fa’aleagaga, ma o lea le atoaga o le lotu o le aoaoina o ala o le Atua aemaise o Lana Upu Folafola.

Masalo e matuai lagona le fa’anoanoa o Iesu i le tele o le mau  lotu o lo’o latou  le faia lona finagalo i vaega nei. 

O lo’o taua i le ola fa’aleagaga lava ia  atia’e o le Ekalesia ae le gata i lea  o lo’o ta’ua mai fo’i a leai ni galuega o le a oti le fa’atuatua. Ia o lena le mea e pule lava oe ia i le faia ai o lau lauga, ae a le mafai ona vaai tagata i fua o le ola fa’atuatua e le mafai ona iloa le mea o lo’o e taumafai atu i ai.

E le mana’omia e tagata le lauga lauga atu, ae mana’omia fa’atinoga o le feau o lo’o e taumafai e tu’uina atu, e leitioa a to’atele e aga’i atu i le lotu ae o lo’o feoti pea.

O le mea moni e le mana’omia e tagata ni tele o ni lotu, e le mana’omia le tele o ni fale tetele, ua tele foi le mau lauga ma sauniga o lo’o agai i ai, ua mana’omia ni fa’atinoga.

O lo’o mana’omia e tagata ni mea’ai mo i latou, o tupe mo aoaoga a nai a latou fanau, totogi ai pili, o le mau fa’alavelave ma le tele o le mau mea fai mai lea aso i lea aso.

Ua le lavava nai tagata i le anoanoa’i o le mau lauga o le Atua o le a ia foai mea uma o le ola, ae uma ane ae soso’o mai tua ma ni folafolaga o saogamea o lena vaiaso ae le faitaulia ai isi saogamea o lena lava vaiaso ua tatau ona fa’agata.

O le mea moni lava o le lotu ua avea ma avega mamafa i le tele o tagata o lo’o i ai i le taimi nei.

E le taua ai nisi o Ekalesia o lo’o galulue mo le atina’eina o nisi o vaega aua lava tagata lotu, o nisi o Ekalesia o lo’o galulue e agalelei atu mo e o lo’o fia maua le fesoasoani mo nisi o aoga, aiga ma e o lo’o fia maua le fesoasoani.

Ae a isi lotu? O a ni galuega o lo’o o outou fa’atinoina mo a outou lafu mamoe mai le tele o le mau tupe o lo’o outou maua mai i foa’i mai lea aso i lea aso.

Mo lenei aso, ia tatou manatua pea  ma le fa’amoemoe o lo’o soifua Iesu Keriso ma o le fa’amoemoe lea ma le atoaga o mea uma e pei ona fa’amanatu mai le Roma 15:13.

Manuia le Aso Sa o le Toetu.