Aua le faitio ae galulue

Tusia Fetalai Tuilulu’u ,

89 Hits

Konelio Vili

Konelio Vili

E tonu lava le tagata i ona matanatu ma lona lava iloa. E o’o lava i fa’afitauli o le olaga e iai lava le manatu fa’alia o le tagata lava ia.

O le manatu lea o le ali’i talavou i a Konelio, 23 tausaga le matua o Falefa ma Vaitele.

 “Ia o totonu lava o si o matou nei nu’u ia o tupulaga lava i le le fa’alogo ma le usita’i lelei fo’i i matua e pei o lea le itu o lo’o ua tele ai pea fa’afitauli o lo’o ua tatou feagai ai” Konelio i le Fofoga o Samoa.

 “O lea lava le tulaga o lo’o ua tatou maitauina i le taimi lenei i totonu o nu’u aemaise o afio’aga.

 “Ia e pei o le ava malosi lava o lo’o ua fai ma faigata i le taimi lenei, ia ae o lo’o tu’u lava i le faitalia o le tagata lava ia.

 “O isi e fa’apea o latou manatu ai o le a avea vaega nei o le a fesoasoani tele i lo latou ola aemaise o le olaga  o lo’o ua i ai nei ae lilo i o latou manatu e le’o lea le tulaga e tatau ona o latou i ai.

 “Ia o le olaga lava ia i totonu o afio’aga i lo’u iloa i ai, o lo’o ua se tulaga faigofie lava e leai se mea o fa’aletonu ai.

 “Ia o le olaga lava lena e le tau fa’amatalaina aua ua o tatou iloa uma lava.

 “Ia ae pei lava o pulega a matai o lo’o ua lelei ai le fa’ataunu’uina o mea uma, aua lava le saogalemu o tatou tagata uma.

 “Ia o lo’u iloa i ai, o le tau lava le o le soifuaga o lo’o ua tatou i ai , o le a lava fo’i le tele ona tatou faitio ia e le taitai lava ona maluelue ai ni suiga.

 “O lo’u iloa i ai , e pei e lelei lava le faitio ae mo le taimi lenei, e tatau ona gaioi.

O le taimi lenei o lo’o ua fesoasoani tele o ia i ona matua i aso uma.

 “Ia e pei o lea lava le tulaga o lo’o ua i ai le taimi lenei e fesoasoani ai aiga.

 “Ia ae mo le taimi lenei, ia o lea lava e tau su’esu’e atu se galuega aua lava le aiga.

© Samoa Observer 2016

Developed by Samoa Observer in Apia